Month: November 2016

السلام عليكم ورحمة الله وبركاته 

موضوع هالتدوينه بيكون عن كيف اسوي مهام معينه بشكل دوري ويومي ويصير روتين بحياتي..

 اتوقع كلنا مرينا فيه وهو عدم الالتزام بشي نبغا نسويه  مثلا   حابين نشرب مويه كثير باليوم او انو ندرس الي اخذناه بالجامعه او المدرسه اول باول زي ماخططنا اول الترم او نقرا كل يوم قران والاذكار وغيرها من الامور الي حابين نسويها بس مانلتزم فيها بشكل دايم 

طبعا في ظروف تمنعنا من انو نسوي الاشيا الي حابين نسويها  واحيانا يكون مو ظروف بس يكون كسل او نسيان او زهق..وهذي امور طبيعيه تصير ولكن لازم نحاول كل ماوقفنا فتره نرجع نذكر نفسنا ونرجع نسويها 
النقاط الي اتبعها عشان ابني عاده او روتين لي  هي كالتالي: 

اولا: خلي الشي  حاجه ضروريه بحياتك عن طريق التثقيف والتحفيز 

بمعنى انو مثلا اقرا عن شرب المويه وفوائدها ، اسمع واقرا واشوف تجارب ناس مع شرب المويه ..ويكون هالتثقيف بشكل يومي خلينا نقول لمدة ثلاث ايام    لو ربع ساعه ابحثي عن  الموضوع ..لان لما تشوفين اهميه هالشي الي تبغيه من مختصين وتجارب  بشكل كثيف رح يتحول هالشي لا إراديا بنفسيتك وعقلك شي لابد منه !! فحكيون محفز لك 

ثانيا: التخطيط متى وكيف بتسوي هالشي 

يكون تخطيط سريع ماياخذ نص ساعه منك ، بس تحددي متى تسويه مثلا شرب المويه تكتبي انو كل ساعه اشرب كاسه او دايم اشيل بيدي قاروره او كل ماجلست بالصاله اشرب ..اذا كان شي مثلا كم يوم بالاسبوع زي الرياضه تحددي متى او باليوم اي ساعه !..

كمان تحددي ايش الاغراض الي تحتاجيها مثلا للمويه مطاره  او تشتري قاروره مويه من البقاله  الي بريالين كل يوم فيعني تحطي ميزانيه او للرياضه ايش الاجهزه  وكذا 

ثالثا : ابدي افعلي على طول 

هذي الخطوه بديهيه طبعا ولكن بعد ماتخططي ثاني يوم او اقرب فرصه ابدي سويها عشان مايضيع ..لان لو خططتي وخليتي الموضوع يبدا بعد شهر احتمال يقل الحماس عندك وترجعي من جديد تحاولي تحمسي نفسك

رابعا :التذكير المستمر 

هذي النقطه مهمه للاستمرار..فلازم تخلي بيئتك تذكرك مو انتي تذكري نفسك  ..بمعنى حطي قاروره مويه في كل غرفه او ع الاقل كاسه بلاستك صغيره فيها مويه عشان كل مادخلتي غرفه تفتكري تشربي ..مثلا حابه تقري قراءن  خلي بالطاوله الي جنب السرير  مصحف عشان لو انسدحتي بالسرير تشوفي القران وماتتكسلي ماتقري وانتي بسريرك 

والامور الي تسويها كم مره بالاسبوع حطي لها تنبيه مثلا بالجوال او خلي جدول في مكان واضح  عشان تشوفيها وتتذكري  

خامسا :انصحي غيرك بالشي الي تسويه 

هذي نقطه تعتبر لصالحك اكثر من انها تنفع غيرك ..لان لو نصحتي غيرك يمكن تقولك صحبتك بسوي معك فيصير تحدي وتلتزمي انتي اكثر ..كمان لما تنصحي احد وتسمعي نفسك وانتي تقولي فوائد الشي مثلا شرب المويه يذكرك انتي شخصيا لو اهملتي شرب المويه هاليوم فيصير دافع كمان لكي ..وبالمقابل كمان فدتي غيرك وان شالله تاخذي اجرهم كمان 

بالنهايه 

اتمنى التدوينة  خفيفه وفادتكم ..وجد جد هالنقاط انا فادتني بالالتزام بشكل مره كثير باي حاجه ابغا اسويها ..فشاركو هالنقاط غيركم  عشان يستفيدو 

مع السلامه