كيف اختار الحياه الصحيه الي تناسبني ؟ how to choose the best healthy lifestyle for me ?

السلام عليكم ورحمة الله وبركاته

موضوع اليوم دردشة وكمان توضيح للبعض عن الحياه الصحيه والنحفان وخساة الوزن او زيادته والرجيمات وغيرها بس بشكل مختصر وسريع

ولله الحمد دحين بشكل كبير مفهوم الصحه والحياه الصحيه أخذ مساحه كبيره وصارت المعلومات قريبه للعامه .. وبسبب انه علم ( الصحه) ففيه مختلف الاراء والدراسات والميول

الي لازم تعرفوا << طبعا اولا انا مو مختصه .. انا فقط مهتمه واحاول اطبق الحياه الصحيه ولي محاولاتي من نجاح او فشل .. ولكن كمطلعة بهالمجال أقدر أقول التالي …. :::وهو

اولا: في انواع وأساليب للأكل كثييييير تحت مسمى الأكل الصحي !! مثلا في نظام الاكل باعتدال (اغلبه صحي والباقي على كيفيك ) ونظام الكيتو وقليل النشويات والنباتي الكلي والنباتي الي يأكل من مشتقات الحيوانات و نظام الصوم والخ والخ ويمكن داخل كل نظام أساليب مختلفه او توصيات مختلفه من كل مختص ومجرب

ثانيا : الرياضة برضو تندرج فيها رياضات مختلفه مثلا الهوائية و المقاومة وذو الضغط العالي او الضغط المنخفض والبيلاتيس واليوغا ورياضات مائية والخ والخ وتحت كل رياضة فيها تمارين مليااااانه وحركااات كثيره تختلف وبرضو توصيات كثيره ومتعدده من كل متخص ومجرب

ثالثا : دام انه علم فبيكون في تجارب وهالتجارب بتختلف ونتايجها بتختلف على حسب كل تجربه ووضعها .. يمكن اشخاص يمدحون النظام النباتي وبعضه يذمه او بعض يركز على بناءالعضلات والرياضه وبعضهم مايشجع التركيز على الرياضه .. يمكن البعض يمدح وياكد فعاليه أكل معين ونظام معين ولكن يضبط مع ناس ونا س والخ

ففيه كثير من الاراء زي اي علم بالدنيا

رابعا : الشي الوحيد المتفق عليه ان الي تسوينه وتطبقينه المفروض ولازم مايأثر بشكل سلبي على صحتك .. من ناحيه يخلي في أرق وتعب ومشاكل صحيه << اذا رح يعتمد كأسلوب حياه لفتره طويلة

خامسا : كل شخص رح تكون نتايجه غير عن الثاني !! فمو شرط اي شي ينصحو فيه جسمك يتقبله .. فهو كل بالتجربة والنتيجه اهم شي مايكون حاجه متفقين على ضررها الجميع وتسوينه لان هنا غلط ..وخطر

سادسا : لما نقول اسلوب حياه !!!!!! معناتو أسلوب تقدري تعتمديه لفتره طويله بحياتك مو رجيم قاسي لفتره معينه << هذا لاهداف معينه ولفتره بسيطه وفي أنظمة حياتيه تغني عن الريجيمات القاسيه ولله الحمد … هنا نتكلم نهج تحاولي تعتمديه لفتره طويلة

سابعا : نرجع لموضوع الرياضه .. الاساس هو ان في رياضات هوائية – ترفع نبضات القلب – تساعد حرق الدهون وتقوية القلب … ورياضات مقاومة -تشد وتقوي الجسم – تساعد على تخفيف الترهلات وشد الجسم وتقويتة من ناحية العضلات …. فركزي بالاثنين … في رياضات كثيره تجمع مابين هالاثنين وفي كثير مدربين يصممون تمارين تجمع مابين رفع دقات القلب وشد الجسم مع بعض بدال ماتسوي رياضه وتمارين هوائية وبعدين تمارين مقاومة

طيب كيف اختار نوع حياه صحية يساعدني احقق اهدافي الصحية ( خساره وزن – لياقه – حياه هاديه – تحسين البشره والخ )

لازم تقري وتسوي الي عليكي من مجهود من خلال البحث والبحث لازم يكون من الجانبيين ( من مختصين ومن مجربين ) … وشوفي مين اكثر شي الهمك وحبيته وعجبك وابدي جربي لفتره .. وشوفي هل ناسبك او لا

يمكن مايناسبك بس مو شرط لانه مايناسبك !!! يمكن يكون غلط منك من ناحيه انك ما اخذتي بالحسبان وضعك ومسووليات او ماقدرتي توازني .. بمعنى تقولي بسوي زي رياضة هالبنت ( البنت تسوي ساعه رياضه بالصبح ) وانتي عندك دوام وماتبغي تقومي ابكرعشان تسوي الرياضه هذي … فبعد فتره تقولي مايمدي أسوي زيها ومايناسبني ساعه بالصبح !!

مع ان بيناسبك لو ناسبتيه لوضعك .. مثلا تصحي بدري لو مره تبغي تسوينو او تسوي هالرياضه بعد الدوام .. او تسوي جزء بسيط من هساعه التمرين .. وتشوفي هل ناسبك الحين او لا … بالمختصر جربي ولكن حاولي تدمجيه بحياتك لان كل واحد له نظام حياه ومسووليات واوقات مختلفه ولكن اعمل بالاسباب وبعدين شوف هل يناسب او لا ..

او مثلا تسوي نظام قليل بالكربوهيدرات – النشويات – وانتي مررره تحبي هالشي … وماعندك إراده قوية . فاكيد بتتعبي وبتشوفي ان هالنظام ماهو أسلوب حياه وغلط << ولكن بالحقيقه ماناسبك بسبب وضعك انتي وشخصيتك .. مو لانه غلط … فبعد كذا تعتمدي أسلوب ثاني وتجربي او تحاولي شوي شوي تطبيقي هالنظام

بالرياضه ؟ مافي شي اسمه هالحركه بس رح تعدل وتبني عضل لهالمكان .. في تمارين متنوعة ومختلفه على حسب مرونتك وهدفك ووقتك المتاح للرياضه وكمان على حسب وضعك الصحي … فلا تسو شي وماناسبك وتقولي ماينفع اسوي وخلاص .. ترا الرياضه يعتبر كوكب معلومات وتمارين مختلفه ومتنوعة . الي عليكي هو انك تقري وتبحثي وتجربي لين تشوفي الي يريحك ويشجعك تسويه

طيب يعني مااشترك مع دكتور تغذيه او مدرب ؟؟؟؟؟؟؟ اذا بجرب

طبعااااااااا شوفي دكتور ومدرب لو عندك القدرة الماليه انك تشتري مع أخصائي تغذيه ونادي ومدربين .. حلو ومره كويس لان رح تكوني مع شخص بخبرته وتجاربه المختلفه والحمل الاكبر مابيكون عليكي بيكون عليه عشان يشوف الي يناسبك سوا كانت دكتورة او دكتور << مافي عنصريه هنا ههه ..

ولكن اعرفو ان زي ماذكرنا اول حتى الدكاتره مختلفين بأرائهم وطرقهم وجداولهم … فجربو الي ينصحوكم فيه واذا ماناسبكم (يمكن يكون انتي مالك خلق تبذلي جهد اضافي وتتعبي ع نفسك فيكون الغط منك او من جد ماناسبك وأثر عليكي بشكل سلبي والدكتور مو قادر يكونلك نظام يناسبك ) فدام كوني صريحه معاهم عشان يصمموا و يغيروا النظام ويكون شي يناسبك .. او شوفو شخص ثاني واقروا عن مسيرته وتوجهه الصحي عشان هل يناسبكم او لا

لان برضو في دكاتره نتفق معاهم بناء على الي نعرفه او نصدق انه صح وفي ناس نعارضهم بناء عى ثقافتنا مع بالضرورة انهم غلط

بالنهاية هالمختصين رح يساعدوكم ويوجهوكم ويرشدوكم بالمسيره بشكل شخصي على حسب وضعكم النفسي والصحي والجسدي فاكيد بيفيدكم سوا تغذيه او رياضة … ولكن الي مايقدر يوفر ثمنهم يعتمد على البحث المستمر والتجربة

وكمان دحين بدت كثير مواقع عربية ودكاتره ومختصيين عربيين يشاركوا معلومات للعامه وإشتراكات رخصيه خاصه الي تكون بالانتريت

بشاركم بعض المواقع والحسابات الي اتابعها

دايت نينجا

جيم نادز

ومضة للتدريب

دكتورة شيماء

انا !! هههههه

بودرويش

عبير الشطي

وقتي فيتنس

بيوريفاينق – حساب ومتجر للتحفيز لحياه نقية وصحية

بالنهاية

كلنا برحله لصحتنا البعض تكون طويله جدا والبعض بتكون سريعة .. فخليها اسلوب حياه عشان ماتزهقي … ودايم شجعي غيرك لا تحطموا بعض … وشاكوا هالتدوينة لغيركم عشان يتحمسوا

عيشوا بحب و|إيجابية

عنايتي الجديدة هالسنه 2019 و1440 my skin and body care routine 2019

السلام عليكم ورحمة الله وبركاته

تدوينة اليوم ماتوقعت أبدا اني رح أكتب هالتدوينة لكن موضوعي شوي لروتين يومي مع عناية .. طبعا الي يتابعني بالانستقرام والمدونة يعرف اني أحب اتغير واضيف لحياتي ولكن مااحب يكون بكم كبير وياخذ وقت طويل … احب يكون سريع عشان ما أمل منه واستمر

اذا انتوا زيي ؟؟؟ ياااااهاللللللن هالموضوع لكي ههههه

طيب ايش العناية بالنسبة لي ؟؟ اولا ماهي بس كريمات والخ .. هي عناية بجسمي وكمان بمخي ونفسيتي ويومي … وبرضو فيها مساعدة لتحقيق اهدافي

طيب هذا كولو كم بياخذ وقت ؟؟ دقاااااااايق اغلب الروتين والعناية الي اسويها تاخذ ثوووواني ولله الحمد الا بعض كم شغله وتصير هذي أصلن كل اسبوع مره او بين فتره وفتره ع حسب وضعي

نبدا الموضوع

انا حاليا ملتزمه من قبل هالسنه بهالروتين ,واذا تبغوا تعرفوا كيف تسوي روتين خاص فيكي وجدول مجاني نفس حقي << تدوينة كيف تكوني روتين خاص فيكي …. ولكن ضفت بهالتدوينة عليه امور زياده … وشخصيا احب الامور الروتينيه تكون ببداية اليوم ونهاية عشان وسط اليوم يكون لامور الحياه والتزاماتها وأشغالها المتغيره

روتين الصبح هو كالتالي :

عسل وحبه سودا – او تمر وحبة سودا <ملعقة صغيره

حبوب فيتامينات >ابدا مو ضروري ولكن كزياده تغذية < من حساب ” بيوريفانيق

كاسة موية وقبل لا يخلص الكاسة احط كركم وفلفل أسود مو يوميا ولكن كل كم يوم >> تكلمت عن هالموضوع بهالتدوينة ” تجربتي مع الكركم لعلاج الالام المفاصل

هالامور تتسوا بثواني كلها … يعني تخيلو تسوها كلها ورا بعض وسريعه .. وهذا الي اسويه لجانب الصحة …

لجانب النفسية والراحة كالتالي :

ارتب السرير والغرفه بشكل سريع > اسوي هالشي اول مااصحى < . مو ترتيب وتنظيف !! بس ارتب السرير واي شي بالغرفه مكركبر زي ملابس اعلقها او اكياس اطلعها بره الغرفه عشان تكون المنظر العام مرتب << هالحركه تخلي المخ سبحان الله يصحصح اكثر ونفستك تتنشط لان المخ والنفس رابطه السرير بالكسل والخمول فلما ترتبيه الوضع يتغير من نوم الى صحصحه ونشاط جربوها فتره وادعولي

صفحه قران او كم أيه .. وأذكار الصباح – مو لازم كل الاذكار لو واحد او ثلاث أذكار بسيطه اعتمدوها < لان فيها دعوة لك وليومك ولربك ولاخرتك وحياتك

لجانب حياتي وشخصيتي كالتالي :

اقراء صفحة كتاب او أسمع موضوع بالبودكاست << في موضوع بالمدونه عن ايش البودكاست وبعض البرامج الي أحبها وبزيد عليها ان شاء الله قريب برامج ثانية …” أفضل برامج بودكاست احب اسمعها

بالنسبة للكتب اشارك كل جديد “بالانستقرام وبعدين احط لكم ملخص لو حبيتو

هذا الامور كلها احاول اسويها يوميا اول مااصحى او خلال بداية اليوم .. ماتاخذ وقت كثير لان كلها دقايق … بس جدا احسن انجزت لما اسويها وهي جدا بسيطه ولكن الاستمرارية تضيف لك كثيييييير

نجي للعناية الي مو كل يوم وهي كالتالي :

شعري ؟ بديت اسوي حنه وعليها وصفة يسموها وصفة دكتورة هند << ابحثوا بالانستقرام كثير يتكلمو عنها انا اختي قالتلي عنها صراحه فما اعرف حساب هالدكتور .. … كل أسبوع مره او كل اسبوعين مره … الى الان تقريبا لي أربع مرات مسويتها .. احتاج استمر كمان عشان اقولكم تجربتي كامله

ولكن الى الان اللون الي عطاني مره يجنن وكمان النعومة مره حلو .. ولكن لعلاج التساقط والنفشة والجفاف لسا ماقدر اتكلم فيه احتاج وقت أطول كمان

وبالنسبة لشعري اعتمد طريقه لغسله ذكرت بالاسلام جدا حسنت شعري وقللت التساقط اذا حابين اشاركم هيا بتدوينه سريعه اكتبولي بالتعليقات

جسمي ؟ بحاول التزم فتمشيط الجسم وكمان الترطيب بعدها الي كنت استمر عليه وقطعت للاسف بحاول ارجع اسويه … جدا عجيب ويعطي نشاط فضيييييييع << موضع التدوينة “فوائد تمشيط الجسم

والفرشة وزيوت الترطيب بتحصلوها بحساب” بيوريفاينق

كمان الرياضة .. شهر ديسمبر سويت تحدي جدول ديسمبر حق كاسي هو وكثير قالوا اني تغييرت ونحفت .. وشاركت تجربتي وحساب الرياضه ومقاساتي والنتايج بهالتدوينة << “نتايج تحدي ديسمبر …. طبعا بعد هالشهر الى الان اعطيت نفسي راحه هههه بس برجع اسوي تحدي يناير حقها ان شالله .. لان احب ان اغلب الرياضه بدون اي ادوات

كمان ابغا اسوي حمام مغربي كل اسبوع او كل كم أسبوع .. ودي مرررره الي يعرف كيف الطريقه الصح او عن تجربة شاركوني هيا .. وكمان اتعلم اغسل وجهي مضبوط بعد المكياج لان اوقات كثيره للاسف امسح المكياج بالمنديل وزيت وثاني يوم اغسل وجهي فاحتاج اهتم اكثر لان بشرتي حساسه أصلن فيطلعلي حبوب وتصبغات احيانا

بالنسبة لروتين المساء ماسويت للحين او التزم بشكل جدي بشي معين فلسا بشاركم لما يصير في نوعا ما روتين فعليا .. ومثل ماذكرت ببداية التدوينة .. لو تبغي تكوني روتين خاص فيكي بدون تقليد أحد عشان يناسبك >> تدوينة كيف تسوي روتين خاص فيكي

بالنهاية

اتمنى عجبكم هالموضوع وكمان شاركوه لغيركم يمكن احد يتحمس معنا ويستفيد .. وتابعوني” بالانستقرام ليومياتي الصحية ورحلتي الصحية .. وحساببيوريفاينق للتحفيز و الحصول على منتجات صحية

عيشوا بحب وإيجابية

اهداف لازم تسوينها بالسنة الجديدة 2019 1440 / goal must be done in 2019

السلام عليكم ورحمة الله وبركاته

تدوينه اليوم ان شاءلله يارب تكون تحفيز والهام ومساعده لكل شخص يبغا يتغير ويحسن نفسو للافضل وكمان يحقق ولو جزء من احلامو..

طبعا مو لازم تبدوا بس بدايه السنه تفكروا تشتغلو على نفسكم..اي يوم جديد هو بدايه لفرصه جديده استغلوها وكل مافشلتو حاولو تتعلموا وتحاولو من جديد…

img_1027

هالتدوينه بكتبلكم بعض الامور او المجالات الي لازم الكل يركز عليها ولو بجزء بسسيط لانها اساس كل شي والاهم لحياه باذن الله سعيده ومريحه واساس قوي لكل الظروف

اولا: صحتك ..

اختاري هدف بسيط تبدي تسوينه لين تتعودي عليه وبعدين اضيفي هدف ثاني..مثلا انا بديت من فتره بس اوقف المشروبات الغازيه وباقي اكلي عادي اطلب من الوجبات السريعه وغيره..لين لما صار عادي جدا مااشرب هالمشروبات ولا اطلبها بديت اضيف هدف ثاني  وهكذا..عشان تكون عاده واسلوب حياه ..

فاختاري شي بسيط واستمري عليه

ثانيا: دينك ..

مابتكلم من جانب حسنات وسيئات او ذنوب ومعاصي وطاعات.. بتكلم من باب ان الدين كتاب وموسوعه للتعايش مع الحياه..بالقران والسنه ذكروا كيف نتعامل مع الزعل والعصبيه والناس والحياه والمصاعب والرزق وغيره.. فاستغلي هالهبه العظيمه انك دايم تقري بدينك على الاقل لو كل يوم صفحه من القران او ذكر او اثنين تعتمديه كل يوم تقولينه  وتتمعني بكلامه ..

وبتحصلي دايم كل مره نصحيه في دينك وكلام ربك عن كيف تعيشي حياتك.. رح تشوفي قد ايش متصالحه مع الحياه بتكوني وتحبي تعيشي ويقويكي وقت الازمات والظروف.. ويخلي عندك اساس قوي يحميكي اهم شي من المشاكل والامور الغلط بالحياه قدر المستطاع..

ومهما كانت ذنوبك ومعاصيكي دامك مؤمنه بوجود ربك ..باذن الله بيغفرلك وهو موجود عشان يساعدك ويعلمك ويقويكي .. 

ثالثا: نفسك..

“إنَّ لِرَبِّكَ عَلَيْكَ حَقًّا، ولِنَفْسِكَ عَلَيْكَ حَقًّا، ولأَهْلِكَ عَلَيْكَ حَقًّا، فَأَعْطِ كُلَّ ذِي حَقٍّ حَقَّهُ”.

 .  الحديث سبحان الله وبديع وصفه عطانا مختصر الحياه وهي الموازنه . وبالنسبه لنفسك معناتها ترا روحك وجسمك ربنا بيحاسبك عليها ولازم تعطيها حقها.. حقها مو بالدلع والاهتمام والبسطه (مع انهم مهمين كمان ولاتهملي هالجانب وحاولي تبدي تدلعي نفسك ولو بشي بسيط مثلا تتعطري كل يوم او تسوي مناكير او تلبسي شي حلو كل يوم)..ولكن كمان تعلمي نفسك انها ماتزعل من الناس دايم او على كل شي.. لا تنقهر لا تتهاوش لاتكون ضعيفه ولا تكون قويه بقسوه والخ ..

خليكي حنونه على نفسك ومشاعرك وجسمك ولاترضى عليها .. طبعا مو معناته لاترضي عليها الزعل انك تتزاعلي مع الناس الثانيه لو ماعاملوكي بالشي الي تبغيه ههههه ..لانك ماسويتي شي الا زدتي مشاحنه..ولكن لاترضى عليها تتعود تشيل حقد وزعل ودايم خليها متسامحه وطيبه والاهم حسن الظن عشان تكون روح مرتاحه والاهم مرنه مع الاحوال و اطباع الناس

رابعا: الاهل والاحباب والناس عامه

تابعه للنقطه الثالثه والاكيد من ضمن الحديث السابق 

الحياه اجتماعيه ..ماتقدري تعيشي بدون اشخاص سوا اقارب ولا موظفين ولا ناس يبنوا بلدتهم بخدمات وصناعات عشان تحبي هالبلده وغيرها ..كولنا معتمدين على بعض .. فلاتخسري الي حولك ..وتعاملي مع الكل بمحبه وبساطه وتواضع ..لان كولنا نحتاج لبعض. ورح تدور الدنيا فماتدري من كان صغير وكبر ومين كان كبير وصغر .. فاستثمري بعلاقاتك ومعارفك وحتى الي تقابليهم مره

وعادي كلنا رح تمر علينا اوقات نتهاوش معاهم ونزعل منهم او يكون في مشاحنات ولكن نحاول بسرعه نتصالح وبسرعه نتسامح ونتفاهم لان الحياه ماتسوى تشيلي  ضغينه على أحد 

خامسا: مهنتك او شغفك

سوا بتشتغلي او لا.. اشغلي وقتك ولو بشي بسيط.. تثقفي / ادرسي/ اقري / تعلمي / واكبي المعلومات والمعرفه الجديده او حتى ممارة هواية .. الغرض استغلال الوقت حتى لو تشوفي ان مابتفيدك دحين دام الغرض فيها استثمار وقتك واضافة لك سويها .. وهذا شي وصانا عليه ديننا انو دايم نكون مثقفين ونتعلم لانه اساس البناء والنجاح بحياتنا بكل مجالاتنا .. 

ويساعدك لو لاسمح الله احتجتي شي ..يمكن علمك ومعرفتك تفك عليك ازمه يوما ما..فلا تهملي هالجانب ولا تمسكي بمعلومات او علم وبس توقفي.. وخذي العلم من اي احددد

اي احددد

اي احددد

سوا كان الشخص تشوفينه فاشل/ مو غني/ مانجح / ماتعرف /ماجرب .. ماتدرين الحكمه وين ربي حطها ويمكن يعرفوا معلومات بس مايطبقوها بس تنفعك

وبس

اتمنى استفدتوا من هالتدوينه البسيطه والاهداف البسيطه بس اثر نتايجها دايم باذن الله

وكلامي مو معناته اني كامله بكل هالمجالات ..انا مثلكم ناقصه ولسا ابغا اتغير واتعلم واصحصح كثير من اغلاطي..

بس كل ماشفت برامج فيديوهات وقريت كتب او تدوينات .. هالنقاط دايم تكون مذكوره فمعناته اثرها لمس حيات الكثير بشكل ايجابي

بالنهاية

لاتنسوا تشاركوها لغيركم عشان يبدوا سنه او يوم جديد باهداف حقيقة ومفيدة

وترا المدونة كثييير  فيها ولله الحمد والمنه مواضيع تساعدكم من تجاربي الخاصه عشان تعيشي حياه صحية وروتين لحياتك ومنها .. 

أسهل الطرق  تساعدك تشربي مويه اكثر 

كيف تكوني إنسانه صباحية 

قنوات لرياضات بالبيت بدون اجهزه او أدوات 

كيف تعرفي الأجند ه المناسبة لك 

عيشوا بحب وإيجابية