السلام عليكم ورحمة الله وبركاته
تدوينة اليوم موضوعها عن كيف اقراء الجدول الموجود في علب الأكل واختار الأكل الصح لجسمي بطريقة سهله للمبتدئين
تنبيه !! انا مو خبيره بهالمجال ولكن بحثت بهالموضوع وتكلمت مع خبيرة تغذيه وحصلت طريقه سهله ومبتدئيه لي وتناسبني كخطوة اولى لأكل صحي ونظيف وأقل ضرر
الجدول الغذائي الي موجود بالأكل يبين لنا ايش هي المكونات الموجوده بالأكل من ناحيه بروتينات فيتامينات دهون وانواعها وغيره مو كمواد او منتجات بمعنى مقادير الطبخه لان هالمقادير تكون مكتوبه تحت الجدول مثلا بيقولك طماطم سكر مويه ذره دجاج وكذا , وفي منتجات مافيها جدول غذاي ولكن يكتوب مكوناتها وجنبا النسب اذا ماكانت فها اشيا كثير على شكل كلمات وراء بعض يعني مثلا ( المكونات : سكر 2%, ماء 10%, زيت30% ) وهكذا
طيب كيف اقراء الجدول !؟
اولا: الحصة
لازم تنتبهي للحصه او الكميه الي تكون مكتوبه فوق الجدول , ليش ؟ لان كل النسب المكتوبه بالجدول عن المواد الغذاائيه موجوده بهالحصه الواحده , طيب وش يعني الحصه ؟ الحصه معناتها مثلا القطعة الوحده من البسكوت او في ال100 غرام من هالشوكلاته تحتوى على النسب الموجوده بالجدول
فمثلا لو عندك علبه بسكوت و الجدول قالك في دهون بنسبه 10 بالميه وفوق مكتوب الحصه الواحده .. معناته كل حبه بسكوت فيها 10 بالميه دهون
ليش لازم اعرف كيمه الحصه ؟ لان لو تبغي تقارني بين منتجين بسكوت والمعلومات الغذائيه مختلفه مو على طول تاخذي الي فيها اقل نسب وتقلي افيد لي طيب يمكن الحصص غير يعني تكون الي نسبتها عاليه يكون لو اكلتي ثلاث قطع عشان كذا عاليه والمنتج الثاني يكون قليل لانو تكلم عن قطعه وحده .. فمافي مساوه بالموضوع فقيسي على نفس الحصص عشان تعرفي من جد القطعه كم فيها فوائد ومضار.. وكمان تقدري تعرفي الكميه الي بتاكلينها وايش فيها فتقدري تنتبهي على كميه اكلك …
ثانيا : نوع المكونات الي بالجدول
بما انك مبتدئيه بقراءه المكونات ركزي على المواد المعروفه انها مضره وحاولي تاخذي الي يكون الأكل الي فيها نسب أقل والأكل المعروف انو كويس خذي المنتج الي فيه نسبه عاليه … بمعنى ان السكر \ الدهون \ الكرسترول معروفين انو لهم مضار ونحتاج نقلل منهم مو معناته انو باقي المواد ماهي مضره ولكن كمبتدئيه خذي المتعارف عليه بشكل اعم .. فلو شفتي سكر ونسبته كبيره معناته الاكل هذا السكر فيه كثير فنحاول نشوف شركه ثانيه فيها السكر اقل نوعا ما ..وهكذا
ونعرف مثلا انو الالياف والبروتين كويسه وتشبع الجسم .. فلو شفتي منتج فيه الياف وبروتين عاليه خذيه.. طبعا هالحركه اسويها لان لسا ماني دقيقه من ناحيه الحسابات والنسب وربطها بكميه الحصه فاخذ بشكل اعم ونجحت معاي لان كل مااجربها يطلع المنتجات اغلبها كويسه وصحيه
ثالثا: الدهون مو كلها مضره
لازم نركز شوي عليها لان مو كل الدهون ضاره ولكن الدهون المتحوله او المهدرجه هي المضره وماتسوي اي فايده للجسم بس تقعد بجسمك وتببلك مشاكل كثيره فنحاول تكون نسبتها قليله او صفر اذا امكن .. وحساب الأكل القمامي بالانستقرام غني عن التعريف بهالموضوع تقدري تشوفي الحساب وتستفيدي اكثر
رابعا : نجي للمنتجات الي مافيها جدول
.. المكونات بتكون زي ماقلت اول على شكل كلمات جنب بعض زي كانو يقولو المقادير … وعشان تعرفي ايش اكثر شي بالمنتج وايش اقل شي .. لو ماحطو نسب او شي عن طريق ان الشركات تحط الكونات الي بكميه عاليه بالبدايه ويتدرجو لين اخر مكون هو الي يكون نسبتو اقل شي بالمنتج
فلو شفتي مثلا شوكلاته بداية مكوناته هو سكر وزيت وشوكلاته… اعرفي انو السكر اكثر مكون والشوكلاته اقل شي وكذا
وبس هالطريقه خفيفه وسريعه وماتاخذ منك وقت بانك تعرفي ايش المفيد والمضر اذا انتي مبتدئيه . واكيد في مواد ومكونات كثيره بالاكل فكل فتره حاولي تبحثي عن بعض المكونات الي ماتعرفيها واعرفي اثرها على الجسم عشان تتسوقي صح…
. وطبعا لازم نعرف مو معناته اكل صحي انو لازم ابتعد عن كل الاكل بشكل مفاجئ ولكن ابداء اقلل الضرر على جسمي شوي شوي
اذا استفدتو لاتنسو تشاركو التدوينه مع الي يحبو الاكل الصحي او يحاولو يضبطو اكلهم
مع السلامه
