9 Reasons & Changes to love Healthy Lifestyle \تسع اسباب وتغييرات تحببك بالحياه الصحيه

السلام عليكم ورحمة الله وبركاته

تدوينة اليوم يمكن فوق الاربع مرات كتبتها 😂✋️ مو عارفه كيف ابدي .. ابغااشرحلكم كيف بديت مشواري او ايش صارت معاي من تقلبات ..وبرضو اضيف بالمقابل التغييرات الي حسيت فيها عشان يكون متسلسل ولكن طولت التدوينه بزياده وماحبيت ان يكون كلام يزهقكم فقررت اني اتكلم عن مشواري الصحي بتدوينة ثانيه منفصله احسن وهنا اكتفي بذكر الامور الي تغييرت معاي بعد مااتبعت نظام حياه صحي بشكل كبير …

اولا : الحياه الصحيه بالنسبه لي مو بس اكل نظيف ورياضه .. كمان هو انك تهتمي بجانبك الديني اكثر لانه يهدي النفس ويثبتها.. وكمان تغيرين اسلوب تفكيرك وتعايشك مع الحياه بشكل ايجابي وتمارسين عادات تفيدك وتشغل وقتك بشي مفيد او مسلي…

نجي عند التغييرات الي صارتلي بعد مااستمريت بشكل اكثر من اي وقت سبق لي (بالنسبه لي ) على نظام حياه صحي ..

١- جسمي يرفض اي اكل غريب

بعد تقريبا سنه ونص من اكل صحي بشكل كبير ماانكر ايام واسابيع تجي اكلي مره مخبص ولاشي صحي هههه.. ولكن هالفتره بنسبه كبيره كان نظيف اكلي… كل مااخبص اكل سوا من برا او اكل بيت بس كثييير او حتى لو صحي بس كثرت اكثر من طبق سوا.. لازم وانتو بكرامه ادخل الحمام!! مو استفراغ! الشي الثاني هههههههه… يعني بشكل مستمر ولاحظت هالشي يعني اوقات اعرف اني باكل وبدخل الحمام !!..

شي حلو اني بديت الاحظ ان جسمي حب اسلوب الاكل النظيف والمفيد.. وشي يقهر ع فلوسي الي تروح ع الفاضي هههههه…

٢- نشاط اكثر

كل مايكون نظام يومي مرتب وفيه جانب ديني انجزته / وحركه اكثر/ واكل مفيد / وانجاز .. يكون عندي نشاط وحركه وخفه اكثر من اي يوم ثاني اوقات مايكون انجاز كبير يعني اوقات يكون انحزت اني طبقت ملابسي! بس يومي مارح ع الفاضي او قريت كتاب او كتبت مدونه وهكذا ولكن ماضاع كل يومي ع السدحه والجوال .

وبسبب الاكل النظيف الخمول نادر مايكون الا اذا كان بسبب النوم الملخبط احيانا ! ولكن مااحس بالتخمه الي احس فيها عاده وقليل صارت السدحه والتعب الي بدون سبب

٣- احب نفسي اكثر

للامانه حتى لو مانقص وزني ! تتغير نظرتي لنفسي لما اكون متبعه نظام صحي… احب نفسي مدري ليه هههههه .. يعني عادي اكون قبل فتره اشوف جسمي مايليق ملابس وقصات معينه وبس اتبع اسلوب صحي اصير احب البس واجرب واشوفني حلوه وجذابه مع ان مافي تغير هههههههه بس روعه هالشعور وتؤمنين فيه ومن جد تسوفين نفسك بشكل مختلف واجمل… هذي يمكن اهم سبب خلاني استمر وهو نظرتي لنفسي..لان خلاني مااهتم كم يوم لي اتبع هالنظام او كم يوم اسوي رياضه قد مااني ايغا استمر لاني مبسوطه ع نفسي واحب هالشي وهالشعور بالثقه والراحه …

٤- اتذوق بشكل ادق !

انا مو من النوع الذويق بالاكل والي يقولك ناقصه ملح او سكر الا اذا كان بزيااااده يعني مر اي اكيد بعرف!! بس مو فنانه باني اعرف ناقصه شي بسيط او شي بيعدل الطعم ولكن مع كثرت اكلي الصحي وتجاربي.. صرت لما اكل اكل دسم او حالي.. احس بانه فرق علي بالطعم مع ان هالاكلات زي ايس كريم / ورق عنب وشوكلاته مو غريبه علي ولكن انتبهت ع كثرت الدسم فيها او الحلى الي فيهم لاني مقلله فتره !وحسيت بانها ثقيله او تشبع اسرع من قبل

٥- اجوع اكثر بس وقت التخبيص!

لما اخبص اوقات اكلي او طبيعه اكلي تتغير بمعمى اكل كثير بالغدا واخبص سناكات بالعصريه او اكل مكسرات وحلى بالليل .. او مثلا طول اليوم مااكل الى وجبه اصير فجاه اكل كثير بهاليوم او ابغا شي بس اكله وفجاه احس اني جيعانه بزياده مع اني اكلت اكثر من الايام الباقيه بس خلاص احس اجوع وبس ابغا شي بفمي.. وثاني يوم اكييييد البطن تعور والنفسيه مو حلوه وثقيله

٦- منفتحه للاختلاف والنقاش مع الناس!

بسبب اني اقراءه واتعلم واسمع لناس مختلفين لاني حابه اغير حياتي واستفيد من تجارب غيري وكمان لاني احاول استمر ع الادعيه والاذكار اليوميه قراءه القران.. ففي صار نوع من انواع قبول للاخر وللاختلافات .. واحترام الغير ورايء الغير.. حتى لو ماكان اهل بانه يعطيني النصيحه .. ولكن مو معناته ان نصحيته مو صح لان ياما فقراء حكماء وياما كبار عندهم حكم وعلم تنفع لاي جيل واي مكان .. فصرت احب استفيد من اي احد واحب اسمع لاي احد لان ماتدرين وين الحكمه والمعرفه والنصحيه بتجيك !

٧- نفسيتي احلى!

طبعا النفسيه تكون عالي العال لما اسوي رياضه خاصه ! صح وقت الرياضه تكرهين كل شي ولكن بعد الروقان وتاكلين وجبتك تحسين فجاه بنشاط وحيويه وكمان نفسيه مرتاحه ومبسوطه واوقات ايغا اسوي رياضه مو عشان الجسم عشان ابغا النفسيه الحلوه. ههههههه

طبعا اهم شي ريح نفسيتي ومخي .. كثرت الحمد والشكر ! بشكل كبير لاني اخذ من وقتي ثواني استشعر ابسط النعم واصغرها !! يعني عندي بطانيه تدفيني/ اقدر اغمض عيني بدون مساعده/ عندي مويه متى ماعطشت/ عندي كهرباء مااشيل همها/ ماصار لي مشكله اليوم ..الحمدالله الحمدالله الحمدالله واوقات صح مااستشعر النعم ولكن اقول الحمدالله ع الامور والنعم الي مااعرف عنها.. يخلي نفسيتك اهجد واروق من اول ! وكل مشكله تصغر شوي او تهدا عليك …

٨- السلبيه خفت (حلطمه /نكد/زعل الخ)

وهذي النقطه مكمله للنقط السابقه ! لان روحي مرتاحه / ونفسيتي حلوه/ وجسمي خفيف وبدا يكون صحي .. اكيد بتخف عندي السلبيه وتزيد الايجابيه ويصير كمان ابحث عنها واحاول اكون محاطه فيها اكثر يعني اتفرج ع ناس تبسط … انا اغير المكان الي يزعلني ويضايقني… اقرا كتب عن السعاده ..وكل ماكنت سلبيه رح الاحظ اني بجو مو حلو ومزعج واحاول اتعدل واتغير عشان اطلع منه ..

بالنهايه

هالامور بعضها تقدري تحسينها خلال اول اسبوع.. وفي ناس اطول .. المهم كلها ترجعلك بفايده . وكلها امور جوهريه ! وتعطي ثقه وحماس وحب للحياه .. اتمنى فادتكم وشاركو التدوينه غيركم عشان يتحمس يبدا حياه صحيه …

وعيشوا بحب وايجابية

img_3789

Advertisements

شاركوني أرائكم

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.