بودكاست : 3 طرق تخليك تحبي الخضروات لزيادة المناعه في زمن الكورونا

السلام عليكم ورحمة الله وبركاته

وحشتوني من زمااان عن التدوين .. كيفكم ؟ كيف الحضر ؟ والدوامات مع اوضاع كورونا ؟ الله يحميكم ويشفي مرضانا ومرضى المسلمين

ندخل بالموضوع على طول .. اذا تتابعوني على السناب والانستقرام .. تعرفو ان منصه جرعه من عادة .. صار عندها برنامج بودكاست ولازم تتابعون صفحة جرعه من عادة والبودكاست عشان تشوفوا الحلقات السابقه

البرنامج اسمه SHOTS OF WHAT ?

موجود بالابل بودكاست والساوند كلاود والسبوتيفاي

حلقه الاسبوع والحقلتين الجايه باذن الله مخصصه لوضع الكورونا .. وتكلمت فيها كيف صرت احب اكل خضار أكثر من قبل وصرت اتقبل الخضروات اكثر .. سابقا كنت اكل نوعين او ثلاث بس … بالبودكاست تكلمت عن 3 طرق سهله وتساعدك تبدي عاده صحية مفيده لك

خاصه الان بوضع الازمه الحالي .. مناعتك هي اساسك والسلاح بعد الله بانك تقاتلي هالمرض .. طبعا احنا نعمل بالاسباب والاقدار بيد الله … الخضروات مليانه فيتامينات ومعادن وفوائد كثيره وجباره .. فلابد انك تبدي تخليها جزء من روتين أكلك

فاسمعي البودكاست واستمتعي وان شالله يفيدك ويفيد الي حولك ..

رابط البودكاست

ايش اخذ من مكملات واكلات تزيد المناعه بوقت الحجر المنزلي – فايروس كورونا my supplement during quarantine

السلام عليكم ورحمة الله وبركاته

شاركتكم بالانستقرام اي موضوع تبغوني اكتبه وكان مابين ( تحدي الصحيان 5 صباح) او ( مكملاتي الغذائية هالفترة ) والاغلب اختار المكملات الغذائية … ودا هو موضوع اليوم ان شالله بالمدونة

المكملات الغذائية ؟ ايش فايدتها ؟

انا مو مختصة ولا خبيرة .. انا أشاركم تجربتي ومعلوماتي الي متاكده منها فقط .. فلازم تتأكدوا قبل لا تاخذو اي شي ان صحتكم تمام او يناسب وضعكم الصحي

طيب ايش هي المكملات الغذائية ؟؟ هي باختصار او بشرح سريع هي غذاء اواكل ولكن بصورة مختلفة تكمل النقص الي بأكلكك … او اذا انتي ماتاكلي كويس تاخذي هالمواد عشان تغطي النقص أو تزيدي تنوع الفوائد في أكلك

ولكن !!!!! في ناس تعتبرها شي أساسي ؟؟ او لابد منه !! او اذا مااخذته فوضعي غلط !! .. من اسمها مكمل !!

ولازم تعرفي اذا اخذتي مكملات و وأكلك العادي هو ناقص كثير مارح يساعدك اذا بس بتعتمدي على المكملات .. لازم تحاولي تعدلي اكلك .. لان بالنهاية الاكل الطبيعي أفضل واحسن وهو المصمم لجسمك .. الباقي يعتبر مكمل مساعد يسهل لك تكملة النقص فقط

هل مهم المكملات هالفترة ؟؟

.. يعتمد على وضعك الصحي وطبيعة أكلك الحالي ونشاط .. المهم هالفترة زيادة المناعة المناعة المناعة لان الفايروسات دائما جسمنا يهاجمها فلازم نزيد المناعة اكثر هالفترة لان نحتاج مناعو أقوى من قبل لان هالفايروس قوي جدا … بس بالنهاية احنا نعمل بالاسباب وبالنهاية اقدار ومشيئة الله ولكن لابد من اخذ الاحتياطات كلها ومن ضمنها اكلك وطبيعة نومك ونشاطك

ايش اشكال المكملات ؟

في حبوب … في بودرة … في سائل … وفي انواع لان يعتمد على طبيعة جسمك والامتصاص . .في ناس تفضل البودرة لان بتحطها بوجبتها او حبوب لان نتائ الامتصاص بجسمها افضل او غيره من الاسباب

وفي مكملات لفيتامينات ومعادن او احماض وغيره .. وفي الي تكون مكمل أكل .. وهي اصلا اكل ( يعني شاهي بودرة او ثوم بشكل حبوب او بودرة او بروتين على شكل بودرة او جرعة كركم وهو عباره عن عصير كركم ) وهكذا

فمو كل المكملات تعتبر صناعيه اوبس حبوب .. في بعضها أكل وينضاف في اكلك ومشروبك

متى تبان نتائج المكملات ؟

الشي الي مو حلو في اي مكمل خاصه الحبوب من تجربتي مايبان نتائجه بسرعه وهذا طبيعي لان لازم يكون في اخذ مستمر عشان الفوائد تنبني في جسمك وتغطي النقص .. فاوقات يكون ملل او زهق وتوقفي اوقات او تنسي او تحسي بدون فائده بس لازم تاخذي وقتك يعني لمده شهر او اكثر في البعض ينصح لمدة 3 شهور بعدين تشوفي الفوائد .بس يعتمد على حسب جسم كل وحده وامتصاصها للفوائد واكيد اكلها ووجباتها الي اكيد بتساعد مع المكملات

مكملاتي الحالية ؟

الحديد : لان عندي نقص عالي

فيتامينات متعددة : الحبوب الي تحتوي على فيتامينات متعددة

عسل : اخذ ملعقة عسل

حبة سوداء : كفاية انها توصية الرسول وقوتها للمناعه جبارة وهالفتره احتاج التزم فيها

جرعات : الي يتابعني بالانستقرام يعرف قد ايش انا والجرعات اخوان هههههه – اقرو موضوع هنا و كمان حطيت وصفة المناعة جديدة بالانستقرام – هنا – ووصفة المناعة سابقة – هنا– وفي وصفة الشيخوخة – هنا– … اخر وصفة حطيت فيها العسل والحبه السوداء فيكوو بشي واحد

المغنيسيوم : لان قريت انها كويس لدعم العظام والعضلات بحكم ان عندي التهاب ولكن لسا مااقدر اتكلم عنها لان لسا قبل شهر بديت

هل في مكملات تبغي تاخذيها ؟

حابه اجرب بودرة الخضار وهي عباره عن خضار مشكل ( مختارين الخضار الي معروف بكمية الفوائد الكبيرة الي فيهم ) .. في كثير ماركات وكثير انواع

فحابة اجرب هالشي لان مقصرة باكل الخضروات وكتنويع طريقة مختلفه تاكلي خضرواتك وخاصه اني ابغا اشرب مشروبات وعصيرات صحية أكثر من قبل

بالنهاية

لازم تنتبهوا من المكملات لان مو كل شي يناسبكم والكميات لازم تكو مدروسة قدر المستطاع لان يمكن توص لحد التسمم الله يحميكم

لاتنسوا تشاركوا هالتدوينة مع غيركم وتابعوني على الانستقرام والسناب

عيشوا بحب وايجابية

نظامي الصحي خلال الحجر الصحي my healthy routine during quarantine

السلام عليكم ورحمة الله وبركاته

كيفكم ان شالله بخير .. وكيف التزامكم بتعليمات الدولة من ناحية الحجر الصحي وتخفيف التجماعات. انا حاليا بالحجر لي 9 ايام .. اكيد الموضوع مو سهل على الكل وبعض الناس ولله الحمد مافرق معاهم .. اهم شي نعمل بالاسباب ونتوكل على الله ونحاول نركز بجوانب ثانيه بدل التركيز على هالموضوع

وعلى فكرة نزلت اول بودكاست لي بمنصة – جرعة من عادة – روحوا اسمعوه شي خفيف ولطيف وباذن الله اتكلم فيه اكثر ..تابعوا حساب جرع من عادة والبودكاست كمان

روتيني الصحي خلال فترة الحجر

الحمدالله الحمدالله على أنظمة – جرعة من عادة – .. لانها مرنه ومعطيه كل شي حقه .. لما حولوا الشغل عن بعد وصار الحجر وهالامور ماتغير علي شي بالعكس زاد عندي وقت اسوي اشيا اكثر وارتب اموري ونظامي اكثر

طبعا هالشي مامنع ان في لخبطة وحوسه واعادة ترتيب اولويات ولكن انظمة جرعة من عادة سهلت الموضوع مره وقللت ضياع وقت كثير وساعدتني التزم أكر بمخططاتي

لان النظام سهل وخفيف والاهم مرن للتعديل

طيب أشرحيلنا نظامك ؟

نظامي مثل مااوثقه كل يوم بالانستقرام هو كالتالي

  • رياضة على الريق
  • وقت لديني
  • وقت لهواية او تعليم
  • وقت الشغل – الدوام-
  • وبعدين وقت اسوي في اي مسؤوليات عندي او التزامات متنوعة بتختلف كل يوم
  • وقت للفرز -تقليل الممتلكات
  • وقت لشغلي الخاص منصة جرعة من عادة والمدونة

مابين هالاوقات يتخللها اوقات راحه .. اوقات الاكل .. بس بالمجمل هذا هو روتيني الحالي او الامور الي ملتزمة فيها بانتظام

كيف نومك ؟ تلخبط مع وضع الحجر

لو تتابعوني بالانستقرام ماتسألون هالسؤال ههههه .. مسويه تحدي لمدة شهرالى شهرين ان احاول اصحى 5 الفجر … فحاليا مابين 5 و6 الصبح اصحى .. نرجع ونقول اكيد يتخللها اوقات اصحى متاخر طبيعي في مرحله التحدي .. ولكن ولله الحمد غالبا اصحى مابين 5 و6 الصبح

ليش تصحي بدري وانتي بالبيت ؟ ماتزهقين؟

للامانه فكرت بالموضوع ان غالبا اهلي كلهم زي باقي الناس نشاطهم يبدا قرب المغرب ومابعد .. وانا بصير بعد المغرب يبدا الخمول والنعاس يجني

بس للامانه ترتيب مهامي وانجازاتي الي اشوفها يوميا ( بالنسبه لي شي كبير يمكن للبعض لا ) تحمسني التزم واكيد اوقات امسك نفسي واطول ماانام عشان اقعد معاهم بس اكيد اشوف ضريبة التاخير ثاني يوم الصبح وانا مو شبعانه نوم

هالتحدي وكيف صار وكل التفاصيل بتدوينة ثانيه ان شالله

كيف الاكل الصحي معك ؟ خبصتي ؟

مش كثير.. وتكلمت بالاستقرام عن 3 طرق ساعدتني اقلل تخبيص – الموضوع هنا -.. ولكن برضو الي ساعدني اقلل تخبيص اني اصلا دايم اخبص وارجع التزم واخبص وارجع التزم فيمكن التكرار ولد فيني التزام اكثر هالفتره والفترات الي قبلها

طيب الليل كيف روتينك ؟

بالليل ماعندي شي محدد للامانه ( يمكن اسوي كم شغله ماسويتها خلال اليوم ).. بس متى ماابغا انام رحت تجهزت ونمت خاصه ان اغلب اموري انجزها قدر المستطاع خلال اليوم وبدايته

هل ملتزمة بروتينك اليومي الصباحي والمسائي دائما ؟

لا … رسالتي بمنصاتي كلها اني ابين ان حقيقة رحلتي الصحية والموضوع واقعي ف لابد ان يكون في تخبيصات سوا نفسيا مالك خلق او ظروف تداهمك .. ولكن الالتزام ايامه أكثر ولله الحمد وماجاء كثرت الالتزام الا من كثرت التخبيصات

طيب كيف ابدا اسوي روتين لي وارتب اموري ويومي ؟

اشتركي بأنظمة جرعة من عادة … الانظمة خفيفه ومرنه وواقعيه .. وتساعدك ترتبي نفسك وماتهملي اي جانب بحياتك بنفس الوقت ماتحسي ان الي تسوينه هم او شغل .. بالعكس لما توقفي تبغي ترجعي تلتزمي

والحلو فيها انها مصممة لك .. بعد الاشتراك يجيك بالايميل ملف تجاوبي على الاسئلة عشان يتم تصميم جدول يومي لك وقيمة الاشتراك اقل من 50 ريال .. يابلاش

بالنهاية

لاتنسوا تتابعوا المدونة وحساباتي بالتواصل الاجتماعي ومنصة جرعة من عادة وتسمعوا البودكاست .. وتنشروا هالتدوينة يمكن تساعد احد بهالوقت

عيشوا بحب وايجابية

الاسبوع الثالث والرابع من تحدي شهر بدون نفايات LAST WEEK OF MONTH WITH NO WASTE CHALLENGE

السلام عليكم ورحمة الله وبركاته

اخر اسبوعين من تحدي شهر بدون نفايات . الحمدالله بنخلص كلها ايام معدوده . صراحه كانو اسهل واصعب اسبوعين بنفس الوقت . والتحدي استفدت منه كثيييير .. الي تو يقرا عن هالتحدي لازم تقري التدوينات السابقة عشان تعرفي ايش صار وليش بديت هالتحدي

تحدي شهر بدون نفايات

أول اسبوع بتحدي شهر بدون نفايات

ثاني اسبوع في تحدي شهر بدون نفايات

كيف كانوا هالاسبوعين ؟

صراحه كان اسبوع مره سهل والاسبوع الي بعدو كان معقد وصعب … ثالث اسبوع قدرت بشكل كبير امسك نفسي عن اي شي بلاستيك انا شخصيا استخدمه ولكن الاسبوع الي بعده ماضبطت معاي لان كانت في امور غصب فيها بلاستيك .. بمعنى شخصيا وقت الدورة الشهريه احتاج مشروب حليب الشوكلاته ( لا تسالون حتى انا معرف ليش اشتهيه ) فكنت اطلبه او يجني من برا ويكون الكوب فيه غطا بلاستيكي .. برضو كنت اشتهي حلاوه وبالغلط بدون ماانتبه اكلت شوكلاته بعدها استوعبت

كمان لاني مع الاهل فكنا مثلا نستخدم اكياس زباله او يجيبو مقاضي باكياس او اكل يكون مه اكياس ومواعين بلاستيك – لعما اني اجيب مواعيني هههه – او لما نقضي كان في اغراض نحتاجها ( مع العلم حاولت اقضي قد مااقدر بدون بلاستيك ولكن في امور الا فيها بلاستيك

فكان اسبوعين ممتعين مابين حماس الالتزام والمحاولة اننا مانفشل

ايش الي تعلمتيه من هالتجربة ؟

هالتجربة علمتني اننا تعلمنا وتربينا على الكسل بشكل كبير . .. مهما كنا نكافح ومعتمدين على نفسنا الا ان البلاستيك سهل امور كثيره علينا من تغليف اغراض / حمل اشياء / تخفيف غسيل / تخفيف مساحه والاهم تنوع المنتجات الي تكون من البلاستيك .. فغالبا تقولي هاتي ملعقه بلاستيك اسرع بدال مااغسل . او هاتي كيسه بلاستيك من المحل بدال ما اتعنى واجيب كيستي لان مالك خلق تشيلي عفش .. والخ من اسلوب الكسل والدلع

هل معناته الكل متدلع وكسلان بالمعنى او المفهوم العامي للكسل .. لا لا لا .. ولكن تولد فينا نوع من الاتكاليه الي تخلينا نستصعب اوقات ابسط الامور مثلا لو احد قالك شيلي كاستك معاك عشان لو بتشربي بره .. بتقولي لا ليش وشغلانه وتحسي الموضوع كبير وهو بسيط جدا ..

ايش كمان ؟

تعلمت اننا ولله الحمد بنعمة كبير جدا جدا .. بسبب هالاختراع .. صح استهلاكنا له وكثرت الاستخدام خلتنا نسبب اضرار كبيره للارض وبالمقابل لنفسنا .. ولكن لما تتنتبهي للامور من منظور تحدي ( لانك تبدي تدققي بكل صغيره وكبيره ) تستوعبي حجم النعمه والسهولة الي عايشينها بسببه

وكمان بسبب هالاختراع انفتحت ابواب كثيره للرزق للناس .. ابسط مثال ( الي يبيع بليلة يقدر يوفر اكله ويعطيه للغير بعلب بلاستيكه وملعقه بحيث عطانا تجربة الاكل بالكورنيش لان البلاستيك سهل له انه يعطي زباينه برا واسترزق

اللهم لك الحمد دائما وابدا

هل بتكملي تكوني صديقة للبيئة ؟

اي قبل لا ابدا التحدي بديت هالشي ومع التحدي حمسني اكثر .. وليش لا بعد التحدي كمان نكمل ولكن اتوقع مابكون بنفس الالتزام القوي بحاول اخفف واركز اتعود شوي شوي زي ماتعود على الاغراض السابقه عشان تكون اسلوب حياه انا راضيه ومتقبلته

ايش الي ندمتي عليه بهالتحدي

اني ماتجهزت ! لو جهزت الاغراض الي تكلمت عنها سابقا وانا اعرف ان لازم تتوفر كان التحدي بكون شيق وحماس اكثر ومن جد بيكون تحدي أكبر .. ولكن زي ماقلت سابقا رح ابدا اغير امور بمجالات مختلفه ولكن شوي شوي .. هالمره كان التحدي عباره عن ملاحظة وانتبه واستفدت كثير

صح ماطبقته حرفيا ولكن يعتبر شي وجربناه ولله الحمد

تنصحي التحدي لاحد؟

أكيييييييييييييد كل الي يقرا يلا جربنو لو شي واحد تمتنعو عنه وشوفو نفسكم وتجربتكم والاهم شاركوها معاي .. وتابعوني على مواقع التواصل لاني اشارك هاليوميات والشركات الي اتعامل معاها الي تكون صديقة للبيئة

بالنهاية

شكرا لحماسكم ومتابعتكم .. متحمسة نجرب تحدي جديد ونتطور اكثر باذن الله مع بعض

عيشوا بحب وايجابية

ثاني اسبوع من تحدي شهر بدون نفايات second week with no trash for month challenge

السلام عليكم ورحمة الله وبركاته

كيفكم وجيت لكم بتجربتي لثاني اسبوع لتحدي شهر بدون نفايات وهالمره نفس المره الي راحت لازم في اكشن وصدمة .. قبل لا تقروا هالتدوينة رحوا للتدوينه السابقه والتدوينة الي شرحت فيها التحدي ومفهومة

تحدي شهر بدون نفايات وبلاستيك ممكن؟ \ اول أسبوع بتحدي الشهر بدون نفايات كان فشل ذريع

اعلان مهم جدا جدا جدا

اذا ماتعرفو ( اسست منصه جرعه من عادة ) وبنسوي اول ورشه عمل لمده 3 ساعات بالخبر نتعلم كيف نبني عادات جديده بدون ما تاثر على حياتنا وتحسن جودة حياتنا بالاسلوب الي يناسبنا

التسجيل مفتوح للاشتراك المقاعد محدوده وانا الي بقيم هالورشه

تواصلي مع جرعه من عاده على الخاص بالانستقرام بارسال ايميلك اذا حابه خصم على رسوم الورشه او اشتراك بقائمه ايميل المدونة

هالاسبوع كيف كان ياهبه ؟؟؟

للامانه مره احسن بكثيررررررر . ولكن لابد من النفايات لان كم مره جاني اكل وكان باكياس علب بلاستيكية للامانه ماطلبت جاني ههههه ابراءا للذمه

ولكن الي كنت مره فخوره فيه اني حاولت امسك نفسي ماافتح اكياس الكاتشب لان هي بلاستيك ولكن مره وحده فتحت ونسيت .. المرات الجايه لا الحمدالله خليتهم جنبي اطالع فيهم وعيوني كلها شوق وحب واشتثياق << الي مايعرفني ان ااعشق الكاتشب

الاسبوع الي راح صراحه كان اول اسبوع يمر علي اكل من برا كثير … ولكن بالشغل الحمدالله اغراضي معاي من صحون وملاعق وغيره << الي يتابعني سناب او انستقرام يعرف هالشي دايم اصور رحلتي لتخفيف البلاستيك

برضو خرجت للسوق ونسيت كيستي عشان اقضي بدون اكياس بلاستيك بس نشوف الجانب الايجابي شلت معاي قارورة المويه عشان ماشتري مويه بلاستيك

طيب ايش الموضوع الكبير الي صارلي ؟؟؟ او الصدمه ؟

لما رحت السوبر ماركت اقضي اكل لي !!! ياجماعه حرفيا كل شي ببلاستيك او فيه جزء ببلاستيك .. بتقولوا هبه معروف ان الكثير من الاغراض بالسوبر ماركت تكون ببلاستيك

بس ارجع واعيد لما تقولي لنفسك بركز رح تنصدموا لدرجه تقولي لو مافي بلاستيك اتوقع كثير شركات توقف او مانقدر نعيش بدونه > وهذا مو صحيح ولكن الشكل الخارجي من كثير الاعتماد عليه يحوي لك بالفكره

المهم بس قعدت اقضي معلبات هههههههههه او اغراض فيها قطعه صغيره بلاستيك والباقي كرتون ..بس اغلب الاغراض يا كرتون يا معلبه

وهذا بس اسبوعي الثاني والاحداث الي فيه متحمسه للاسبوع الجاي ان شالله اتحسن اكثر

بالنهايه

شكرا على متابعتكم لي واتمنى تنشروا هالتدوينة تشجيعا للي حاب يبدا يحسن حياته .. وشكرا على تشجيعكم ودعمكم لمنصة جرعه من عادة .. واتمنى تشاركوني هالورشه عشان نستفيد سوا باذن الله

عيشوا بحب وايجابية

snap: boosh.life insta: booshlife

الاسبوع الاول لتحدي شهر بدون نفايات !! فشل ذريع ؟ no waste challenge

السلام عليكم ورحمة الله وبركاته

اذا اول مره تقري هالتدوينة وماتعرفي الي التحدي . اقري التدوينة السابقه

تحدي شهر بدون نفايات

هبه بشري كيف الوضع ؟؟

بنااااااااااااااااااااااااااااااات لاالالالالا .. اطول اسبوع مر علي واكثر اسبوع استوعب ان الموضوع مو سهل والمفروض تجهزتله صراحه << لان قلت سابقا بتجهز واجهز اغراض لي ولكن ماسويت

المشكله حتى لو ماجهزت اغراض ومنتجات مو مشكله اقدر اكمل .. المصيبه اني ماجهزت الاكل يعني ماقضيت لي مقاضي العاديه عشان اعرف ايش اكل لان حرفيا كل شي ببلاستيك من ناحيه المقاضي .. مع ان بتقولوا ياهبه معروف ان كل شي مغلف بالبلاستيك ولكن !!!!!!! لوبتركزوا بالموضوع وتحاسبو نفسكم على كل شي بالتفصيل بيكون لكم نظرة مختلفه وأدق .. يعني باختصار بتقولو

وبعددددددديييييييييين كل شوي بلاستيك بوجهي كل شي صغير وكبير فيه بلاستيك

وتستوعبي ان البلاستيك مو بس بلاستيك شفاف او الي متعوده عليه كمان في بلاستيك بانواع مختلفه << مع ان عارفه بس لما تبدي التحدي مدري ليه تنصدمي وتستوعبي اكثر … لا تتريقوا علي جربوا وبعدين نتفاهم

هل التزمت ؟؟؟

لاااااااا … صحيح ان قبل التحدي انا مخففه مره استخدام البلاستيك ذو الاستخدام الواحد … ولكن اتكلم عن باقي الامور … كان مو بيدي اغلب الاوقات .. بمعنى مثلا مره بالشغل طلبت اكل واستعوبت بعدين ان فيه بلاستيك .. او مثلا احد اشترى لي غرض وفيه بلاستيك او انسى شنطتي حق المقاضي .. وهكذا

ايش استفدت ؟؟؟

الموضوع يحتاج وعي … ماهو صعب تطبيقه قد ما ان في مواقف كثيره تكون ضدك او لازم تخبصي .. بس نشوف الاسبوع الجاي باذن الله يكون فيه نتايج مرضية باذن الله

مين بدا معاي هالتجربة ؟؟؟ واذا لا يلا ابدي من بكرا حبه حبه ماحد يجبر هنا الكمال باي رحلة

ولاتنسوا تنشروا التدوينة لغيركم وتتابعو المدونة وحساباتي بمواقع التواصل الاجتماعي

snap : boosh.life insta: booshlife

عيشوا بحب وايجابية

شهر بدون نفايات ؟؟؟؟؟ ممكن ؟

السلام عليكم ورحمة الله وبركاته

تدوينة اليوم تحدي جا فجاءة امس !!! المشكله ان الفكره جات فجاءه ومعناته يا الموضوع بوديني بستين داهيه او مره بيغير فيني وبيفيدني .. حبيت أطرح الفكره على طول عشان أغصب نفسي التزم لاني قولتلكم بسويه فدايم بحط ببالي ان لازم التزم عشان بكتبلكم تجربتي بالمدونة بعد التحدي فلازم التزم للمصداقية الي متعودة أشاركم فيها

التحدي مو غريب علي وفكرته شي انا احبو واطبقه بجز من حياتي .. سويت دورة مجانية بسيطة بالسناب تكلمت عنو و بالاستقرام أشاركم رحلتي كمان .. ولكن هالمره الوضع مره اكبر وأعم وتفصيلي أكثر

تحدي شهر بدون نفايات ؟؟؟؟

الفكره ان خلال شهر كامل ماأسوي أي نفايات واحاول التزم بنمط حياه خالي من البلاستيك واي شي يترمي بالزبالة من كل المجالات أكل لبس واي مشتريات واغراض بيومي

هبه !! مستحيل ماتسوي نفاية بيومك ! مستحيل !! فبتخسري اكيد !

النفايات الي بنتكلم عنها .. نفايات أستهلاكيه .. منتجات أشتريها منتجات استخدمها بحياتي .. والعنصر الأساسي ان النفايات ونوعها الي لازم أوقفها هي الي ماتعاد تدويرها وماتتحلل .. يعني تنرمي ومارح تتحل بس بتاخذ مساحه ع الفاضي بالأرض وبالمكان

ولكن مسموح لي المنتجات الي علبها بتتحلل او يعاد تدويرها او اكيد الاكل الي يتحلل يعني حتى لو في بقايا اكل وترمت رح تتحلل … وهكذا

شروط وقوانين التحدي هي:

المدة : شهر … النفايات الممنوعة : الذي لا يتم إعادة تدويره ولا يتم تحلله .. النفايات المسموحة: النفايات التي تكون قابلة على التحلل وإعادة التدوير .. تطبيقه :على كل مجالات حياتك .كل شي

الصعوبات الي فكرت فيها ؟ بعض منها

اول شي فكرت فيه هو الدجاج ههههههه يجي بصحن وعليه بلاستيك فايش بسوي ؟ ههههه معرف

كمان الأمور الشخصيه مثل انتو بكرامه الفوط الصحية فيها أكياس بلاستيك وهي تكون مغلفه ببلاستيك او العلبه الاساسيه .. عود الاذاني كمان بلاستيك ..

كثير من الاكل يجيك مغلف معناته لازم اسوي اكل بالبيت من الصفر

ايش احساسي قبل لا أبدا ؟

احتاج اقضي هههههههه قبل لا ابدا عشان ما اشتري << خدااااااع هههههه .. بس من جد جد أتكلم احس احتاج اوفر منتجات واغراض صديقة للبيئة عشان تساعدني وتدعمي برحلتي .

فمتوترة وشايله هم ان كيف بسوي خاصه ان الموضوع كبير ومتشعب وحابه اطبقه بالتفصيل حتى لو كان في أمور رح تزعجني بس حابه اتحدى نفسي والاهم اعلم نفسي الصبر والمسؤولية وان مو لازم كل شي يمشي زي ماابغا لازم

احد بيسوي معاي التحدي ؟

لا

والاغراض الي تستخدميها حاليا الي تعتبر نفايات بالنسبه للتحدي ايش رح تسوي فيها ؟

افكر ان يا اكمل استخدمها ( اذا مارح تخلص بالفتره ) يعني مارح تعتبر نفايه أصلا .. او ابطل استخدمها هالفتره واشتري بدائل واشوف التجربة .. وانا افكر بالجواب الثاني اكثر بس بشوف

هل في ميزانية للتحدي

أكيد بحاول احط ميزانية وماابغا اطلع منها واشوف هل تضبط او لا

بالنهاية

أتمنى تشاركوني هالتحدي لو باي أستطاعه تقدرو عليها مو لازم كل شي .. على الأقل حددو غرضولا تستخدموه وتشوفو البدائل ووضعكم بدون هالغرض . ولاتنسوا تتابعوني بالنساب والانستقرام عشان بشارك وضعي خلال هالشهر كامل والاغراض الي شريتها للتحدي كمان

عيشوا بحب وإيجابية

اهدافي لسنه 2020 ؟؟ my 2020 Goals

السلام عليكم ورحمة الله وبركاته

تدوينة اليوم بشاركم اهدافي الي حابه اوصلها وأحققلها .. طبعا شخصيا ما اؤمن بسالفه السنه الجديده .. لان لما صرت اقول رح ابدا بداية الاسبوع او الشهر الجاي !والخ حسيت ان كل مافشلت في يوم استنى موعد جديد عشان ابدا يا يكون بداية الاسبوع / الشهر الجاي / السنه الجاية .. وربنا انعم علينا كل يوم هو يوم جديد لفرصه جديده نستغلها ..

فشخصيا لو بحدد وقت غالبا اعتمد ( شهر رمضان ) كمرحله انتقالية .. سوا كيف بطلع من رمضان او كيف ابغا ادخل رمضان . الله يبلغنا اياه يارب …

ولكن صرت احب اخلي كل يوم جديد فرصه جديده .. فحتى انتي بكرا فرصه انك تبدي الي فشلتي فيه او لسا مابديتي .. لا تستني وقت لان عمرك مو بيدك !بيد الله فاستغلي كل فرصه الله يطول بعمرك وبعمري وعمر المسلمين جميعا

اهدافي

عندي اهدافي جديدة وأهداف بديت فيها ولسا ماحققتها وابغا اشتغل عليها

رسم لوحة اهدافي او الي اسمها لوحة الرؤية معاكم على السناب .. فتابعوني بالسناب

boosh.life

واذا تبغو تعرفوا كيف تصمموا أفضل لوحة لهدافكم ورؤيتكم عشان تحققوها صح .. اقروا هالموضوع اول

خمس نصائح لصنع لوحة الهام واقعية سهلة وتستطيعي تحقيقها

الجانب المهني

الحمد الله وشكرا لدعمكم انشات منصة ( جرعة من عادة) الي تعتبر منصه للجميع لتحسين جودة الحياة ..

زوروا الموقع http//:www.soa-wellness.myshopify.com

والحساب بالانستقرام @soa_wellness

هدفي اني أنجح هالمنصة وأبدا أسوي أول دورة او جمعة للمشتركين ..

اتمنى أستمر انجح واطور مدونتي . الي هي أول شغل بديته ومكان مريح احب اشارك فيه رحلتي الصحية

اتمنى اسوي عملي او شغلي او شراكه مع شركة شارك هب ( مكان مكاتبهم واجتماعتهم حلو ههههه

اتمنى استثمر واتعلم بالاستثمار أكثر

الجانب الصحي

حابه اكمل مشواري الصحي من ناحية الاكل ( واكل خضروات خضرا كثير )والرياضه .. اتمنى استمر بالرياضه ومااقطعها والاهم اطلعلي عضلات بطن هههههه

اشترك بنادي او اسويلي نادي خاص فيني بالبيت

استمر على رحلتي ( تقليل النفايات ) واتعاون مع شخصيات ملهمة لنشر الوعي

ايضااوصل للشكل المثالي بالنسبه لي او الوزن المثالي بدون مايكون هوس ان شالله

الجانب الشخصي

اهتم ببشرتي / شعري أكثر واحقق نتايج مرضيه

أقدر الي حولي واكون حاضره ذهنيا أكثر معهم من اهل واصحاب

اقلل استخدام التليفون

احفظ قران واقوي علاقتي بربي أكثر ( لانها من احلى الامور نتايجها مدمنة وماابغا ضغط الحياه ياخذني منه

طبعا اقلل كلام ههههههه عادة فيني مزعجه ولكن النيه طاهره بس رح احولها لمصدر دخل فاقلل كلام عشان الي يبغا كلامي يدفع هههههه << العرق الحضرمي التجاري بدا يطلع

بالنهاية

هذه اهدافي واتمنى احققها واحقق اكثر .. طبعا بعد تيسير الله .. الله يوفقنا ويسهل امورنا ويريزقنا القدرة والقوة والتيسير يارب .. انتوا ايش اهدافكم لهالسنه وهل بتسو لوحة باهدافكم ؟

افضل شي حققته بسنه٢٠١٩ my biggest accomplish this year2019

السلام عليكم ورحمه الله وبركاته

تدوينه اليوم قد سبق وشاركتكم فيها ..ولكن بشكل سريع والان جاء الوقت عشان افصلكم هيا لان تستحق كل وحده فيكم تسويها …

ورقه انجازات السنه

هالحركه فكرة فيها لان بكل واقعيه لما نشوف غيرنا سوا بحياتنا الشخصيه او بمواقع التواصل الاجتماعي يطلعو ويجربو ويسافرو ويحتفلو ويشتغلو وينجزون.. تبدا المقارنات الي مو شرط تكون بوعي مننا.. حتى اوقات تكون احساس ان مثلا ليش مامداني اسوي كذا .. ليش مطوله لين مااحقق هالشي..ياليت يمدي اسوي الشي الفلاني… وهي بالواقع بدون وعي مقارنه بحياه الغير ودا طبيعي واصلا لابد منه

ففكرت ان مستحيل حياتي مافيها شي يستحق اني اقول الا والله انجزنا بهالسنه كذا وكذا .. سويت كذا وكذا.. ولكن قد تكون مو بنفس مستوى للامور الي انا اشوفها انجاز … ولكن لابد ان في امور تستحق اننا نستشعر تحقيقها على الاقل واننا سوينا شي

فالقرار كان بكل بساطه …..

ورقه اعلقها باي مكان … انا شخصيا بالثلاجه … وقلم

وفقط اكتب ايش شي سويته جديد او من زمان ماصار او كان حلو او انبسطت فيه..صغير كان او كبير ..عادي او مو عادي

وبس….

النتيجه كانت خررررررررررررررررررراااااااااااافه ..مع ان ماحققت ولاهدف من اهدافي (الانجازات الي اطمحلها) .. ولكن التجربه كانت والله نقطه تحووووووول

ببساطه خلتني اعرف ان حياتي ولو كانت بسيطه او زحمه استمتعت فيها … ان هالسنه في امور سويتها ولازم اعترف فيها..وافرح فيها ..ولو كانت بسيطه .. والاهم احس بشعور الانجاز

طيب ايش كانت الامور الي وثقتيها بالورقه … ؟؟؟

بعيطكم بعض الي كتبته عشان تفهموا المغزى

مثلا كتبت (اجتمعنا جمعه بالسطح مع البنات / زرت محل قرافيتي للنطنطه مع اخواني / سويت لاهلي اطباق صحيه/ سويت تحدي اصحى بدري لاسبوع بس / جربت مطعم او اكله جديده …/شفت فيلم / خلصت مسلسل / اشتريت اجنده/..ماشربت بيبسي/ سويت فرز لاغراضي/ قريت كتاب .وهكذا)

لو اكمل بتحسون معاي ان اوقاتي كانت كلها انجازات … وامور وانشطه كثيره … ولكن هذا وغيره ماكان كل يوم ..ولا كل اسبوع ..يمكن كان بينهم اسابيع وشهور..وماتحسي فيها..ولكن لما تكتبي فجاه تشوفي السنه بمنظور مختلف

ببساطه ……..

حمدت الله …شكرت الله …رضيت وحبيت هالسنه … افتخرت بنفسي… بان هالسنه مرت ببساطه اني عشتها حتى لو ماحققت اهدافي الي اطمحلها…حرام انكر واهمل هالنعم الي صارت وبالعكس..تشوفي هالانجازات الصغيره تخليكي مبسوطه من نفسك وتعطيكي دافع اكبر انك تعيشي الحياه بتفاصيلها الصغيره وتقدري كل شي تسوينه لانك ماخذته بالحسبان

التجربه بسيطه …ولكن اثرها عميق…. اتمنى تجربوها ورح تشكروني وتدعولي….

بالنهايه

لاتنسوا تتابعوني بمواقع التواصل الاجتماعي

عيشوا بحب وايجابية

جرعات صحية .. مشروبات صحيه بشرب وحده ومفعول جبار wellness shots ? drink with one sip and amazing effects

السلام عليكم ورحمة الله وبركاته

تدوينة اليوم من أكثر الاسئلة الي تجيني كل مره أصور فيها لكم بالانستقرام << اذا ماتتبعيني ؟ اول تابعيني وكملي الكلام هههه .

الي أصورة لكم كل فتره وفتره .. عباره عن شي أسمه

جرعة عافيه .. أو جرعة صحيه ..

بالانجليزي wellness shot

تعريفها باختصار : عصير من فواكهه وخضار معرفين بفوائد قوية جدا .. وغالبا تكون غير مرغوب فيها لقوة مرارة الطعم .. فتعصر بكمية بسيطه وتنشرب بشربة وحده ..

المقياس يكون تقريبا مثل كمية فنجان قهوة او فنجان شاهي او اكثر شوي .. لو بتكلم بمقياس ثابت بشكل عام هو تقريبا 60 مللي

الحكمة والسبب ورا ان الناس تحب تشربها ؟؟ بدال ماتشرب عصير كامل وحجم أكبر ؟؟

  • كمية بسيطه جدا .. فسهله الشرب والتقبل
  • سهولة أخذها اي مكان
  • تحتوي على مكونات غالبا مارح تتقبلي تشربي منها كمية كبيرة
  • عصرها مركز غالبا يكون بالعصر البطيئ- ولكن مو دايما
  • تركيز الفائده من ناحيه خلط المكونات – بشرحها بالنقاط الجاية **

من المميزات الي يميز الجرعات الصحية

تكون خليط من فواكهه او خضار او مكون واحد فقط .. وتركيزه يكون عالي من ناحية الفائدة …. بمعنى في جرعة مركزة على المكونات الي فيها تكون معروفه بفائدتها الفعالة لشي معين .. مثلا جرعة المناعه بتكون فيها مكونات معروفة تدعم المناعه وقتل البكتريا وتزيد النشاط

الجرعة بتكون يا فقط مثلا فيها عصير زنجبيل .. او زنجبيل ليمون برتقال وتفاح مثلا .. وهكذا

او مثلا جرعة الجمال بتكون فيها امور تحافظ على نظارة البشرة والجلد .. فمثلا فيها شمندر جزر كركم وهكذا .. او شي منهم فقط

هل في انواع جرعات ؟؟ او جرعات معروفة ؟

  • جرعة للمناعه
  • جرعه لنضارة الوجه والبشرة
  • جرعه تساعد تحفيز خسارة الوزن
  • جرعة الشيخوخة
  • جرعة تساعد على النوم والاسترخاء وغيرهم

يعتمد على المكونات الي تحطيها .. وفي محلات عالميه مشهورة جرعاتها بسبب طعمها او الهدف من الجرعه وغيره وفي انواع ثانيه وتقدري تبتكري جرعه الخاصه كمان

نرجع ليش ما يخلوها عصير بكمية أكبر ؟ دام فيها فائده اشرب أكثر ؟؟

بيكون صعب الاستمرار لك كل يوم كميه عصير كبيره .. الجرعه حجم بسيط جدا وسهل التعود عليه يوميا

غالبا تكون بعصر بطيئ لانه عصره يركز مايكون بحراره عاليه تحرق الفوائد .. فيكون طعم العصير كانك تاكلي الفاكهه او الخضره نفسها . فتركيزه عاليه وطعمه يكون حاد او في حلاوه شوي على حسب المكونات ولكن غالبا فيه مراره .

فهالطعم مو مستحب كثير فيكون في جرعه بسيطه جدا مقبول ويفضل كثير

تجربتي مع الجرعات ؟

لي تقريبا سنه وشي … مو بشكل منتظم ولكن يعتبر مستمره عليها او ارجعلها دايما .. لان النتايج جميله ومبهرة

اشرب الجرعات على الريق دايما . افضل وقت لاحظت عليه النتايج

اول جرعه جربتها هي الكركم والفلفل الاسود لعلاج مفاصلي والام الي فيها .. تكلمت في تدوينة سابقه عنها – اقري هنا

ثاني جرعه هالسنه جربتها هي جرعه الزنجبيل والليمون .. او الزنجبيل والليمون والتفاح .. حااااااااار لازم تاخذي وضعيه الرجفه والوجه ينكمش ههههههه ولكن الفتره الي استخدمتها فيه حساسية خشمي – الزكام- و مناعتي تحسنت كثير .. بحكم اني انسانه دايم ازكم وبسرعه اتعب … لاحظت سبحان الله تحسن أحسن وكبير بمناعتي ولله الحمد اكيد بعد بركة الله ثم الجرعه

كيف سويت الجرعات الي جربتها ؟؟

الكركم والفلفل الاسود ماكان عصر .. كنت استخدم البودرة ( كركم بودرة وفلفل اسود بودرة ) مع موية واشربهم .. والحمدالله نفع معاي … ولكن اكيد لو كان مشروب بيكون افضل لان بيكون مركز وطعم الكركم عصير افضل واحلى صراحه

جرعه الزنجبيل كانت بالعصر .. مررررره سهل التحضير وماكان متعب لان عصر كمية بسيطه الي تحتاجيها ولكن !!لان تعصري المكونات بدون تخفيف فحتاجي اوقات كمية محترمة من المكونات وبتكون كمية العصير أقل بكثير من الكمية الي عصرتيها هههههه لان فكرو فيها انك تحاولي تطلعي الموية من الفاكهه او الخضره فيعتمد على نوع هالمكون وطبيعة الموية الي فيه بشكل طبيعي

الادوات لتجهيز الجرعات ؟

  • عصارة .. اي نوع تبغي سوا عصارة سريعه او بطيئة
  • قارورة صغيرة او فناجين صغيره … الا اذا تبغي تعصري كل مره تبغي جرعه فمايحتاج تحفظي كميه
  • خضار والفواكهه والخلطه الي تبغيها
  • ثلاجه او فريزر

الطريقة ؟

  • تحددي نوع الخليط للجرعه سوا مكون واحد او اكثر
  • تعصري
  • توزعي العصير بالقوارير او العلب الصغيره ا الفناجين( شخصيا بديت بالفناجين واغطيهم وبعد مااستمريت غيرت لقوارير صغيره )
  • الي بتستخدمية خلال ثلاث ايام تحطيه بالثلاجه لو أكثر تفرزية بالفريزر وقبل يوم الاستخدام تحطيه بالثلاجه يذوب لان مافي مواد حافظة فبتخرب لو طولت بالثلاجه اكثر من ثلاث او اربع ايام
  • اعصري شوي ليمون على الخليط الي عصرتيه قبل التوزيع او بعد التوزيع على كل قارورة .. الليمون يساعد كمواد حافظة للعصير
  • وبالعافيه كل يوم

بالعافيه عليكم

لاتنسوا تنشروا الموضوع للفائده وتتابعوني على الانستقرام لكل جديد

عيشوا بحب وايجابية