الاسبوع الثالث والرابع من تحدي شهر بدون نفايات LAST WEEK OF MONTH WITH NO WASTE CHALLENGE

السلام عليكم ورحمة الله وبركاته

اخر اسبوعين من تحدي شهر بدون نفايات . الحمدالله بنخلص كلها ايام معدوده . صراحه كانو اسهل واصعب اسبوعين بنفس الوقت . والتحدي استفدت منه كثيييير .. الي تو يقرا عن هالتحدي لازم تقري التدوينات السابقة عشان تعرفي ايش صار وليش بديت هالتحدي

تحدي شهر بدون نفايات

أول اسبوع بتحدي شهر بدون نفايات

ثاني اسبوع في تحدي شهر بدون نفايات

كيف كانوا هالاسبوعين ؟

صراحه كان اسبوع مره سهل والاسبوع الي بعدو كان معقد وصعب … ثالث اسبوع قدرت بشكل كبير امسك نفسي عن اي شي بلاستيك انا شخصيا استخدمه ولكن الاسبوع الي بعده ماضبطت معاي لان كانت في امور غصب فيها بلاستيك .. بمعنى شخصيا وقت الدورة الشهريه احتاج مشروب حليب الشوكلاته ( لا تسالون حتى انا معرف ليش اشتهيه ) فكنت اطلبه او يجني من برا ويكون الكوب فيه غطا بلاستيكي .. برضو كنت اشتهي حلاوه وبالغلط بدون ماانتبه اكلت شوكلاته بعدها استوعبت

كمان لاني مع الاهل فكنا مثلا نستخدم اكياس زباله او يجيبو مقاضي باكياس او اكل يكون مه اكياس ومواعين بلاستيك – لعما اني اجيب مواعيني هههه – او لما نقضي كان في اغراض نحتاجها ( مع العلم حاولت اقضي قد مااقدر بدون بلاستيك ولكن في امور الا فيها بلاستيك

فكان اسبوعين ممتعين مابين حماس الالتزام والمحاولة اننا مانفشل

ايش الي تعلمتيه من هالتجربة ؟

هالتجربة علمتني اننا تعلمنا وتربينا على الكسل بشكل كبير . .. مهما كنا نكافح ومعتمدين على نفسنا الا ان البلاستيك سهل امور كثيره علينا من تغليف اغراض / حمل اشياء / تخفيف غسيل / تخفيف مساحه والاهم تنوع المنتجات الي تكون من البلاستيك .. فغالبا تقولي هاتي ملعقه بلاستيك اسرع بدال مااغسل . او هاتي كيسه بلاستيك من المحل بدال ما اتعنى واجيب كيستي لان مالك خلق تشيلي عفش .. والخ من اسلوب الكسل والدلع

هل معناته الكل متدلع وكسلان بالمعنى او المفهوم العامي للكسل .. لا لا لا .. ولكن تولد فينا نوع من الاتكاليه الي تخلينا نستصعب اوقات ابسط الامور مثلا لو احد قالك شيلي كاستك معاك عشان لو بتشربي بره .. بتقولي لا ليش وشغلانه وتحسي الموضوع كبير وهو بسيط جدا ..

ايش كمان ؟

تعلمت اننا ولله الحمد بنعمة كبير جدا جدا .. بسبب هالاختراع .. صح استهلاكنا له وكثرت الاستخدام خلتنا نسبب اضرار كبيره للارض وبالمقابل لنفسنا .. ولكن لما تتنتبهي للامور من منظور تحدي ( لانك تبدي تدققي بكل صغيره وكبيره ) تستوعبي حجم النعمه والسهولة الي عايشينها بسببه

وكمان بسبب هالاختراع انفتحت ابواب كثيره للرزق للناس .. ابسط مثال ( الي يبيع بليلة يقدر يوفر اكله ويعطيه للغير بعلب بلاستيكه وملعقه بحيث عطانا تجربة الاكل بالكورنيش لان البلاستيك سهل له انه يعطي زباينه برا واسترزق

اللهم لك الحمد دائما وابدا

هل بتكملي تكوني صديقة للبيئة ؟

اي قبل لا ابدا التحدي بديت هالشي ومع التحدي حمسني اكثر .. وليش لا بعد التحدي كمان نكمل ولكن اتوقع مابكون بنفس الالتزام القوي بحاول اخفف واركز اتعود شوي شوي زي ماتعود على الاغراض السابقه عشان تكون اسلوب حياه انا راضيه ومتقبلته

ايش الي ندمتي عليه بهالتحدي

اني ماتجهزت ! لو جهزت الاغراض الي تكلمت عنها سابقا وانا اعرف ان لازم تتوفر كان التحدي بكون شيق وحماس اكثر ومن جد بيكون تحدي أكبر .. ولكن زي ماقلت سابقا رح ابدا اغير امور بمجالات مختلفه ولكن شوي شوي .. هالمره كان التحدي عباره عن ملاحظة وانتبه واستفدت كثير

صح ماطبقته حرفيا ولكن يعتبر شي وجربناه ولله الحمد

تنصحي التحدي لاحد؟

أكيييييييييييييد كل الي يقرا يلا جربنو لو شي واحد تمتنعو عنه وشوفو نفسكم وتجربتكم والاهم شاركوها معاي .. وتابعوني على مواقع التواصل لاني اشارك هاليوميات والشركات الي اتعامل معاها الي تكون صديقة للبيئة

بالنهاية

شكرا لحماسكم ومتابعتكم .. متحمسة نجرب تحدي جديد ونتطور اكثر باذن الله مع بعض

عيشوا بحب وايجابية

ثاني اسبوع من تحدي شهر بدون نفايات second week with no trash for month challenge

السلام عليكم ورحمة الله وبركاته

كيفكم وجيت لكم بتجربتي لثاني اسبوع لتحدي شهر بدون نفايات وهالمره نفس المره الي راحت لازم في اكشن وصدمة .. قبل لا تقروا هالتدوينة رحوا للتدوينه السابقه والتدوينة الي شرحت فيها التحدي ومفهومة

تحدي شهر بدون نفايات وبلاستيك ممكن؟ \ اول أسبوع بتحدي الشهر بدون نفايات كان فشل ذريع

اعلان مهم جدا جدا جدا

اذا ماتعرفو ( اسست منصه جرعه من عادة ) وبنسوي اول ورشه عمل لمده 3 ساعات بالخبر نتعلم كيف نبني عادات جديده بدون ما تاثر على حياتنا وتحسن جودة حياتنا بالاسلوب الي يناسبنا

التسجيل مفتوح للاشتراك المقاعد محدوده وانا الي بقيم هالورشه

تواصلي مع جرعه من عاده على الخاص بالانستقرام بارسال ايميلك اذا حابه خصم على رسوم الورشه او اشتراك بقائمه ايميل المدونة

هالاسبوع كيف كان ياهبه ؟؟؟

للامانه مره احسن بكثيررررررر . ولكن لابد من النفايات لان كم مره جاني اكل وكان باكياس علب بلاستيكية للامانه ماطلبت جاني ههههه ابراءا للذمه

ولكن الي كنت مره فخوره فيه اني حاولت امسك نفسي ماافتح اكياس الكاتشب لان هي بلاستيك ولكن مره وحده فتحت ونسيت .. المرات الجايه لا الحمدالله خليتهم جنبي اطالع فيهم وعيوني كلها شوق وحب واشتثياق << الي مايعرفني ان ااعشق الكاتشب

الاسبوع الي راح صراحه كان اول اسبوع يمر علي اكل من برا كثير … ولكن بالشغل الحمدالله اغراضي معاي من صحون وملاعق وغيره << الي يتابعني سناب او انستقرام يعرف هالشي دايم اصور رحلتي لتخفيف البلاستيك

برضو خرجت للسوق ونسيت كيستي عشان اقضي بدون اكياس بلاستيك بس نشوف الجانب الايجابي شلت معاي قارورة المويه عشان ماشتري مويه بلاستيك

طيب ايش الموضوع الكبير الي صارلي ؟؟؟ او الصدمه ؟

لما رحت السوبر ماركت اقضي اكل لي !!! ياجماعه حرفيا كل شي ببلاستيك او فيه جزء ببلاستيك .. بتقولوا هبه معروف ان الكثير من الاغراض بالسوبر ماركت تكون ببلاستيك

بس ارجع واعيد لما تقولي لنفسك بركز رح تنصدموا لدرجه تقولي لو مافي بلاستيك اتوقع كثير شركات توقف او مانقدر نعيش بدونه > وهذا مو صحيح ولكن الشكل الخارجي من كثير الاعتماد عليه يحوي لك بالفكره

المهم بس قعدت اقضي معلبات هههههههههه او اغراض فيها قطعه صغيره بلاستيك والباقي كرتون ..بس اغلب الاغراض يا كرتون يا معلبه

وهذا بس اسبوعي الثاني والاحداث الي فيه متحمسه للاسبوع الجاي ان شالله اتحسن اكثر

بالنهايه

شكرا على متابعتكم لي واتمنى تنشروا هالتدوينة تشجيعا للي حاب يبدا يحسن حياته .. وشكرا على تشجيعكم ودعمكم لمنصة جرعه من عادة .. واتمنى تشاركوني هالورشه عشان نستفيد سوا باذن الله

عيشوا بحب وايجابية

snap: boosh.life insta: booshlife

الاسبوع الاول لتحدي شهر بدون نفايات !! فشل ذريع ؟ no waste challenge

السلام عليكم ورحمة الله وبركاته

اذا اول مره تقري هالتدوينة وماتعرفي الي التحدي . اقري التدوينة السابقه

تحدي شهر بدون نفايات

هبه بشري كيف الوضع ؟؟

بنااااااااااااااااااااااااااااااات لاالالالالا .. اطول اسبوع مر علي واكثر اسبوع استوعب ان الموضوع مو سهل والمفروض تجهزتله صراحه << لان قلت سابقا بتجهز واجهز اغراض لي ولكن ماسويت

المشكله حتى لو ماجهزت اغراض ومنتجات مو مشكله اقدر اكمل .. المصيبه اني ماجهزت الاكل يعني ماقضيت لي مقاضي العاديه عشان اعرف ايش اكل لان حرفيا كل شي ببلاستيك من ناحيه المقاضي .. مع ان بتقولوا ياهبه معروف ان كل شي مغلف بالبلاستيك ولكن !!!!!!! لوبتركزوا بالموضوع وتحاسبو نفسكم على كل شي بالتفصيل بيكون لكم نظرة مختلفه وأدق .. يعني باختصار بتقولو

وبعددددددديييييييييين كل شوي بلاستيك بوجهي كل شي صغير وكبير فيه بلاستيك

وتستوعبي ان البلاستيك مو بس بلاستيك شفاف او الي متعوده عليه كمان في بلاستيك بانواع مختلفه << مع ان عارفه بس لما تبدي التحدي مدري ليه تنصدمي وتستوعبي اكثر … لا تتريقوا علي جربوا وبعدين نتفاهم

هل التزمت ؟؟؟

لاااااااا … صحيح ان قبل التحدي انا مخففه مره استخدام البلاستيك ذو الاستخدام الواحد … ولكن اتكلم عن باقي الامور … كان مو بيدي اغلب الاوقات .. بمعنى مثلا مره بالشغل طلبت اكل واستعوبت بعدين ان فيه بلاستيك .. او مثلا احد اشترى لي غرض وفيه بلاستيك او انسى شنطتي حق المقاضي .. وهكذا

ايش استفدت ؟؟؟

الموضوع يحتاج وعي … ماهو صعب تطبيقه قد ما ان في مواقف كثيره تكون ضدك او لازم تخبصي .. بس نشوف الاسبوع الجاي باذن الله يكون فيه نتايج مرضية باذن الله

مين بدا معاي هالتجربة ؟؟؟ واذا لا يلا ابدي من بكرا حبه حبه ماحد يجبر هنا الكمال باي رحلة

ولاتنسوا تنشروا التدوينة لغيركم وتتابعو المدونة وحساباتي بمواقع التواصل الاجتماعي

snap : boosh.life insta: booshlife

عيشوا بحب وايجابية