تطبيق التمارين الرياضية lesmills – تجربتي

السلام عليكم ورحمة الله وبركاته

اليوم تجربتي عن تطبيق للتمارين الرياضية وليش اخترت اني اشترك فيه وغيره من التفاصيل الي بتساعد كل وحده تبغا تهتم او مهتمة بالرياضة

تطبيقات التمارين الرياضية ؟ هل تستاهل الاشتراك ؟

بداية التطبيقات الرياضية تعتبر بدل أرخص وأوفر من الاشتراك مع مدرب رياضي او نادي وهذي اهم ميزة فيها الشي الثاني تعتبر اسلوب متجدد ومتنوع يعني التطبيق كل مره بضيفوا فيه تمارين وتحديات واهداف مختلفة فانتي بتاخذي ميزة التنوع المتجدد بنفس القيمة . من المميزات الثانيه انها تعتبر منصه تقربك من أسلوب المدرب الي تحبيه وتفضليه يعني في مدربين يصممولهم تطبيق او موقع تمارين خاص فيهم فتكسبي انك تتدربي على يد هالمدرب وبقيمة أقل وكمان هالتطبيقات توفر غالبا نصائح / منتدى يتناقشو فيه المشتركين /البدائل للتمارين والحركات / وصفات لاكل وجداول أكل/ تمارين للي يبغا يروح النادي وفيه تعريف بالات واستخداماتها وغيره من المميزات وفي كمان تطبيقات تضم أكثر من مدرب فيكون عندك مساحه أكبر بكثير في التنويع

فشخصيا اشوف اي .. تستاهل انك الاشتراك لان لاننسى ان الرياضة مو بس حركه هي علم ولها فن ودراسة وفيها خطورة فلازم تكون مدروسة .. كمان لا ننسى ان الخدمات والانتاج لهالتطبيقات مكلف ويعتبر دخل للمدربين فانا شخصيا اشوف لو تتابعي المدرب وتعرفي انه يبذل مجهود في محتواه وعلمه يستاهل الدعم لان مابيسوي تطبيق او اشتراك ما يستاهل الدفع فيه

تطبيق LESMILLS ?

بعد متابعه وتطبيق لرياضات اليوتيوب وغيرها حصلت لهم فيديو باليوتيوب وحبيت مره اسلوب الاخراج للفيديو اسلوب التدريب / التنوع بالتمارين وعدم التكرار الممل وقعد فتره طويله يعني تقريبا سنتين كل مره اتدرب على فيديوهات اليوتيوب و لابد اني ارجع لفيديوهاتهم مع العلم انهم محطين كمية محدودة جدا مقارنة بالفيديوهات والقنوات الثانيه

فبعدين قلت خليني أشوف واقرا عنهم وطلع ان اسلوبهم أسلوب تدريب جماعي او وسط حشود بالمختصر حماس .. وشفت كيف يصمموا ويصورون ويخرجون والمدربين وانواع تدريباتهم وغيرها باختصار شفت ماورا الكواليس وانبهرت من كمية الشغل والابداع الي يبذلونه

والحلو في ان تمارينهم هم يبتكرونها ويختبرونها بالمعمل عشان يتاكدوا هل تنفع هالتمارين وهل تحقق المطلوب ! وكمان مخصصين لكل جو او نوع تمرين أسم معين ونمط رياضي واهداف رياضية معينه تختلف عن بعض

فقررت اني اسجل خلال فتره الحضر … وكان اول 14 يوم مجانا بعدها يسحبو المبلغ

انا استخدمت الابتوب بحكم اني اشبكه بالتلفزيون يعني افتح البرنامج عن طريق موقعهم الالكتروني

قبل كل شي ! الحلو ببداية الموضوع ؟

ان التطبيق مو امريكي ! هو من نيوزيلاندا .. يعني حلو نعرف ثقافة وفكر وجو مختلف ف عالم الرياضة كمان الشركة عائلية وموجودين الكبار يدربو لسى

كم قيمة الشهر ؟ وهل يستاهل ؟

اولا في فتره تجربة مجانية

الاشتراكات تعتمد على مدة الاشتراك فتختلف وتقل تزيد

تقريبا الشهر ب140 ريال … صراحة انا شخص مايحب يصرف فلوسه هههههه اقدر اقولكم يستاهل كل ريال .. لان الجو والحماس والنتائج الي بانت علي كات روعه

انا اشتركت لمدة تقريبا 3 شهور وخلال هالفتره أكيد كان في اوقات ملتزمة واوقات لا بس كان ممتع ما في ملل ابدا

كما يستاهل لان الموقع والالية حقهم منظمة يعني كل قسم رياضي او نوع رياضة لها فيديوهات تعريفية لبعض التمارين المتكررة / جداول متنوعة ومرتبة لكل هدف وفيها عنوان الفيديوهات عشان تروجين تشوفينها وفي بدائل لكل يوم

طبعا مقاسي فرق وهذا على فكرة مو بس بسبب الرياضة بس كمان بالاكل لاني حاولت التزم بنظام ولكن ماكنت مره ملتزمة كان التزام اكثر بالرياضة فنزلت مقاسي بالبنطلون من 48 الى 38 ماشالله

ايش مميزات ثانية للموقع LESMILLS ?

الموقع تفاعلي يعني فيه مدربين كثير .. أسلوب التدريب وحماسهم وتنوع التمارين كثير .. لهم شراكة مع شركة ريبوك الرياضية فلهم خط خاص فيهم بالملابس ومره حلو وكمان مع شركة بولر للساعات فبتشوفي انهم يستخدموا هالاشياء خلال تمرينهم .. كمان تفاعل المشتركين حلو مره وفيه قسم للحوامل ولليوغا وغيره مو بس مختص بالنساء حتى للرجال كمان ينزلو تحديات حلوة ومقابلات مع المدربين يعني كانهم صفحة متكامله يوتيوب ومنتدى وتفاعل وغيره بس مافي وصفات اكل .. كمان لهم مع شركة بولر مجموعة من المعدات الرياضية الي يستخدموها كمان بس مايوصلو للسعودية .. كمان في تمارين الدراجات / السكيل – سبنينق كلاس

على فكرة !!!مو اي مدرب يكون معاهم ! كل المدربين حقهم هم مختصين ومعتمدين من الشركة .. مو زي تطبيقات ثانية الي يكون فيه مدربين مستقلين ويشتركو بالبرنامج لتقديم تمارينهم وبرامجهم .. كل المدربين الي بليزميز يعتبرون مدربين تم اختبارهم واختبارهم واعتمادهم فقط معاهم

كمان عندهم أندية او اماكن خاصه فيهم للتدريب ويسون تصوير لتمارينهم في بلدان مختلفه كثير والحلو ان الجو العام جماعي الكل يحفز الثاني

هل جددت الاشراك ؟

لا .. السبب ان ابغا انوع واجرب شي جديد .. بس للامانه لو ماحصلت ماعندي مانع ارجعلهم خاصه اني مااتدرب بنادي و ابغا تنظيم لجدول تماريني وتركيز فهم يعتبرون بالنسبه لي الوجه الصح والانسب لي

وهذا باختصار تجربتي .. مره مره مره انصحكم وخاصه الي يحب جو التعب والتركيز العالي وقت الرياضة والتنويع يعني المفروض يعطوني فلوس صراحه على هالدعايه والدعايات الي سويتها لهم هههههه

روابط LES MILLS

LESMILLS SITE

INSTAGRAM PAGE

YOUTUBE

عيشوا بحب وايجابية

لا تنسوا تتابعوني على الانستقرام والسناب والمدونة .. ولا تنسوا كالعادة تشاركوا المدونة مع اي شخص بيستفيد

شاركوني أرائكم

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.