تحدي شهر بدون سكر !؟ اعرفي ايش صار معاي؟

السلام عليكم ورحمه الله وبركاته

كيفكم…؟؟ … اولا !! ليش ماتابعوني انستقرام ع فكره انزل يومياتي الصحيه والاهم صايره انزل مواضيع صحيه سهله ومره بنستفيد من بعض هناك …يلا اشوفكم هناك

حسابي myblfitness

سويت تحدي … الفكره جات فجاه وع طول قررت اسويها والاهم كانت شروطها مره بسيطه وماهي معقده او صارمه

التحدي كان (( شهر بدون سكر ))

الشروط :

ما اضيف سكر ابيض …. مااكل حلويات وشوكلاته من البقاله/سوبر ماركت فقط

اي شي غيره يعتبر مسموح …

هبه طيب كيك؟؟؟ طيب حلى من محل؟؟؟؟

عادي … لان الاكل الحلى الي يكون من العزايم او الطلعات او الي تسونه يعتبر اقل مقارنه باكل الحلى لما نشتريه ويكون متوفر كل يوم بالبيت او غرفتك …

كيف وضعي مع السكر قبل التحدي؟؟؟

صايره لي فتره احب كل يوم احلى … يعني بعد الغدا او العشاء احب اكل ايس كريم او شوكلاته … بس ماني مدمنه شاهي او عصيرات او مشروبات فيها سكر .. كمان مو من النوع الي احب دايم الحلى زي الكيكات واطباق الحلى ..

فببساطه اكلي للحلى محدود هل يعني انه شوي؟؟ لا اوقات اجيب العيد واكل اربع شوكلاتات باليوم وغيره .. بس نتكلم بالشكل العام او الغالب مره باليوم .. واعتبر قليله او محدوده باستهلاك للسكر

كيف وضعي بالتحدي؟؟

توقعت اتعب كثير .. او احس بفرق .. بس للامانه كنت بس اشتهي الحلى وقت الي دايم انا اكله يعني العصريه او بعد وجبه الغدا او العشا ابدا افكر فيه ههههه .. بس قبل هالوقت لا …

فالوضع كان بس كان اني اشتهيه مو احس بتعب او نرفزه او مشكله جسديه بسببه ……

طيب هل كان في بديل؟؟؟

لان تعودت انقنق بعد وجبه الغدا ..صرت اكل شبس (ماهو ضمن التحدي واصلا مالح) … او تمر او فواكه .. يعني الا اكل شي انقنق فيه هههههه

كمان جربت كم نوع بروتين بار .. (هل يعتبرو صحيين .. مو شرط!!) ولكن تعتبر قيمه السكر فيهم اقل من الحلويات العاديه غالبا .. وتكلمت عن تجربتي بالانستقرام … والي يحب الحلى اتوقع مارح يتقبل ان البروتين بار حلى هههه …

هل اكلتي حلى خلال هالفتره ؟؟

هل خبصت بالتحدي وشروطه …الحمدالله لا

من ناحيه هل اكلت حلى بشكل اخر …. كانت ٣ مرات الي كنت بجمعات واكلت حلى فيها وكانت عباره وصله كيكه ومره طبق حلى … وزي ماذكرت طبيعتي مو مره مع الكيك واطباق الحلى فما عطاني شعور الرضا حق الشوكلاته والايس كريم للاسف

اول شي سويتيه لما خلص التحدي ؟

اكلت الحب سنكرز … وبعدها بيوم او اثنين ملك شيك ( اهل الانستقرام يعرفون عشقي للملك شيك)

ايش استفدت ؟

تعرفي ردة فعل جسمك .. وتعلق جسمك .. وطبيعه التعلق خاصه بالاكلات الصناعيه او الي ماهي صحيه … وتشوفي مدى ارتباط جسمك فيه ….

تتوقعي يجي يوم تبطلي فيه السكريات كليا؟؟؟؟

مااتوقع .. ولكن اشوف نفسي اوقف مستقبلا نوع معين من الحلويات .. لان بالنهايه الموازنه هي الغايه مو الحرمان ..

من ناحيه الوزن والشكل هل تغير شي؟؟

انا اسوي رياضه ومرتبه اكلي وكمياتي .. فكان في ولله الحمد تغيير ولكن هل مرتبط باني قللت السكر .؟؟؟ ماتوقع انه كان عامل اساسي ..لان السعرات الي اكل فيها السكر كانت محدود وسعرات لوجبه خفيفه … ولكن اكيد عامل مساعد بسيييط خاصه ان تجيني نفخه وحساسيه من منتجات الحليب … فخفف هالشي نفخه بطني خلال هالفتره بشكل ملحوظ

والنفخه شي يجي ويروح ماتعتبر نزول دهون .. ولكن من ناحيه الراحه من نفخه و دخول الحمام وانتي بكرامه خفت خلال هالفتره .. الحمدالله

تنصحي احد يسوي التحدي؟؟

اكييييد ولكن مده شهر تعتبر للبعض طويله ..فابدي بشروط خفيفه يعني بس وقفي مثلا طبق حلى معين .. او ماتحطي سكر على اكله او مشروب معين .. والباقي عادي … عشان تحبي نمط الحياه الصحيه وماتحسي بحرمان ولا تجي رده فعل عكسيه تماما بعد التحدي ..

بالنهايه

لاتنسو تشاركوا التدوينه مع غيركم .. وتابعوني ع مواقع التواصل الاجتماعي و اذكرولي علاقتكم بالسكر؟؟

مدمنة سكر اولا؟؟؟؟

عيشوا بحب وايجابية

شاركوني أرائكم

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.