كيف تكوني روتينك صباحي الخاص فيك how to create your own morning routine

السلام عليكم ورحمة الله وبركاته

بدخل على طول بموضوع هالتدوينة  وان شاء يكون مفيد لكم  وخاصه الجداول الجاهزه باخر التدوينة . وكمان في موضوع خاص للروتين المسائي وكيف تسوينوا وبرضو له جداول جاهزه لكم  قريبا رح انزله باذن الله   .

img_0262

لازم تعرفوا ان هالموضوع مو جديد علينا .. كل امهاتنا والكبار الي حولنا يسونه من زماااان ولكن اغلبهم مو مسجلينه كتابه .. ولاحظوا  هالشي فيهم خلال بداية اليوم  بعد ماتعرفوا الموضوع بهالتدوينة

اولا : ايش معنى روتين ؟؟ بدون تعريف لغوي بحت .. ولكن المفهوم العام هو أمور معينه  تتكرر بشكل دوري  \ بشكل يومي \ بشكل مستمر ولاوقات او فترات معروفه ..

ثانيا : أهمية الروتين ؟؟ ايش يفيدنا فيه ؟ … يساعدك تكوني عادة .. حابه تتعودي تسوي شي معين دايما ؟او شي حابه تحقيقية عشان يخف عنك ومايتراكم … ف  ابدي  خليه روتين في حياتك  بمعنى كرريه دايم ولفتره مستمره و بأذن الله تبدا تصير جزء من يومك وشي طبيعي وماتحسيه شغل او مهمه ..

والروتين الصباحي أهميته ؟ انه يبني بداية يوم  ممتعه ومريحه وتعطي طاقة  وترتيب لليوم كله باذن الله .. وبرضو لما تكوني بفتره ملخبطه ولا منجزة .. ويكون عندك روتين خاصة صباحي  تقدري ترجعي ترتبي يومك بشكل اسرع  ..

ثالثا : بقلد روتين أحد  ثاني بدال ما اسويلي روتين خاص ؟ اذا يناسبك والاهم يناسب طبيعة يومك ونفسيتك .. فابدي سويه ليش لا  . بيكون أسهل  لانه جاهز ومرتب وموزع خلال اليوم او الاسبوع او الشهر … تقدروا تشوفو يوتيوب – مدونات – ومشركات الناس بالبينترس

نجي للي تبغا تسوي جدول روتيني خاص فيها ويناسب وضعها ( من خلال مسوؤلوياتها – ووقتها – وشخصيتها -والاهم  هدفها) والموضوع بسيط جدا … يلا نبدا

اولا : خذي فتره لاحظي يومك كيف يصير ؟ اسبوع اقل شي 

…. بمعنى عيشي يومك عادي بكل تفاصيله بدون ماتسوين شي اضافي  بس لاحظي وقتك وين مزدحم ووين فاضي ..  متى تنامي وتصحي .. كيف مسوولياتك وغيرها  ..  وسجلي  باختصار كيف يومك وايش الي لازم كل يوم يصير والي متغير والخ … بسس تعرفي وضعك .. وبعد هالفتره التجريبية  . ركزي اهم شي عن بدايه يومك  دام اننا نتكلم عن روتين صباحي فقط …

ثانيا : حددي ايش المهام  الي تسويها  ولازم تسويها بدايه كل يوم  في كل المجالات بحياتك  ؟

يعني مثلا كطالبة اول شي لازم تسويه هو تتجهز للمدرسه – تفطر  -تروح المدرسه … للأم يكون تسوي فطور لعيلتها – تصحي العيال  للمدارس – تسوي جزء من ترتيب البيت وتنظيفه  …  كموظفة بيكون تتجهز  للدوام – تفطر  تروح الدوام

يمكن للبعض او للاخرين في أمور اكثر او أقل أو غير  لازم تتسوى اول ماتصحى … سجليها  كمان عشان ماتهمليها

وهالمهام تكون ضمن الروتين الصباحي وناخذها بعين الاعتبار .. اذا ماعندك مهام وصباحك مافي شي تسويه   النقطة الثالثه ابدي فيها

ثالثا : ابدي اكتبي مهام او اهداف حابه تسوينها بحياتك .. وحددي الي يمكن تنفيذها بالصباح او يفضل تسويها اول شي وترتاحي منها  

مثلا  حابه تسوي رياضه  واغلب الناس يخلونها الصبح  اول مايصحو عشان لا يكسلو بنص اليوم او بالاخص  يسحبوا عليها ..

 .. مثلا قراءة كتاب او الالتزام بقراءة القران كل يوم او الاذكار .. حلو تخليها بدايه اليوم عشان تبدي يومك بهدوء وكلام ربك …. ايضا الامهات او المتزوجات يقدرو يخلو الغسيل او تنظيف غرفة معينه او ان يخصصوا وقت الروقان والهدوء يكون بدايه يومهم بدال مايكون كله شغل البيت والعيال  وهكذا

 ايضا مثلا تخفيف استخدام الجوال … تقدري تنفذيها ببداية اليوم ويكون صباحك خالي من الجوال .. افضل من نص او خلال اليوم . وهكذا اكتبي اهدافك وشوفي الاهداف الي تقدر تخلصيها بصباحك عشان باقي يومك للامور والالتزامات الاخرى

المهم في هالفقره ان المهام والاهداف تكون لمجالات مختلفه عشان تعطي كل ذي حق حقه .. يعني  شي لدينك وشي لصحتك وشي لنفسيتك وروقانك  وشي لشغلك وشي لبيتك وهكذا  عشان هالمجالات كولها رح تخليكي اهدى واروق وانشط ويومك يكون مرتب باذن الله

رابعا : لازم يكون الروتين مهامه خفيفه  لااااااااااااااااازم خفيفه للاستمرار 

يعني مافي مشكله يكون اكثر من مهمه تسويها وتبغي تحققيقها الصباح ولكن لازم تكون خفيفه   واغلبها لصالحك ولترتيب يومك ونفسيتك وتخفيف الحمل عن باقي يومك او تجهزك ليومك المزدحم …

المسوؤليات الثانيه او الاشغال سوا متعلقه فيك او في غيرك هذي تصير بعد الروتين الصباحي حقك  مثل دراسه شغل عيال او بيتك ولها جدول وتنظيم خاص .. روتينك الصباحي والمسائي يكون لتهيئتك لليوم  او لراحتك بعد اشغال اليوم 

خامسا : اكييييد مو كل يوم تقدري تطبقيه .. فكوني مرنه واستمري قدر الامكان 

لازم تعرفي ان الحياه متخبطه ومفاجئة .. يعني تجي ايام نومنا يتلخبط … عندنا التزامات أكثر ..  مالنا نفس نسوي الروتين والخ من الاسباب .. ولكن رح تقدري تطبقيه أغلب الايام او أكثر من الايام الي ماتطبيقي فيها .. وايضا كوني مرنه لو ماسويته اليوم .. بكرا ان شالله ارجعي طبقيه .. او اوقات بتطبقي بعض من الروتين والأخر لا . هذا طبيعي .. اهم شي الاستمرار بالمحاوله !! الاستمرااار والمحاولة

اخيرا : بشاركم روتيني الصباحي اليومي  ..

بالنسبة لي حبيت اهتم بامور الصحه او المهمه لصحتي اول مااصحى او على الاقل جزء منها .. او الي تضيف لصحتي ويومي

فمثلا اول مااصحى ارتب الغرفه ترتيب سريع مره … اقراء قران واشرب مويه ومشروب الكركم وحبه سودا .. كمان احاول اقراء كتاب لو صفحه  و اسوي امور متعلقه بالبيت مثل غسيل ملابس  ولو في مجال رياضه  وبعدها اكل فطوري ..وهكذا 

هل دايم اسويه على هالترتيب او انجز كل هالامور  ؟؟ لاااا طبعاااا  كثير ايام واسابيع ماتجي على الترتيب الي ابغاه او انجز كل هالامور .. خاااصه التنظيف حق البيت والرياضه .. شي طبيعي لاننا بشر ولنا ظروف .. ولكن في امور نوعا ما اقدر اقول صارت روتين مثل ترتيب السريع والقراءن وشرب المويه والمشروب ولله الحمد ….

فهذي هي المجالات الي مهتمه فيها   وطبعا كل  وحده لها مجالات مختلفه او اكثر على حسب وضعها 

و لكن هالروتين جدا يخلي نفسيتي سعيده وابدي بداية هادية ليومي ولله الحمد

شاركتكم ملف جاهز بجدول روتيني الصباحي اذا حابين جدولي هذا او حابين تكتبي جدولك الخاص برضو فيه ملف جاهز بدون مهام مكتوبه  عشان تضيفيها بنفسك واتمنى تعجبكم 

morning routine (1)جدولي الخاص لروتيني الصباحي

Copy of morning routine جدولي الخاص (فقط بالمحاور) وجاهز للتعبية

Copy of morning routine (2) جدول الجاهز لك للتعبيئة للروتينك  الصباحي

بالنسبه لجدول التعبيئة اخر واحد  خلتها فاضي و(بالجهه العربيه ) مثل ماقلتلكم على حسب مجالات كل وحده  .. عشان تضيفون براحتكم وعلى  كيفكم

ولا تنسوا تشوفوا تتابعو المدونة لموضوع كيف تسوي روتينك المسائي

بالنهايه

اتمنى أستفدتوا من هالتدوينة .. وتفيدوا غيركم أكيد من خلال نشرها …  وتعابعوني بحساباتي الاجتماعية …

وانتوا ايش هوا روتينكم الصباحي ؟

عيشوا بحب وإيجابية

img_3789

Advertisements

1 Comment »

شاركوني أرائكم

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.