بودكاست : 3 طرق تخليك تحبي الخضروات لزيادة المناعه في زمن الكورونا

السلام عليكم ورحمة الله وبركاته

وحشتوني من زمااان عن التدوين .. كيفكم ؟ كيف الحضر ؟ والدوامات مع اوضاع كورونا ؟ الله يحميكم ويشفي مرضانا ومرضى المسلمين

ندخل بالموضوع على طول .. اذا تتابعوني على السناب والانستقرام .. تعرفو ان منصه جرعه من عادة .. صار عندها برنامج بودكاست ولازم تتابعون صفحة جرعه من عادة والبودكاست عشان تشوفوا الحلقات السابقه

البرنامج اسمه SHOTS OF WHAT ?

موجود بالابل بودكاست والساوند كلاود والسبوتيفاي

حلقه الاسبوع والحقلتين الجايه باذن الله مخصصه لوضع الكورونا .. وتكلمت فيها كيف صرت احب اكل خضار أكثر من قبل وصرت اتقبل الخضروات اكثر .. سابقا كنت اكل نوعين او ثلاث بس … بالبودكاست تكلمت عن 3 طرق سهله وتساعدك تبدي عاده صحية مفيده لك

خاصه الان بوضع الازمه الحالي .. مناعتك هي اساسك والسلاح بعد الله بانك تقاتلي هالمرض .. طبعا احنا نعمل بالاسباب والاقدار بيد الله … الخضروات مليانه فيتامينات ومعادن وفوائد كثيره وجباره .. فلابد انك تبدي تخليها جزء من روتين أكلك

فاسمعي البودكاست واستمتعي وان شالله يفيدك ويفيد الي حولك ..

رابط البودكاست

الاسبوع الثالث والرابع من تحدي شهر بدون نفايات LAST WEEK OF MONTH WITH NO WASTE CHALLENGE

السلام عليكم ورحمة الله وبركاته

اخر اسبوعين من تحدي شهر بدون نفايات . الحمدالله بنخلص كلها ايام معدوده . صراحه كانو اسهل واصعب اسبوعين بنفس الوقت . والتحدي استفدت منه كثيييير .. الي تو يقرا عن هالتحدي لازم تقري التدوينات السابقة عشان تعرفي ايش صار وليش بديت هالتحدي

تحدي شهر بدون نفايات

أول اسبوع بتحدي شهر بدون نفايات

ثاني اسبوع في تحدي شهر بدون نفايات

كيف كانوا هالاسبوعين ؟

صراحه كان اسبوع مره سهل والاسبوع الي بعدو كان معقد وصعب … ثالث اسبوع قدرت بشكل كبير امسك نفسي عن اي شي بلاستيك انا شخصيا استخدمه ولكن الاسبوع الي بعده ماضبطت معاي لان كانت في امور غصب فيها بلاستيك .. بمعنى شخصيا وقت الدورة الشهريه احتاج مشروب حليب الشوكلاته ( لا تسالون حتى انا معرف ليش اشتهيه ) فكنت اطلبه او يجني من برا ويكون الكوب فيه غطا بلاستيكي .. برضو كنت اشتهي حلاوه وبالغلط بدون ماانتبه اكلت شوكلاته بعدها استوعبت

كمان لاني مع الاهل فكنا مثلا نستخدم اكياس زباله او يجيبو مقاضي باكياس او اكل يكون مه اكياس ومواعين بلاستيك – لعما اني اجيب مواعيني هههه – او لما نقضي كان في اغراض نحتاجها ( مع العلم حاولت اقضي قد مااقدر بدون بلاستيك ولكن في امور الا فيها بلاستيك

فكان اسبوعين ممتعين مابين حماس الالتزام والمحاولة اننا مانفشل

ايش الي تعلمتيه من هالتجربة ؟

هالتجربة علمتني اننا تعلمنا وتربينا على الكسل بشكل كبير . .. مهما كنا نكافح ومعتمدين على نفسنا الا ان البلاستيك سهل امور كثيره علينا من تغليف اغراض / حمل اشياء / تخفيف غسيل / تخفيف مساحه والاهم تنوع المنتجات الي تكون من البلاستيك .. فغالبا تقولي هاتي ملعقه بلاستيك اسرع بدال مااغسل . او هاتي كيسه بلاستيك من المحل بدال ما اتعنى واجيب كيستي لان مالك خلق تشيلي عفش .. والخ من اسلوب الكسل والدلع

هل معناته الكل متدلع وكسلان بالمعنى او المفهوم العامي للكسل .. لا لا لا .. ولكن تولد فينا نوع من الاتكاليه الي تخلينا نستصعب اوقات ابسط الامور مثلا لو احد قالك شيلي كاستك معاك عشان لو بتشربي بره .. بتقولي لا ليش وشغلانه وتحسي الموضوع كبير وهو بسيط جدا ..

ايش كمان ؟

تعلمت اننا ولله الحمد بنعمة كبير جدا جدا .. بسبب هالاختراع .. صح استهلاكنا له وكثرت الاستخدام خلتنا نسبب اضرار كبيره للارض وبالمقابل لنفسنا .. ولكن لما تتنتبهي للامور من منظور تحدي ( لانك تبدي تدققي بكل صغيره وكبيره ) تستوعبي حجم النعمه والسهولة الي عايشينها بسببه

وكمان بسبب هالاختراع انفتحت ابواب كثيره للرزق للناس .. ابسط مثال ( الي يبيع بليلة يقدر يوفر اكله ويعطيه للغير بعلب بلاستيكه وملعقه بحيث عطانا تجربة الاكل بالكورنيش لان البلاستيك سهل له انه يعطي زباينه برا واسترزق

اللهم لك الحمد دائما وابدا

هل بتكملي تكوني صديقة للبيئة ؟

اي قبل لا ابدا التحدي بديت هالشي ومع التحدي حمسني اكثر .. وليش لا بعد التحدي كمان نكمل ولكن اتوقع مابكون بنفس الالتزام القوي بحاول اخفف واركز اتعود شوي شوي زي ماتعود على الاغراض السابقه عشان تكون اسلوب حياه انا راضيه ومتقبلته

ايش الي ندمتي عليه بهالتحدي

اني ماتجهزت ! لو جهزت الاغراض الي تكلمت عنها سابقا وانا اعرف ان لازم تتوفر كان التحدي بكون شيق وحماس اكثر ومن جد بيكون تحدي أكبر .. ولكن زي ماقلت سابقا رح ابدا اغير امور بمجالات مختلفه ولكن شوي شوي .. هالمره كان التحدي عباره عن ملاحظة وانتبه واستفدت كثير

صح ماطبقته حرفيا ولكن يعتبر شي وجربناه ولله الحمد

تنصحي التحدي لاحد؟

أكيييييييييييييد كل الي يقرا يلا جربنو لو شي واحد تمتنعو عنه وشوفو نفسكم وتجربتكم والاهم شاركوها معاي .. وتابعوني على مواقع التواصل لاني اشارك هاليوميات والشركات الي اتعامل معاها الي تكون صديقة للبيئة

بالنهاية

شكرا لحماسكم ومتابعتكم .. متحمسة نجرب تحدي جديد ونتطور اكثر باذن الله مع بعض

عيشوا بحب وايجابية

ثاني اسبوع من تحدي شهر بدون نفايات second week with no trash for month challenge

السلام عليكم ورحمة الله وبركاته

كيفكم وجيت لكم بتجربتي لثاني اسبوع لتحدي شهر بدون نفايات وهالمره نفس المره الي راحت لازم في اكشن وصدمة .. قبل لا تقروا هالتدوينة رحوا للتدوينه السابقه والتدوينة الي شرحت فيها التحدي ومفهومة

تحدي شهر بدون نفايات وبلاستيك ممكن؟ \ اول أسبوع بتحدي الشهر بدون نفايات كان فشل ذريع

اعلان مهم جدا جدا جدا

اذا ماتعرفو ( اسست منصه جرعه من عادة ) وبنسوي اول ورشه عمل لمده 3 ساعات بالخبر نتعلم كيف نبني عادات جديده بدون ما تاثر على حياتنا وتحسن جودة حياتنا بالاسلوب الي يناسبنا

التسجيل مفتوح للاشتراك المقاعد محدوده وانا الي بقيم هالورشه

تواصلي مع جرعه من عاده على الخاص بالانستقرام بارسال ايميلك اذا حابه خصم على رسوم الورشه او اشتراك بقائمه ايميل المدونة

هالاسبوع كيف كان ياهبه ؟؟؟

للامانه مره احسن بكثيررررررر . ولكن لابد من النفايات لان كم مره جاني اكل وكان باكياس علب بلاستيكية للامانه ماطلبت جاني ههههه ابراءا للذمه

ولكن الي كنت مره فخوره فيه اني حاولت امسك نفسي ماافتح اكياس الكاتشب لان هي بلاستيك ولكن مره وحده فتحت ونسيت .. المرات الجايه لا الحمدالله خليتهم جنبي اطالع فيهم وعيوني كلها شوق وحب واشتثياق << الي مايعرفني ان ااعشق الكاتشب

الاسبوع الي راح صراحه كان اول اسبوع يمر علي اكل من برا كثير … ولكن بالشغل الحمدالله اغراضي معاي من صحون وملاعق وغيره << الي يتابعني سناب او انستقرام يعرف هالشي دايم اصور رحلتي لتخفيف البلاستيك

برضو خرجت للسوق ونسيت كيستي عشان اقضي بدون اكياس بلاستيك بس نشوف الجانب الايجابي شلت معاي قارورة المويه عشان ماشتري مويه بلاستيك

طيب ايش الموضوع الكبير الي صارلي ؟؟؟ او الصدمه ؟

لما رحت السوبر ماركت اقضي اكل لي !!! ياجماعه حرفيا كل شي ببلاستيك او فيه جزء ببلاستيك .. بتقولوا هبه معروف ان الكثير من الاغراض بالسوبر ماركت تكون ببلاستيك

بس ارجع واعيد لما تقولي لنفسك بركز رح تنصدموا لدرجه تقولي لو مافي بلاستيك اتوقع كثير شركات توقف او مانقدر نعيش بدونه > وهذا مو صحيح ولكن الشكل الخارجي من كثير الاعتماد عليه يحوي لك بالفكره

المهم بس قعدت اقضي معلبات هههههههههه او اغراض فيها قطعه صغيره بلاستيك والباقي كرتون ..بس اغلب الاغراض يا كرتون يا معلبه

وهذا بس اسبوعي الثاني والاحداث الي فيه متحمسه للاسبوع الجاي ان شالله اتحسن اكثر

بالنهايه

شكرا على متابعتكم لي واتمنى تنشروا هالتدوينة تشجيعا للي حاب يبدا يحسن حياته .. وشكرا على تشجيعكم ودعمكم لمنصة جرعه من عادة .. واتمنى تشاركوني هالورشه عشان نستفيد سوا باذن الله

عيشوا بحب وايجابية

snap: boosh.life insta: booshlife

الاسبوع الاول لتحدي شهر بدون نفايات !! فشل ذريع ؟ no waste challenge

السلام عليكم ورحمة الله وبركاته

اذا اول مره تقري هالتدوينة وماتعرفي الي التحدي . اقري التدوينة السابقه

تحدي شهر بدون نفايات

هبه بشري كيف الوضع ؟؟

بنااااااااااااااااااااااااااااااات لاالالالالا .. اطول اسبوع مر علي واكثر اسبوع استوعب ان الموضوع مو سهل والمفروض تجهزتله صراحه << لان قلت سابقا بتجهز واجهز اغراض لي ولكن ماسويت

المشكله حتى لو ماجهزت اغراض ومنتجات مو مشكله اقدر اكمل .. المصيبه اني ماجهزت الاكل يعني ماقضيت لي مقاضي العاديه عشان اعرف ايش اكل لان حرفيا كل شي ببلاستيك من ناحيه المقاضي .. مع ان بتقولوا ياهبه معروف ان كل شي مغلف بالبلاستيك ولكن !!!!!!! لوبتركزوا بالموضوع وتحاسبو نفسكم على كل شي بالتفصيل بيكون لكم نظرة مختلفه وأدق .. يعني باختصار بتقولو

وبعددددددديييييييييين كل شوي بلاستيك بوجهي كل شي صغير وكبير فيه بلاستيك

وتستوعبي ان البلاستيك مو بس بلاستيك شفاف او الي متعوده عليه كمان في بلاستيك بانواع مختلفه << مع ان عارفه بس لما تبدي التحدي مدري ليه تنصدمي وتستوعبي اكثر … لا تتريقوا علي جربوا وبعدين نتفاهم

هل التزمت ؟؟؟

لاااااااا … صحيح ان قبل التحدي انا مخففه مره استخدام البلاستيك ذو الاستخدام الواحد … ولكن اتكلم عن باقي الامور … كان مو بيدي اغلب الاوقات .. بمعنى مثلا مره بالشغل طلبت اكل واستعوبت بعدين ان فيه بلاستيك .. او مثلا احد اشترى لي غرض وفيه بلاستيك او انسى شنطتي حق المقاضي .. وهكذا

ايش استفدت ؟؟؟

الموضوع يحتاج وعي … ماهو صعب تطبيقه قد ما ان في مواقف كثيره تكون ضدك او لازم تخبصي .. بس نشوف الاسبوع الجاي باذن الله يكون فيه نتايج مرضية باذن الله

مين بدا معاي هالتجربة ؟؟؟ واذا لا يلا ابدي من بكرا حبه حبه ماحد يجبر هنا الكمال باي رحلة

ولاتنسوا تنشروا التدوينة لغيركم وتتابعو المدونة وحساباتي بمواقع التواصل الاجتماعي

snap : boosh.life insta: booshlife

عيشوا بحب وايجابية

شهر بدون نفايات ؟؟؟؟؟ ممكن ؟

السلام عليكم ورحمة الله وبركاته

تدوينة اليوم تحدي جا فجاءة امس !!! المشكله ان الفكره جات فجاءه ومعناته يا الموضوع بوديني بستين داهيه او مره بيغير فيني وبيفيدني .. حبيت أطرح الفكره على طول عشان أغصب نفسي التزم لاني قولتلكم بسويه فدايم بحط ببالي ان لازم التزم عشان بكتبلكم تجربتي بالمدونة بعد التحدي فلازم التزم للمصداقية الي متعودة أشاركم فيها

التحدي مو غريب علي وفكرته شي انا احبو واطبقه بجز من حياتي .. سويت دورة مجانية بسيطة بالسناب تكلمت عنو و بالاستقرام أشاركم رحلتي كمان .. ولكن هالمره الوضع مره اكبر وأعم وتفصيلي أكثر

تحدي شهر بدون نفايات ؟؟؟؟

الفكره ان خلال شهر كامل ماأسوي أي نفايات واحاول التزم بنمط حياه خالي من البلاستيك واي شي يترمي بالزبالة من كل المجالات أكل لبس واي مشتريات واغراض بيومي

هبه !! مستحيل ماتسوي نفاية بيومك ! مستحيل !! فبتخسري اكيد !

النفايات الي بنتكلم عنها .. نفايات أستهلاكيه .. منتجات أشتريها منتجات استخدمها بحياتي .. والعنصر الأساسي ان النفايات ونوعها الي لازم أوقفها هي الي ماتعاد تدويرها وماتتحلل .. يعني تنرمي ومارح تتحل بس بتاخذ مساحه ع الفاضي بالأرض وبالمكان

ولكن مسموح لي المنتجات الي علبها بتتحلل او يعاد تدويرها او اكيد الاكل الي يتحلل يعني حتى لو في بقايا اكل وترمت رح تتحلل … وهكذا

شروط وقوانين التحدي هي:

المدة : شهر … النفايات الممنوعة : الذي لا يتم إعادة تدويره ولا يتم تحلله .. النفايات المسموحة: النفايات التي تكون قابلة على التحلل وإعادة التدوير .. تطبيقه :على كل مجالات حياتك .كل شي

الصعوبات الي فكرت فيها ؟ بعض منها

اول شي فكرت فيه هو الدجاج ههههههه يجي بصحن وعليه بلاستيك فايش بسوي ؟ ههههه معرف

كمان الأمور الشخصيه مثل انتو بكرامه الفوط الصحية فيها أكياس بلاستيك وهي تكون مغلفه ببلاستيك او العلبه الاساسيه .. عود الاذاني كمان بلاستيك ..

كثير من الاكل يجيك مغلف معناته لازم اسوي اكل بالبيت من الصفر

ايش احساسي قبل لا أبدا ؟

احتاج اقضي هههههههه قبل لا ابدا عشان ما اشتري << خدااااااع هههههه .. بس من جد جد أتكلم احس احتاج اوفر منتجات واغراض صديقة للبيئة عشان تساعدني وتدعمي برحلتي .

فمتوترة وشايله هم ان كيف بسوي خاصه ان الموضوع كبير ومتشعب وحابه اطبقه بالتفصيل حتى لو كان في أمور رح تزعجني بس حابه اتحدى نفسي والاهم اعلم نفسي الصبر والمسؤولية وان مو لازم كل شي يمشي زي ماابغا لازم

احد بيسوي معاي التحدي ؟

لا

والاغراض الي تستخدميها حاليا الي تعتبر نفايات بالنسبه للتحدي ايش رح تسوي فيها ؟

افكر ان يا اكمل استخدمها ( اذا مارح تخلص بالفتره ) يعني مارح تعتبر نفايه أصلا .. او ابطل استخدمها هالفتره واشتري بدائل واشوف التجربة .. وانا افكر بالجواب الثاني اكثر بس بشوف

هل في ميزانية للتحدي

أكيد بحاول احط ميزانية وماابغا اطلع منها واشوف هل تضبط او لا

بالنهاية

أتمنى تشاركوني هالتحدي لو باي أستطاعه تقدرو عليها مو لازم كل شي .. على الأقل حددو غرضولا تستخدموه وتشوفو البدائل ووضعكم بدون هالغرض . ولاتنسوا تتابعوني بالنساب والانستقرام عشان بشارك وضعي خلال هالشهر كامل والاغراض الي شريتها للتحدي كمان

عيشوا بحب وإيجابية

افضل شي حققته بسنه٢٠١٩ my biggest accomplish this year2019

السلام عليكم ورحمه الله وبركاته

تدوينه اليوم قد سبق وشاركتكم فيها ..ولكن بشكل سريع والان جاء الوقت عشان افصلكم هيا لان تستحق كل وحده فيكم تسويها …

ورقه انجازات السنه

هالحركه فكرة فيها لان بكل واقعيه لما نشوف غيرنا سوا بحياتنا الشخصيه او بمواقع التواصل الاجتماعي يطلعو ويجربو ويسافرو ويحتفلو ويشتغلو وينجزون.. تبدا المقارنات الي مو شرط تكون بوعي مننا.. حتى اوقات تكون احساس ان مثلا ليش مامداني اسوي كذا .. ليش مطوله لين مااحقق هالشي..ياليت يمدي اسوي الشي الفلاني… وهي بالواقع بدون وعي مقارنه بحياه الغير ودا طبيعي واصلا لابد منه

ففكرت ان مستحيل حياتي مافيها شي يستحق اني اقول الا والله انجزنا بهالسنه كذا وكذا .. سويت كذا وكذا.. ولكن قد تكون مو بنفس مستوى للامور الي انا اشوفها انجاز … ولكن لابد ان في امور تستحق اننا نستشعر تحقيقها على الاقل واننا سوينا شي

فالقرار كان بكل بساطه …..

ورقه اعلقها باي مكان … انا شخصيا بالثلاجه … وقلم

وفقط اكتب ايش شي سويته جديد او من زمان ماصار او كان حلو او انبسطت فيه..صغير كان او كبير ..عادي او مو عادي

وبس….

النتيجه كانت خررررررررررررررررررراااااااااااافه ..مع ان ماحققت ولاهدف من اهدافي (الانجازات الي اطمحلها) .. ولكن التجربه كانت والله نقطه تحووووووول

ببساطه خلتني اعرف ان حياتي ولو كانت بسيطه او زحمه استمتعت فيها … ان هالسنه في امور سويتها ولازم اعترف فيها..وافرح فيها ..ولو كانت بسيطه .. والاهم احس بشعور الانجاز

طيب ايش كانت الامور الي وثقتيها بالورقه … ؟؟؟

بعيطكم بعض الي كتبته عشان تفهموا المغزى

مثلا كتبت (اجتمعنا جمعه بالسطح مع البنات / زرت محل قرافيتي للنطنطه مع اخواني / سويت لاهلي اطباق صحيه/ سويت تحدي اصحى بدري لاسبوع بس / جربت مطعم او اكله جديده …/شفت فيلم / خلصت مسلسل / اشتريت اجنده/..ماشربت بيبسي/ سويت فرز لاغراضي/ قريت كتاب .وهكذا)

لو اكمل بتحسون معاي ان اوقاتي كانت كلها انجازات … وامور وانشطه كثيره … ولكن هذا وغيره ماكان كل يوم ..ولا كل اسبوع ..يمكن كان بينهم اسابيع وشهور..وماتحسي فيها..ولكن لما تكتبي فجاه تشوفي السنه بمنظور مختلف

ببساطه ……..

حمدت الله …شكرت الله …رضيت وحبيت هالسنه … افتخرت بنفسي… بان هالسنه مرت ببساطه اني عشتها حتى لو ماحققت اهدافي الي اطمحلها…حرام انكر واهمل هالنعم الي صارت وبالعكس..تشوفي هالانجازات الصغيره تخليكي مبسوطه من نفسك وتعطيكي دافع اكبر انك تعيشي الحياه بتفاصيلها الصغيره وتقدري كل شي تسوينه لانك ماخذته بالحسبان

التجربه بسيطه …ولكن اثرها عميق…. اتمنى تجربوها ورح تشكروني وتدعولي….

بالنهايه

لاتنسوا تتابعوني بمواقع التواصل الاجتماعي

عيشوا بحب وايجابية

الموضة الاخلاقية؟ ethical fashion ?

السلام عليكم ورحمة الله وبركاته

اتوقع مر عليكم هالكلمة – مستدامة او اخلاقيا سوا بالعربي او بالانجليزي – سوا مر اولا موضوعنا اليوم عنهم باذن الله .. هالمجال قريب لقلبي كثير لاني حابه اطبقة بحياتي ولكن مو كل شي بهالمجال سهل التطبيق لانه يحتاج عدة اطراف في بعض الاوقات . والبعض الاخر يحتاج فقط مجهودك انتي فقط .. الموضوع كبير بس اليوم بنتكلم عن تجارة الملابس فقط

ايش يعني كلمة مستدامة وأخلاقية ؟؟..

طبعا هنا بالمدونة نشرح بشكل عام مو بشكل مرتب وعربي وفصحى << مو مجالنا ابدا ههههه

الاستدامة : ان تكون انشطتك\ اسلوب حياتك او عملك \الامور الي تستخدميها .. تساعد ان الحياه والارض ماتنضرر او بشكل اعم تديم عمر الارض والحياه والمخلوقات وتقلل النفايات وهكذا

اخلاقيا : تكون انشطتك\ اسلوب حياتك او عملك\ الامور الي تستخدميها.. ماتضر غيرك \ مافيها غش خداع \فيها عدل ومساوة وهكذا

طيب كيف هالكلمات تنطبق بتجارة الملابس ؟؟

في شركات مستدامة من ناحيه اسلوب عملهم .. ياخذوا بقايا الاقمشة ويعديوا استخدامها .\ يقللو استخدام البلاستيك ا\ يعتمدوا مواد واقمشة ماتضر البيئة ..\ وهكذا

في شركات اخلاقية من ناحية.. تصنيع موادهم تكو نفي مصانع تهتم بالايدي العاملة اكثر \تعطيهم رواتب وبيئة عمل طيبة وتحترم الانسان \ مافيها ظلم \ وهكذا

قد تكون الشركه الاخلاقية شركة ايضا مستدامة .. والمستدامة ايضا اخلاقية .. وقد تكون الشركة اما فقط اخلاقية او مستدامة ..

بتكلم اكثر عن الشركات الاخلاقية لان فيها تساؤلات كثير ..

اولا ليش اسعار الشركات الاخلاقية جدا جدا جدا عالية – اسعار الملابس

ثانيا: ليش تصاميم الشركات الاخلاقية مو دايما متماشيه مع موضة العصر واليوم

ثالثا: ليش مو متوفر شركات اخلاقية كثيره

رابعا: ليش الشركات الاخلاقية مو متاحه بالاسواق العامه بكثرة

ليش كل هالاسباب؟؟ ليش صعبه ان اخذ واشتري قطع مصنعه ومصممه بشكل اخلاقي ؟

لان تصنيعها صعب .. بسبب كثرة المصانع والتجار الي يهمهم الفلوس فقط فصاروا مايهتموا ببيئة العمل بالمصانع ويقللو التكاليف فيها قدر المستطاع لدرجه يروحوا للبلدان والاشخاص الي يحتاجوا لو ريال بس باليوم عشان يعيشوا ويخلوهم يشتغلوا لساعات وايام دون توقف وبالمقابل كم ريال باليوم !!. برضو بيئة العمل جدا سيئة وكثير تصير حوادث حرق \هدم على ناس يشتغلو.. والاكثر ان صاروا يشغلو الاطفال باعمال يمكن الكبار يتعبوا فيها بس عشان يصنعوا لنا ملابس رخيصه اومتجدده وباسعار رخيصه او غاليه ولكن ع حساب غيرنا بشكل غير اخلاقي ولا عدل ابدا

فالشركات الاخلاقية .. تحاول تحصل مصانع تحترم الانسان \ وفيها بيئة مهيئة للانسان وفيها صيانه وحمايه\ وتعطي رواتب عادلة.. وتفتح فرص عمل وتطوير للاشخاص والي بالمقابل يحسن عيشتهم وعيشة البلد ..وهذا صعب ومو سهل وغالبا مو رخيص

كمان تصينع كميات كبيرة معناتها .. شغل طوووويل .. اواعتماد على اجهزة والالات واهمال الانسان.. او العكس ضغط على الانسان بشكل كبير والحصول على اي اسلوب يسهل عملية الانتاج ولو ع حساب اهمال العمال ماديا واخلاقيا … فالشركات الاخلاقية تحاول تقلل من الانتاج او تنتج بكمية معقولة

المواد ومصادرها .. كمان صعب مو بس تصنيع المنتجات .. من وين تجي كل المواد الي تصنع منتجك .. مثلا الملابس ( الخامات \ الاكسسوارات ..والخ) من وين تجي وين هالمصانع مين يسويها .. وبعدين مين يجيبها للمصنع الي بيصنع المنتج النهائي وهكذا .. كلها تحتاج معرفة واختيار دقيق عشان تتماشى اخلاقيا .. فاوقات يكون صعب جدا على الشركات ويقلل قدرتهم على تصنيع منتجات بخامات وتصاميم معينة او الي تتماشى مع الموضه العصرية بسبب قلة المصانع والتصنيع الاخلاقي

كمان فوق تكلفة المصانع ومن وين نجيبها .. في تكلفة الفريق والشركة نفسها ( المسوقين \ المصممين\الموارد \الموظفين والخ ) في رواتب وفي مصاريف تشغيلية .. فكلها تزيد من سعر المنتج عشان يقدروا يسددوا موبس للشركة وموظفينها كمان للمصانع والموردين

كم الاسعار تقريبا ؟؟

شخصيا من خلال بحثي المتواضع للكثير من الشركات والمحلات .. يعني جدا طبيعي سعر 300 او 400 ريال ومافوق على بلوزة سادة بيضاء .. اوعلى فستان خفيف مره للبيت . يعني مقارنة باسعار السوق السريع ( الغير اخلاقي – الي معانته اغلب المحلات المشهورة والموجوده بالعالم) يعتبر اسعار الشركات الاخلاقية مرررررره غالي للمستهلك العادي

فالفئة الي نقدر نقول تقدر تشتري منهم تعتبر الفئة من المتوسط العالي ومافوق .. لو بنتكلم انهم يعتمدوا يشتروا دايما من الشركات الاخلاقية بشكل اساسي بدون مايروحوا للشركات السريعه ( القصد السريعه هي مثلا زي اتش اند ام \ زارا \او المحلات الرخيصه جدا .. وهكذا ) .. وخاصة لو بنتكلم كمستهلك عربي زائد عليك سعر الشحنة .لان غالبا هالشركات الاخلاقيه أجنبية

ولكن مو معناته المستهلك العادي – الفئة المتوسطه والبسيطه ماتقدر تشتري منهم .. تقدر ولكن

تحتاجي موازنة لميزانيتك لو بنتكلم بشكل واقعي .. لان تقريبا يمكن يكلفك كثير … الا اذا انتي مقتصده وماتشتري كثير ..بتقدري ليش لا .. ولكن يحتاج موازنة

مافي محلات اسعارها رخيصة ؟

في رخيص ولكن يعتبر برضو غالي او اعلى سعرا مقارنة بالسوق السريع .. ولكن في مجال تحصلي اسعار تناسبك

شخصيا هل جربت ملابس شركات اخلاقية ؟؟

لا .. ولكن افكر اشتري واجرب ..شخصيا اعرف اني مارح اتنازل عن الشركات السريع لان واقعيا (اسهل الوصول لمنتجاتهم \ تنوع البضائع \ الاسعار تنافسية ) .. ولكن بشكل جدي أفكر شوي شوي اغير منهم واحول للاخلاقي .. بس اكيد خطوة بخطوة

ليش مهم لنا نحول للشركات الاخلاقية ؟؟

كمستهلكين احنا بيدنا قوة جبارة .. الان عندنا القدرة نخلي اي شركه تغير كل شي فيها على حسب مزاجنا.. مثلا لاننا صايرين نحب السوشل ميديا الشركات تجري ورانا وصارت تسوي دعايات وتتعاون مع مشاهير عشان احنا كمستهليكن نحبهم .. الان الشركات بدت تفكر تكون مستديمه لان شايفه ان المستهلكين مو عاجبهم كثرة النفايات .. الشركات بدت تضيف اصناف نباتيه لان شافت المستهلكين يطلبوا هالشي ..

فكمسلمين اولا ثم اخلاقيا . .اننا نطالب بان الي بحط فيه فلوسي يكون اخلاقي وعادل ومافيه ظلم لاشخاص ثانيه ويساعد يكبر دول ومجتمعات فقيرة لان هذا حق لهم علينا دام لناالقدرة لو بنسبة بسيطه

من الملهمين العرب الي حصلتهم يهتموا بهالموضوع . سوكري لايف .. وهذا حسابها ومدونتها

http://sukkarilife.com/

http://instagram.com/sukkarilife




برضو تعرفت مؤخرا على هالشخصي وماركتها للملابس
@feddaeveryday

بالنهاية

اتمنى تنشروا هالموضوع .. تفكروا فيه ولو للحظة .. نحاول نطبق التصرفات الاخلاقية بحياتنا كمستهلكين ولو ماكانت شراء ملابس .. تابعوني على الانستقرام دايم اشارك خطواتي وعاداتي لحياه اكثر أخلاقية

@booshlife @soa_wellness

روابط تهمك بموضوع الموضة الاخلاقية – محلات اخاقية او مواضيع

اطلبي المساعدة ! لانك تضيعي وقتك .ask for help you r wasting your time

السلام عليكم ورحمة الله وبركاته

تدوينة اليوم تتكلم عن شي ما اتوقع اني الوحيده الي اواجهه .. ولا انا الوحيده الي تفكر فيه… ولكن هالموضوع يمكن مانتكلم عنه او منتشر بيننا لانه شعور شخصي .. نستحي نقوله اوقات او بدون مانحس فيه تصرف نسويه

ابغا اتكلم عنه لان اكيد هو أحد اسباب تأخر الكثير بانجازاتهم مهما كانت أختلافها سوا كانت انجازات شخصيه \ مهنية \ اجتماعيه والخ وهو

طلب المساعدة من احد !!!!

جميل في كثير من الثقافات واساليب التربية مفهوم ( سويه بنفسك , مو لازم احد يساعدك ) .. وانا معاه بتطبيقه بحياتنا بكثير من المجالات

ومن جهه اخرى تربينا ان اي احد يحقق شي جميل وحلو وكبير ننكر مجهودة ونقول ( لان عنده مساعدين \ في احد يساعدها ببيتها \ عندها الي يجبلها \ عندها فلوس تسويه بلحظة \ جابت اكيد احد يسويلها والخ) وننكر مجهودها وتعبها بس لان عندها القدرة ان تحصل على مساعدات

ليش نطلب مساعدة اذا نقدر نسويها بنفسنا او غيرنا سواها بنفسه ؟؟

في اوقات انت كشخص صعبه عليك تحقق هدفك لحالك – ولو كان صغير – اوقات يكون وضعك لابد لابد من وجود مساعدة ويد ثالثه , مو بالضرورة لغرض جدا مصيري ولكن ببساطه لانك حاولت بكل مجهود لك وكل قدراتك وماقدرت تنجزة

الي لازم نستوعبه اننا اشخاص مختلفين الطباع \ الاهتمام \ المجهود\ والفكر .. وحده تشوف ان لازم كل يوم تهتم البنت بنفسها بكريمات وماسكات وحده ثانيه تشوف ماله داعي لين البنت تكون بالعشرينات .. وحده تكره غسيل المواعين ووحده تحب تهتم بمكانها واغراضها .. وحده تحب تتطور وتغير من نفسها كل ماشافت اغلاط في حياتها ووحده ماتحب التغيير ..والخ

فاكيد بالمقابل مابنكون بنفس الانجاز!! وهنا تجي دور المساعدات

ولكن !! قبل لا أكمل

شخصيا مع ! وأؤمن ان الشخص لابد لابد لابد يبذل اولا جهد بينه وبين نفسه لحد التعب !!

بمعنى حاول حاول حاول !! حاول بمختلف الطرق ! اذا لاحظت مانفع معك بعدها ابداء بالمساعدات .. لان المحاولات احتمال تبين لك شخصيتك وتبين قدراتك فتعرف نوع المساعده الي تحتاجها ووين .. او بالمحاولة تحقق هدفك بدون مساعدات بكل بساطه

فانا مع المحاولات بينك وبين نفسك وحتى الواحد يتعلم تحمل المسؤولية ومايرمي على غيره ويقدر بعدها كمية التعب والمجهود المبذول وبالمقابل بيقدر الي بيساعده

نرجع لموضوعنا

مثل ماقلت سابقا.. لاننا مختلفين فاكيد بعضنا بيحتاج مساعده وبعضنا لا .. والاهم وين نحتاج مساعده قد تختلف من شخص لاخر

وحده تقول ماله داعي احد يعلمني كيف انحف بخفف اكل وبس لان عندها ارادة قوية او ماتفكر بتفاصيل الاكل الصحي .. ووحده تقول لا انا ماقدر ع الاكل لازم احد فوقي .. وحده تشوف ضروري مساعده باعمال البيت ووحده تشوف ماله داعي دام البيت صغير .. وكلنا لنا أراء خاصه فينا وعن غيرنا .. ولكن بالنهايه نحسن الظن وندعي لغيرنا بدون تقليل من قدرهم او شخصيتهم

طيب ليش اوقات مانطلب المساعده واحنا نعرف نحتاجها ؟؟

من الفكر الي تكلمت عنه اول ..الي هو ( لازم تسويه بنفسك ! والي عنده مساعدات مايعتبر سوا شي لان غيره الي سواه وننكر جهودة ) . فانا شخصيا من الناس الي اوقات اواجه صعوبة اطلب مساعدات .. لان اشوف في فرصه اني اقدر انجزها بنفسي او غالبا بسبب نظرة الي ( هي ماسوت شي خلت احد يساعدها ! ) الي تخليني ابطل من طلب المساعده واستحي لان افكر نظرتهم هي واقع لي .. ولكن قاعده اغير هالتفكير وادري انتوا مثلي ..

وصرت افكر كذا ؟؟

مثلا المشاهير – ابسط مثال – .. صح عندهم مدرب شخصي \ اخصائي تغذية \احد يرتبلهم بيتهم ويطبخ \احد يسويلهم شعر ومكياج.. عشان يخلي جسمهم وشكلهم مرتب ..

ولكن فكري من جهه اخرى … هي تصحى من خسمه الصبح عشان تدرب , المدرب مايرفع يداتها ويحرك رجولها ويسوي التمارين عنها – تقدر تقول مو اليوم تبطل وهو بيقول طيب .. اخصائي التغذئية مو هي الي تغصبها تاكل وتاكلها الاكل بنفسها .. هي ترتبلها الاكل وتعطيها وهي تلتزم بالاكل وماتخبص لما تكون برا وتحاول تمسك نفسها .. تقدر تخبص كل شوي وماتلتزم حتى لو دفعلتها .. والي يساعدونها ببشرتها وعيادات التجميل لابد من جهد وشغل والتزام من جهتها تسويه عشان النتائج تطلع

صح طلبت مساعدات وصح نتايجها بتكون اسرع من غيرها ولكن مو معناته مابذلت جهد كبير والتزام وادارة ومحاولات .. فلابد ان هي كمان لها سبب بعد الله اكيد والمساعدات بهالانجاز

مع ان لو بنفكر فيها باسهل منطق وقت المشاهير وشغلهم جدا مزحوم .. وهم عرضه اكثر للتخبيص والكسل والتهاون

هذا مثل .. وفي غيرهم كثيرلو بنتكلم ان ناس عادية اكيد حولك وحده يمكن انتي شخصيا عندك مساعدات او تسهيلات بحياتك اكثر منها ولكن هي منجزه اكثر منك سوا بامور شخصيه او مهنية وغيرها .. اوانتي شخصيا ماعندك تسهيلات ومساعدات بس منجزه اكثر من الي عندها كل الطرق انها توصل لهدفاه اكثر منك .

.. المساعدات ماتقلل من انجازك وتعبك الي حطيتيه في هدفك

كوننا مسلمين نحتاج نطلب العلم والعلم مو بس كثقافه بس كمان كمساعدة.. ومو شرط نكون نطلب المساعده بكل شي ولكن المجالات الي تكوني حاولتي كثير فيها وفشلتي .. حاولي تشوفي مساعدة ولا تستحي بالعكس هذا دليل على انك تبغي تحسني وتعدلي من نفسك وماتضيعي وقتك ..

قد تكون المساعدة مثلا .. تشتركي بنادي او مع اخصائية عشان تعدلي جسمك واكلك … يمكن مساعدة باحد يدورلك على وظيفة .. يمكن احد يساعدك بالبيت وتنظيمة .. يمكن احد يدرسك .. احد يرشدك ويعطيكي نصحية .. والخ

مثلا ( اعلان لي عشان تربحوني أقصد تساعدوني ههههههه ) .. يجوني بنات يبغو ينجزوا بيومهم .. حابين يومهم مايضيع كله على امور ممله مثلا دراسة \ تنظيف \امور كلها شغل ولغيرهم.. فاساعدهم نسوي روتين يومي يعطون نفسهم حق \ هوايتهم حق \ اولوياتهم ومسوؤلياتهم حق .. ويبقى باقي اليوم يتسدحون ويروقون

والاجمل ان هالخدمة اقل من 40 ريال .. ومرنه وتقدري تضيفي وتغيري فيها ..

للاشتراك

القائمة ——> تصميم روتين خاص فيك —- >واضغطي الصفحه—-> واشتركي بالباقه الي تناسبك

الباقات مختلفه في للي بالبيت .. الي يدرسوا او يدرسوا .. للموظفات .. لروتين الصباح فقط او الليل فقط.. وغيره

بالنهاية

انا شخصيا رح أبدا اطلب مساعدة في بعض المجالات .. واحاول اغير من تفكيري ان المساعده ماتهمل مجهودي المبذول كمان .. وانتي كمان لا توقفي وتضيعي وقتك اذا تقدري تطلبي المساعده اطلبي

لاتنسوا تشاركوا هالتدوينة لغيركم عشان تحمسوهم يتطوروا ويتغيروا .. ولاتنسوا تتابعوني على الانستقرام ليومياتي الصحية

عيشوا بحب وإيجابية

تحدي أسبوع بدون مواقع تواصل |تجربتي my try|a week with no soical media

السلام عليكم ورحمة الله وبركاته

تجربة هالاسبوع كانت .. خمس ساعات بدون مواقع تواصل إجتماعي – سوشل ميديا- من اول ما اصحى

الفكره شخصيا مطبقتها من زمان ولكن لمده اطول ( شهر ) وبشكل كلي تقريبا كل سنه مره . والنتيجه رووووعه ولكن قررت اني احاول اسوي تحكم بنفسي اكثر بشكل مرن وان اجرب يوميا بدال مااسوي قطع نهائي لفتره وارجع لعادتي .. والفكره كانت

من اول مااصحى لمده خمس ساعات مااستخدم مواقع التواصل الاجتماعي

والبنات بالانستقرام حبوا الفكره وشاركوا معاي ..واذا حابين تشاركوا بتحدي الاسبوع الجاي لا تنسوا تتابعوا المدونة وحسابي بالانستقرام

كيف كنت قبل التجربة ؟ هل انا مدمنة مواقع تواصل إجتماعي

شخصيا اعتبر نفسي مو مدمنة .. ولكن كل ماكان في فرصه فتحت جوالي وتفرجت .. وخاصه يوتيوب بشكل كبير . اقول مو مدمنة لان لو قفل جوالي – خلص الشاحن وغيره – مو مهتمه اني اشحنه او يكون شغال دايم اذا مو لحاجه ضرورية .. ولكن برضو اعتبر سئية من ناحيه كثرة فتح هالمواقع باليوم بشكل متكرر كثير طول اليوم

ليش تحديدا اول مااصحى ؟ مو خلال اليوم ؟

سمعت برنامج صوتي بالبودكاست اسمه

onpurpose with jay shetty

انصحكم جدا تسمعوله لو تعرفوا انجليزي .. ملهم وجميل .. واذا مهتمين ببرامج البودكاست في موضوع لافضل برامج اسمعها حاليا – هنا

وكان ينصح ان مخك اول ماتصحى يكون بقمة الهدوء والنشاط لما تفتح مواقع التواصل – صح ماتسوي شي غير تتفرج – ولكن مخك يشتغل بسرعه كبيره لانه يفكر – هالشخص ايش سواء \ مين رد \ ايش قال \وين راحت \ ايش صار بسفرتها \ لبسها حلو \ عجبني دا الشي والخ من الافكار السريعه جدا جدا .. تخلينا مشحونين بطاقه مزعجه

فجرب تعطي بداية يومك حقها وتمشي بيومك بامور ثانية مثلا – تتجهزي لدوام \ او تصحي لفطور \تسوي اشغالك \تتفرجي تصلي وهكذا امور خفيف ع المخ

كيف التجربة ؟

رووووووووووووووووووعه روووووووووووووعه

صراحه ماتوقعت ان بخمس ساعات بيكون في وقت كثيرر وحتى الدقايق تحسين فيها حتى لو كنتي منشغله بس بتحسي بكثرة الوقت وبركته

ثانيا لاحظت نفسيتي لليوم مهما كان مزحوم مررررررررررره هادية بشكل كبير ولله الحمد

ثالثا اصلن يكون في حماس تفتحي مواقع التواصل وتتفرجي وانتي متحمسه ومخلصه امورك كمان لو نص منها

رابعا : اكيد اوقات افتح بالغلط .. اكون فاضيه وامسك الجوال واضغك عالتطبيق بس بسررعه اطلع حتى مااقعد او اذا ضروري الواتس اب ارد ع احد مهم ولكن ماصارت الا مره هالاسبوع الحمدالله وبرضو ماافتح اي رسايل ثانيه او اشوفها

النتيجه ؟ تنصحي غيرك ؟ بتكملي تسويها ؟

برضو ارجع اعيد التجربة رووووعه حسيت من جد بانجاز هالاسبوع وباليوم كيف طويل ولله الحمد مع ان كان اكثر اسبوع مضغوطه فيه .. اكيد انصحكم وانصح اي احد يجرب هالتجربة .. وباذن الله بحاول اخليها عاده او اسويها كل فتره لانها من جدد كانت لصالحي بكل مجالات حياتي

بالنهاية

لاتنسوا تتابعوني على المدونه لكل جديد والانستقرام وتشوفوا يومياتي الصحية وبرضو تعرفوا تحدي الاسبوع الجاي وكمان شاركوا غيركم هالتدوينة عشان يتحمسوا كمان

عيشوا بحب وايجابية

insta : booshlife snap: boosh.life

عشر الاف خطوه باليوم ونتايجها | تجربتي 10000steps per a day |my try

السلام عليكم ورحمة الله وبركاته

تجربة جديده ..لمده اسبوع

قررت ان كل اسبوع خلال شهر اسوي تحدي صحي..فقررت الاسبوع الماضي اذكر تحديات على الانستقرام والتصويت يكون لكم واخترتم ان نبدا نسوي – تحدي العشر الاف خطوه باليوم .. وهالتدوينه ذكر لتجربتي

وشكرا لكل الي تحمس وشارك ..وقعدنا نتواصل على الخاص

لاتنسوا تتابعوني على الانستقرام(@booshlife )عشان تعرفوا بالتحديات الجايه ..وتحدي هالاسبوع الجديد بيكون ( ماافتح مواقع التواصل الاجتماعي الا بعد خمس ساعات من صحياني )..

نرجع لتحدينا الاول وهو: ١٠،٠٠٠خطوه باليوم

ليه سويت هالتحدي؟ ايش الفائده منه؟

الخطوات او المشي هو اساس تكوين الجسم ..الجسم مصمم عشان سبحان الله يمشي.. وتقدروا تقروا فوائد المشي وكيف انه يحرك كل الجسم والمفاصل والعضلات…فهو حركه رياضيه اساسيه

والكثير من الدكاتره والاخصائين الرياضين .. يفضلون ان الشخص يمشي خلال اليوم افضل من انه بس يتمرن ساعه وباقي اليوم بدون حركه

والرقم عشر الاف خطوه ..هو رقم ينصح فيه كدلاله على وجود نشاط ممتاز خلال اليوم قام فيه الجسم

وهالموضوع شرحه طويل وتقدروا تبحثوا عنه بالتفصيل لاني مو مختصه

ولكن شخصيا كنت سابقا امشي وامشي لساعه ولله الحمد ولكن وقفت فتره..فحبيت ارجع واتحدى نفسي لو احاول بس

كيف الاسبوع كان وهل حققت الهدف ؟؟

اول كم يوم كان جدااا صعب اني احصل وقت امشي فيه… كان اغلبه جمعات عائليه والتزامات شغل

بعدها قررت ان بحاول لو نص ساعه ع الاقل هههههه ولا يروح التحدي بدون محاوله ..

فالحمدالله قدرت ع اخر كم يوم احاول اغلب يومي امشي (مو مخصصه وقت للمشي الا بس كان حق يوم او يومين خصصته لمده اقل من نص ساعه/ ولكن حاولت كل هالايام نشاطاتي والتزاماتي وطلعاتي تكون فيها حركه ومشي)

ولكن للاسف ماقدرت احقق المطلوب بالمشي بان غالبا مااكون مشيت مابين ٤٠٠٠ و٦٠٠٠

طيب كيف حسبت خطواتي او كيف احسب خطواتي؟

بالوقت (تقريبا ١٠٠٠٠ تساوي ساعتين تقريبا مخصصه للمشي )

او بجوالك تقدري تحسبي يكون معاكي وانتي تمشي

او تشتري ساعه رياضيه واسعارها تتفاوت ع حسب مميزاتها الزياده ولكن كلها تحسب الخطوات (٩٩ الى٢٠٠٠ ريال تقريبا )

التجربه هذي ايش فادتني فيه؟؟

اولا عرفت اني احتاج اركز ع نشاطي اكثر واتحرك اكثر

ثانيا عرفت ان مو شرط لانك تحسي انك تتحركي كثير معناته من جد قاعده تتحركي كثير اغلبها يمكن نحس بالتعب لاننا نسوي امورثانيه مع المشي فنحس باننا نبذل كثييييير.

ثالثا اذا انتي مهتمه بالمشي والحركه والرياضه استثمري بساعه رياضيه (هي مو مهمه ولا اساسيه ابداااا ) ولكن كدعم لك وتشجيع لهدفك اذا (لاحظتي انك مستمتره ع المشي والحركه وهذا هدفك )

حلو لو شريتيها ولكن شخصيا مااشوفها اساسيه او ضروريه ابدااا لان غالبا امشي واخصص وقت للمشي والاحظ فرق بجسمي ومرونتي وبدون ساعه ولا شي ولله الحمد

رابعا الحركه بركه ..وكثرت الحركه لاحظتها (مع اني ماحققت الهدف ) قد ايش تغير بنفسيتك وبيومك. حتى لو بوقتها تتعبين ولكن بعد ماتريحي رح تشوفي قد ايش فيك نشاط وحيويه

بالنهايه

تجربه جميله ..صح فشلت ولكن يكفي شرف المحاولة.. لاتنسوا تشاركوا هالتدوينة مع غيركم عشان يتحمسوا..ولاتنسوا كمان تتابعوني بالانستقرام وعالمدونة لكل مواضيع ويومياتي الصحيه

عيشوا بحب وايجابية

instagram: booshlife