طرق لجعل مكياجك فخم بدون زيادة المكياج لصحة بشرتك how to make your makeup elegant without adding more products for healthy skin

السلام عليكم ورحمة الله وبركاته

كيفكم .. تدوينة اليوم تكلمه لتدوينة سابقه حبيتوها كثيير . وهي تدوينة تسريحات عملية وأنيقة بدون حرارة وأضرار .. لا تنسوا تقروها بعد هالتدوينة

هالتدوينة من العنوان .. عن المكياج .. طبعا نكون صريحين انا مو من الناس المهووسه والمتعمقه بعالم المكياج ولكن الحمدالله بعد كثييييير تجارب فاشله ههههههه ومكياجات ماضبطت .. صرت اقدر أمكيج نفسي بطريقه نظيفة ومرتبه بشكل أفضل من قبل ولله الحمد

الموضوع نرجع نقول مرتبط بتدوينتي لان يساعدك بطرق بسيطة تفخمي او تضبطي مكياجك بأقل قدر ممكن من المنتجات على وجهك لسلامه وصحة بشرتك .. سوا كنتي تعتنين ببشرتك او لا << بالنهايه بستفيد بشرتك من ناحية خفة المنتجات عليها

فاقدر بضمير راضي اكتبلكم هالتدوينة هههههه << اهم شي في مدونتي الشفافيه والصراحه … يلا نبدا الموضوع الحين

أولا : الروج الغامق

عشان تخلي مكياجك أفخم او أثقل او يعطي إيحاء انه ثقيل ومتعوبه عليه .. بإختصار أختاري روج غامق لونه .. مثلا أحمر بني بنفسجي وردي والخ اهم شي يكون درجه غامق وفيه صبغه عاليه يعني ثقيل من ناحيه وضوح اللون مو خفيف

هالشي يعطي فخامه وثقل للمكياج ويمكن تكوني مسويه مكياج وجه وعيون خفييييييف او حتى مو مسوية مكياج الا بس أحمر خدورد – بلشر ومسكره وكحل او ايلاينر .. ومع الروج الثقيل يعطي فخامه للمظهر الاخير لمكياجك

ثانيا : الروج اللامع

او الارواج الي تكون فيها ترطيب ولمعه.. جميله جدا ومتنوعة وتقدري تجيبي روج لامع لونه فاتح وتحطينه فوق اي روج ثاني عشان تحصلي نفس الشكل وهو المظهر المبلل او المرطب للشفاه .. هالخطوه حلوه جداااااا

تخلي الميكاج صباحي وخفيف وجميل .. والاهم تصغر من عمرك وشكلك لانها تعطي شكل عفوي وشبابي .. وتقدري كمان مع الخطوة الاولى .. تخلي الروج غامق وفوقه لمعه وترطيب تعطي فخامه وشكل شبابي بنفس الوقت ..

فاللمعه تعطي انتباه لوجهك بشكل مريح للعين

ثالثا : احمر الخدود – البلشر

هالخطوة بالمكياج .. كثير يحسبوها قديمه او مو ضرورية ولكن هالفتره بدت تطلع بشكل كبير وقد ايش مهمه .. وقد ايش تغير الشكل النهائي لوجهك .. والبلشر مو بس لون وردي .. في درجات كثيره في بني ودرجاته .. وردي ودرجاته والبرتقالي ودرجاته والخ …

أبسط مثال معروف على اهميه هالخطوة وقد أيش تبرز مكياجك او ملامحك او تعطي رونق لمكياجك وكمان تغير الشكل من خفيف الى ثقيل والعكس .. وكمان تخليه طبيعي ولا حق مناسبة .. تطبيقات المبدعه السعودية وعد التركي .

كثير من اعمالها مسلطه الضوء على جمال البلشر على البنت بكل انواع البشرة

البلشر – أحمر الخدود – تقدري يكون هو و الروج والايلينر و مسكرا فقط كفيل يغير ويعطي شكل طبيعي لوجهك او فخم على حسب الوانك باقل منتجات ممكنه على بشرتك

رابعا : زيدي بتغميق مكان واحد بس

تقدري تفخمي وتثقلي مكياجك من خلال انك تركزي على منطقه معينه بوجهك بس .. يعني ركزي بالوان عينك وخليها مثلا غامقه سوا بالالوان او زياده الايلينر .. وباقي وجهك خليه خفيف …. او مثلا زي ماقلنا الروج وباقي خفيف .. او او او الخ على حسب تفضيلك

بالنهاية

طبعا اذا حابه تثقلي بدون زياده بكل مكان وهذا هو هدف هالتدوينة … ولكن اذا تبغي ثقيل بكل شي عشان مناسبه كبيره فعادي طبعا او هو تفضيل خاص فيك كمان كيفيك .. بس الغرض هو نساعد الي مايبغا يكثر بس يبغا يكون الشكل ثقيل او مسويه شغل كثير على وجهك

لا تنسوا تشاركوا هالتدوينة مع غيركم عشان يستفيدوا

عيشوا بحب وإيجابية

أسهل و أسرع تونر للوجه بمكون واحد فقط DIY toner with one ingredient only

السلام عليكم ورحمة الله وبركاته

كيفكم ؟ إن شاء الله بخير .. بما اني شاركتكم وسألتكم بالانستقرام ايش نصايحكم لروتين عناية بالوجه .. وشاركتوني طرقكم وشكرا لكم على التفاعل .. بديت أبدا شوي شوي .. وإن شاءلله لما أشوف نتايج بروتيني لوجهي رح أكيد أشاركم هوا .. ولا تنسوا تتابعوا الانستقرام عشان تعرفوا كل جديد برحلتي الصحية

اليوم بقولكم على حركه بنت خالتي نصحتني هوا .. وهي تحب العنايه كثير وهذا حسابها – هنا – رح تستفدوا بإذن الله منها

قالتلي سويلك اسرع تونر بالبيت .. بيفيدك ان شالله ودامك لسا مو مره متعمقه بالعناية والمكونات بس شي واحد بس .. ياااابلاااش

بس اول ايش هوا التونر

شخصيا رح أشاركم معرفتي البسيطه لاني مارح أشرح امور مو متعمقه فيها ولا عندي معرفه كبيره .. ولكن باختصار هي عباره عن منتج مائي .. تشوفينها بالعلبه كانو موية .. ولكن في مواد ومكونات تساعد انها تظيف للوجه من خلال شد البشره ويركز على المسام من خلال ان يغلقها ويضيقها وكمان يخفف دهون وافرازات الوجه .. وتحطينه بعد غسيل الوجه او بعد ماتغسلي وتقشري وجهك على طول

كيف أسوي تونر بالبيت ؟

موية ورد + الفريزر ..

صبي موية الورد على صحن الثلج وحطي بالفريزر .. عشان يكون حجم صغير ومناسب انك تفركيه عى وجهك كل مره تحتاجيه …

او البعض يخليه بقارورة رش .. ويخلي القاروره بالثلاجه وكل مره يرش على جهه

او البعض مايحطونه بمكان بارد ..

شخصيا حسيت لما يكون بارد سوا رش او فرك بالثلج – طبعا خفيف – احس بشرتي تنشد بسبب البروده فإحساس جدا حلو منعش خاصه الصبح

وبس خلصنا ههههه

بالنهاية

أتمنى فادتكم هالخلطة السريعة .. وشكرا لبنت خالتي تيومه .. لا تنسوا تشاركوها لغيركم وبرضو تتابعوني على الانستقرام لكل جديد

عيشوا بكل حب وإيجابية

ثلاثه تسريحات شعر انيقة لحماية الشعر من الضرر والاستشوار three elegant hair style without damaging our hair 3

السلام عليكم ورحمة الله وبركاته

كيفكم ؟ تدوينة اليوم عن تجربتي مع حماية شعري قدر المستطاع من الاستشوار والحراره وبنفس الوقت اروح للمناسبات والعزائم بشكل مرتب وأنيق وبأقل الاضرار الممكنه لشعرك

هذي التسريحات جمالها انو تقدر تكون مره فخمه ومره خفيفه وعملية على حسب اكسسوارتك – الحلق والعقد و مكياجك – خفيف او ثقيل و اكسسوارات الشعر – الربطات والزينة .. وهذا شي مرن وعملي وجدا جميل للتنويع

جمال هالتسريحات انو تساعد في مسيرتك لعلاج شعرك – اذا حابه تقللي حراره استشوار او مواد وكريمات – كمان اذا حابه تشوفي نتايج عنايتك لشعرك فلازم تخففي اي أضرار وتخليه ع طبيعته .. وبرضو بدون ماتهملي اناقتك قدام الناس بشكل جميل ومرتب

اول تسريحة : الكعكة العالية او السفلية

هذي التسريحة عالمية وكل احد يقدر يسويها بنفسواو بمساعدة احد والاجمل انها تقدري تغيري فيها باكثر من شكل ولكن أساسها واحد وهي الكعكة – لمة الشعر على شكل دائرة بالاخير .

بإختصار ..تمشطي شعرك على وراء – وتقدري تستخدمي كريمات او زيوت طبيعية للمساعدة عشان تهجدي النفشة- وتلمي الشعر على شكل كعكة او دائره وربطها بربطة شعر او بنس –توكة السوده حق الشعر .

تقدري تنزلي خصل من قدام او جوانب أذنك .. او تخلي نفس الكعكه مو مرتبه وعشواية او مرتبه جدا وملموة

وكمان نفس هالكعكة تصير مو في أعلى الراس وتخلينها للأسفل يعني كتغير وتنويع وبرضو تضيفي الاكسسوارات على الشعر او لكي وتعطي نعومة وأناقه … وهذا فيديو يمكن توصل فكرتي لهالتسريحة ولكن النت مليان صور لكل انواع الشعر – القصير الطويل والناعم المجعد الخشن – والخ وكثير حلوين

التسريحة الثانية : الظفيره

من أساليب الشعر الي البعض يشوفها جدا طفولية او مره موحلوه .. مع ان هالتسريحه فيها حركات وتنويع كثييييير جدا .. وتصير فخمه او خفيفة .. فلا تستهينوا فيها وبرضو تنفع لكل أنواع الشعر

شخصيا على حسب المناسبة .. مثلا لو جمعة مع اهل او ناس اعرفهم أسوي ظفيرتين – كل جهه ظفيره كامله من اول الراس الى اخره .. او وحده بالنص .. وبرضو انزل خصل على جوانب الاذن ومع الاكسسوارات – حلق مثلا او ربطة شعر تعطيها اضافه جميلة وفخمه

الحلو بالظفيره انك تقدري تسويها مع تساريح ثانية او اذا تبغي شعرك مفتوح .. وطبعا الظفيره لها طرق مختلفه مو بس الي نعرفها ابو ثلاث خصل ونلفها .. تقدري تنوعي وهنا صور مختلفه لتساريح وافكار

التسريحه الثالثة : اللفة

هالتسريحه او الحركة برضو نفي الاولى والثانية .. تنفع م هالتسريحات السابقه او لحالها . وهذا جمال هالثلاث تسريحات انو لحالها تنفع او مع بعض تنفع

اللفة بإختصار – تلفين خصل من شعر وتربطينها بتوكة سوده او بربطة شعر .. مو كل الشعر ينلف لازم ينفع جزء معين وجزء الباقي تسوين كعكه او ظفيره وهكذا بالصور رح تفهمو الفكره أكثر ..

هالتسريحة او الحركة رح تزيد فخامه او تكون عملية وخفيفه على حسب زي ما قلنا اول مكياجك او الكسسوارات لشعرك او لوجهك – حلق وعقد والخ ..

جدا هالتسريحة متعدده الاشكال وسريعة ماتحتاج شي غير توك سوده عشان تثبت وربطة الشعر ..

شخصيا احب افرق شعري من قدام والف الجزئين واثبتهم بتوكه وباقي الشعر من ورا اخليه كعكة وبرضو انزل خصل من قدام << هههههههه كل تساريحي بخصل هههه لاني شخصيا أشوفها تنعم الوجه أكثر

او الف خصل كثيره حول كل راسي ومن ورا اربط الشعر كذيل حصان او كعكة او ظفيره .. مره جميله تصير

لفة خصل شعرك تقدري تسوين فيها تساريح تروحي فيها لعزايم كبيرة او حتى زواجات .. وجربتها ونفعت بس كان لازم استشور عشان احوس وألف لف أسرع ههههه ..

وهذه الصور لتسريحات اللفه او كيف تدخلي هالحركه بتسريحات خفيفه وعادية وتغييرها لشكل اجمل

ماحصلت أفكار ثانية توصل أكثر الي بمخي ولكن هذا اقرب شي .. ولكن برضو كنتب أبغا أفكار اكثر لأنواع الشعر بس ترا لا تغركم شعور الي بالصور هههههه المهم تمشطي الشعر كويس واذا تحتاجي كريم وترطيب ليخفف النفشه شوي او حتى خلي النفشه والتجعيد بيكون أحلى مع اللفة كمان وامورك تمام ترا

اخر تسريحه بس ماهي تسريحه بس حركة إضافية أسويها : نص أستشوار

وهي اني أستشور بس خصله او جزء من شعري من قدام واستشوره واخليه وايفي او ملفوف بس مفتوح … وباقي شعري المه بكعكه او اي حركه ثانيه .. او اخلي الجزء المستشور الفه والمه مع باقي شعري على حسب نوع التسريحه الي مسويتها .. لشكل أنيق ولمناسبات شوي رسمية وهكذا

اتمنى أنو عجبكم هالموضوع .. وأبغا اتكلم عن موضوع الاكسسوارات وكيف تختاري اكسسوارات بسيطه بس تمشي معاكي بمناسبات كثيره وفخمه كمان .. اذا تبغوا هالموضوع حطو لايك على هالتدوينة عشان اعرف

الموضوع يمكن البعض يشوفه بعيد عن مواضيع المدونة ولكن مره قريب لانه بالصحه وكيف نخفف الضرر على شعرنا ولكن مانهمل أناقتنا كمان

بالنهاية

ارسلوا هالتدوينة للي تعرفوا بيستفيد .. وتابعوني بالانستقرام لحياه صحية ونحفز بعض

عيشوا بحب وإيجابية

طريقة سهله وصحية لصوص الهمبرجر وهمبرجر صحي كما .. صحيه بدون حرمان #مالي_نفس_أطبخ healthy burger and sauce recipe

السلام عليكم ورحمة الله وبركاته

وصفة جديده من وصفات #مالي_نفس_أطبخ لكل الي حاب يطبخ بس بطريقة سهله وسريعه

والاهم أنها لذييييذه وبرضو صحية يعني أشبعي وانتي مبسوطه وضميرك مرتاح

نبدا بصوص صحي للهامبرجر وبرضو ينفع لاكلات ثانيه

المكونات

زبادي – كتشب -خردل – ليمون -ريحان -ببريكا -ملح -كمون – ليمون

المقادير تعتمد على حسب ذوقك .. اوقات رح تحتاجي تزيدي مكون عشان مثلا تكسري طعم مكون اخر مثلا شخصيا ماأحب طعم الخردل والزبادي الواضح فازود كتشب أكثر وبهارات الباقيه .. مع ان الزبادي أساسي والخردل للصوص ولكن مااحب بروز النكهه في الصوص

الطريقة

كلهم بصحن واخلطي ههههههه << بالله في احد أحسن مني يعطيكم وصفات كذا

والصوص يكون اول طبقه لنا في خبز الهامبرجر ..

نجي للهامبرجر

المكونات

خبز همبرجر – دجاج او لحم – بهارات اللحمه او بهارات مشكله بسيطه – خس وطماطم – والصوص الي سويناه

في ناس تحب تجيب الجاهز من ناحيه اللحم والدجاج << وانا كثير أسوي هالشي اجيب المثلج .. ولكن أشويهم

وفي ناس حابه تفرم الدجاج او اللحم وتضيف البهارات … وهذا الي سويته اليوم جبت لحم مفروم وأضفت عليه بهارات متوفره عندي

بالنسبه لخبز الهمبرجر فيه انواع كثير ..** خذوا الي يناسبكم وفي الانواع الصحيه الي تكون بخبز بر او نخاله .. ولكن شخصيا أشوف الصحه مو معناتها كل شي لازم يكون صحي ميه بالميه لان لو أكلك خلال اليوم كثير صحي وفيه فوائد .. تاخذي رز ابيض او خبز ابيض مارح يأثر كثير ويفرق كثر لو كان اكلك اغلبه مو صحي .. فشخصيا اعتمد بالنسب والتناسب بموضوع الاكل

اللحم المفروم نضيف عليه : ملح \ بهارات مشكله انا احب الفضخه وهي بهارات حضرميه مدري مين ايش بس هي مشكله هههههه تقدرو تلعبو بهالفقره من ناحيه ايش تضيفو او مثلا ضيفو ملح وفلفل اسود بس .. عندنا الصوص نكته غنيه ولذيذه

بعدين نكور اللحمه او الدجاج على الصاج نشويهم او على الجهاز المقلاه زي فيلبس يقون قلي صحي .. او نكتفي بالصاج على الفرن زي ماسويت وبس .. لين يستوي ونحطو على الخبز ونضيف فوقه صوص اللذيذ حقتنا وفوقه كمان كاتشب ليه لا؟؟؟

قطعي الطماطم لشرايح والخس << وحطيهم في الخبز حق الهمبرجر

مكونات واطباق جانبية

كتشب ؟؟ او بقيه الصوص << باين اني مهووسة كاتشب ولا لا ههههه

بطاطس مقطعة شرايح برضو مشوية ( ادهنوها بزيت زيتون وملح وببريكا لذذذذذذذذذذذذذذذذذذذذذيييييذه ) – اوالبعض يشوي البطاطس المجمدة << واوقات اسويها

وبس بالعافيه على قلبكم

اتمنى عجبكم الشرح السريع اخفيفه لطبق من اطباق #مالي_نفس_أطبخ

إذا عجبتكم هالفقره وتبغوا دايم منها . اتمنى تكتبوا بالتعليقات او تضغطوا لايك- إعجاب- على هالمدونة عشان اعرف

بالنهاية

عيشوا بحب وإيجابية