كوني أنيقة بالعيد حتى لو بمزانية بسيطة محدودة how to look chic on a budget for EID

السلام عليكم ورحمة الله وبركاته

تدوينة اليوم إن شاءالله وقتها مناسب لكم .وهالفتره كثير من البنات يتسوقوا لاخر الاغراض والتجهيزات للعيد .. ويكون وقت ضغط وتوتر .. فحبيت اركز على نقطة مهمه للبنات الي بميزانيه محدودة وبسيطة

وهالموضوع له جزء بالحياه الصحية من ناحية صحة النفس والعقل واسلوب الحياه .بأننا نكون قنوعين ونحاول نتأقلم بالوضع والاهم مانقلل من شأن حقنا بامتلاك أفضل الاشياء قدر المستطاع والاستمتاع بالحياه

كم الميزانية المحدودة ؟

أكثر سؤال يجي ببال البنت ان هالميزانية تكفي ؟ هل الميزانية قليلة ؟ هل انا بوضع ضيق علي أشتري ؟ هل فلوسي ماتكفي زي باقي البنات ؟ هل أقدر أشتري بهالمبلغ ؟ والخ من الاسئله وقت مانكون بموقف ميزانية محدده نحتاج مانتجاوزها وهذا شي طبيعي وترا في ميزانيات بكل المبالغ

يعني مو بس عندك 200 ريال عشان تتسوقي معناتو انتي بميزانيه محدودة , ترا حتى الي عنها 500 ميزانية او 1000 او 50000 او 10000 او حتى 300000 ريال .. قد تشوف انها محدودة بميزانيه لان يعتمد على طبيعة حياتها العامه واليوميه وهالهمبلغ أقل من المعتاد ولا لا .. فلا تفكرو بس لو مبلغ بسيط معناتو انتي محكوره حتى المبالغ العالي قد تكون حكر على وحده متعوده تقضي باكثر واكثر .. وهذا كولو طبيعي

كيف أكون أنيقة بميزانية محدودة بشطارة ؟؟؟

هالنصايح شخصيا تعلمتها وأطبقها .. مو من موقع معين او أحد قالي .. هي طبقتها وجربتها بعد كثير من الاغلاط وحبيت أفيدكم زي مافدتني

أولا : كوني كلاسيكية

أسهل وأفخم وأفضل وأقل خطورة هو الزي الكلا سيكي .. لانه مريح للعين اولا ويرتب الجسم ويخفي كثير من المناطق الي البنات يحبو يخفوها وسهل انك تخلي أفخم او تخليه بسيط وكمان يعتبر أكثر الموديلات المتوفره في كل المحلات الرخيصه او الغاليه وتقدري تحصلي بدائل بمختلف الميزانيات .. فلو حابه تباني فخمه وأنيقة بوقت ضيق وبميزانيه ماتتوقعي تشتري فيه الي تبغيه توجهي لهالازياء لانه دايما صح ومرتب وأنثوي جدا .. بأخر التدوينة في صور لكل النصايح عشان تفهموا الفكره أكثر

ثانيا : اللمعة اللمعة اللمعة يابنات

اللعمة مرتبطة داااائما بالفخامه والاناقة والجاذبية والشي الفخم … فحاولي لبسك او شكلك يحتوي على هالشي ولكن اللمعة يمكن تكون تضرك لو كانت كثيره وكانت بشكل مو مرتب ومتوازن فانتبهوا

اللمعة بالمكياج : عندكم موضة المكياج النضر او الزجاجي الي يكون اساس اوجه فيه لمعه خفيفه وتحسي ان الوجه نظيف ونضر او مكياج العيون تركزي يكون فيه لمعه وهكذا

اللمعة بالاكسسوارات حول اللبس : مثلا بالجزمة او بحلق الاذن واكسسوارات اليد .. هالامكان تعتبر أماكن تركيز او تلفت العين .. فشخصيا احب يكون فيه كرستالات ولمعه ولكن بخفه واناقه طبعا .. مو لازم كل هالاماكن فيها لمعه تقدري بس تركزي على مثلا الاذن وباقي يكون هادي وبسيط .كل وحده وذوقها

اللمعة باللبس : مثلا تكون قطعه وحده باللبس مثلا التنورة او البلوزه او الجاكيت واحد فيهم القماش حقو ملمع او فيه كرستالات .. او مثلا كامل القطعه تكون ملمعه مثلا فستان او كل القطع بلبسك … ولكن شخصياا أشوف لواللمعه لها أكثر من لون يعني مثلا كرستال وعليه أكثر من لون .. أحب يكون بجزء بسيط باللبس مثلا على ياقه البلوزة او اطراف الكم .. ولكن لو بكامل اللبس او بقطعه كبيره يكون لون واحد مثلا كل التنورة لمعه نحاسي مثلا .. وهكذا

ثالثا : الالوان الهادئة والمحايده

باختصار لانها هادية وبسيطه وسهل تحصلي كثير قطع باشكال مختلفه وموديلات مختلفه لو بنتكلم من ناحيه سرعه الشراء والوقت .. رح تساعدك .. وبرضو كلاسيكية وأنيقة

هالالوان زي : اسود ابيض ذهبي نحاسي درجات الالوان الفاتحه البيج

رابعا : الذوق والتنسيق أهم من السعر

هالنقطة أقدر أقولكم انها تلب موازين كل شي .. واعتقد الكل لاحظ هالشي بالاونه الاخيره بكثرة .. شوفو كثير مواقع ومحلات باسعار رخيصه .. ولكن ذوف وتنسيق المعلنين عنه خلى المحل يبان بشكل جميل وان تقدر تطلع بشكل فخم وحلو بسعر بسيط وان الذوق والتنسيق اهم من السعر ومن وين تشتري

اذا ماعند هالخصله ومرتبط ذوقك باسعار أعلى من ميزانيتك ,, كلمي أحد تعرفيه ذوقه حلو وتعرف تلبس بكل الاسعار .. رح تساعدك كثيررر ولكن لو ماعندك احد .. تقدري تستعيني بالانترنيت وتاخذي الهام وأفكار .. مثلا تشوفي لبس من بلوزة بيضاء وتنورة ذهبي .. يصير تركيزك تشتري نفس الشكل بغض النظر من وين وبكم اهم شي ضمن ميزانيتك ,, وبيخليكي تركزي أكثر

ولكن لو عندك هالخصله امورك تمام ههههه بس شكرا على الزياره .. ولكن جديا القدرة على التنسيق تعتبر خصله مو الكل عنده وصعبه لو ماعندك لان يخليكي تحسي مااقدر اطلع بشكل حلو لو ماتوفر المبلغ الفلاني .. ولكن تقدري تبني هالشي من خلال المشاهده والالهام

خامسا : خامه أنثوية

أختاري باللبس الاقمشة الي تكون فيها شيفون او حرير او دانتيل .. هالاقمشه مو لازم كل اللبس يكون منها ولكن لو شي بسيط او قطعه بلبسك رح تضيف أناقه وفخامه ونعومة للبسك

أخيرا : أسلوب جسمك و وثقتك وأنوثتك سلاح أناقتك

دا شي شخصيا احاول اتعدل واتدرب عليها برضو .. ولكن لاحظت لو غيرت اسلوبي من ناحيه حركة المشي والجلسة واسلوب الحركة ويكون اكثر ثقة ! ويكون عندك شعور بالايمان بشكلك وشخصيتك رح يغير شكلك قدام الكل وانت أولا

اسألوا نفسكم ليش الشركات بالتسويق للملابس يستعينوا بعارضين او ممثلين معينين .. ويدفعوا ملايين مع انو يقدروا ياخذوا اي عارض أزياء او ممثل أقل سعرا … الفكره باسلوب جسده والطاقه الي أسلوبه وثقته بفسه تعطي المشاهد

هي نفس الفكره الي يبغوا الي يلبسوا لبسهم يحسوا فيها وكانهم هذا العارض او هذا الممثل …وهذا قوة حركة جسمك وثقتك بنفسك وأنوثتك

ملاحظة .. أصطنعي الثقه حتى لو مو واثقه .. امشي مضبوط افردي كتفك , ظهرك مستقيم .. طالعي قدام لا تطالعي تحت او نص ونص .. وعلى فكره في فرق بين الثقه وحب النفس والغرور وانو أنا احس وحده … انتبهوا

حتى لو لبسك مو مره حلو بنظر أحد رح تكوني بنظرو لسا جميله بس مايعرف ليش . والسر في ظهورك وطاقتك الي بانت عليكي وعلى الحضور

صور للالهام وتطبيق لنصايحي

بالنهاية

أتمنى تعجبكم هالتدوينة وتنشروها لغيركم عشان يستفيدوا بهالفترة . ولا تنسوا تتابعوني على الانستقرام والسناب شات والمدونة

insta : booshlife snap : boosh.life

عيشوا بحب وإيجابية

شاركوني أرائكم

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.