كيف أتمرن وانا يومي مزدحمhow to workout on a busy day

السلام عليكم ورحمة الله وبركاته

تدوينة اليوم أصلن اهداء لي قبل لكم ههههههه .. عشان أرجع أذكر نفسي اني اقدر اهتم بنشاطي حتى لو كان يومي مشغول ومزدحم .. والاهم اني أشاركه معكم عشان تتحمسوا وتحسوا بأنكم قادرين تسون أشياء كثيره بيومكم مهما كنتم مشغلين

كيف أتمرن وأنا يومي مشغول

الطرق الي بشاركم هي كالعادة من تجاربي الشخصية الي طبقتها بعد ماقريت وبحثت بالموضوع فرح أعطيكم الي ضبط معاي كمصداقية لهالاساليب الي بذكرها

خليني أساعدك بكل بساطة

اذا ماتعرفوا تكلمت بتدوينة سابقة اني فتحت باب الاشتراك معاي لتكوين جدول خاص فيك لروتين الصباح والمساء فقط ب15 ريال …

هالجداول رح تتضمن كل شي ودك تنجزية لنفسك – دراستك – شغلك – عيالك – اهلك – هوايتك – مسوؤلياتك وغيرها

الاهم ان هالجداول مرنه جدا وخفيفه باختصار تقدري تسوي أكثر من خمس اشياء في أقل من ساعة ولسا باقي فيومك ثلاثة وعشرين ساعة لباقي مهامك وارتباطاتك

تقدروا تتواصلوا معاي عن طريق الايميل

booshlife@outlook.com

قللي فتره التمرين

البعض يحسب لازم ساعه ساعتين تتمرنين عشان تستفيدين – وهذا غلط – لان مدة التمرين يمكن تكون نتايجها عكسية لو كانت طويله اذا ما انتبهي لامور ثانيه مثل النوم الاكل التعب وغيره .. وبرضو يمكن هالساعتين يستفيد منها البعض ولكن ليست قاعدة أساسيه بان المدة لازم تكون طويلة حق التمرين عشان نتايج حلوة

الاهم هو الاستمرارية

فخصصي على الاقل خمس دقايق من يومك لرياضتك خليها رياضة فيها قوة نشاط عاليه عشان تستفيدي من جد من هالوقت القصير مثلا – نط الحبل – رياضات عالية الشدة (شرح مبسط لها هنا)- جري وهكذا

اول شي تسوينه بيومك

اول ماتصحي من النوم خلي التمرين هو اول مهمة تسوينها عشان تفتكي منها وبرضو تكون بوقت قوتك ونشاطك … والصبح فيه بركة عظيمة الوقت فيه بطيئ سبحان الله فاستغلوا هالشي خاصة الي عندهم دوام

اذا مايمدي لاصحاب الدوامات انهم يسوا تمارين بعد الداوم .. فافضل شي وقت الصبح .. لو تصحوا ابكر بدقايق تنطوا حبل او تجروا وبعدها تجهزوا للدوام رح تحسوا بنشاط وحيويه أفضل من باقي الايام -بس أكيد مو على حساب نومكم .. اذا مره نعسانين النوم افضل لراحة الجسم – بس حاولوا تعدلوا نومكم لو تبغوا تتمرنوا الصبح

خصصي وقت للتمرين بعد مهامك

كلنا نحوس مابين الي لازم نسويه \ ونبغا نسويه \ وودنا نسويه \ والي مفروض علينا نسويه .. وهذا طبيعي جداا .. فحاولي برضو تخصصي فتره لنفسك وفيها تتمرني .. مثلا لما تخلصي من مذاكرة او برنامج او قبل النوم خصصي هالفتره للمشي شوي \ تمرين خفيف .. مو لازم تكون الصبح او بوقت معين خليها بعد مهمة معينة عشان لا تنسيها

قلدي روتين الناجحين

روتينهم قريب جدا من أسلوب تصميمي لروتينات المشتركين … الجميل فيه انه مركز ومرن وسهل وهذا الي يخلي الناجحين يقدروا ينجحوا بشغلهم وبرضوا عندهم جسم حلو وبرضو يحضروا اجتماعاتهم العائليه وبرضو يتعلموا هوايات ثانيه

فقلدي الناجحين باسلوب روتينهم .. طبعا في روتيات مختلفه على حسب كل شخص أكيد .. فشوفي أكثر شخصية قريبه منك ومن هدفك وتابعيها وطبقي زيها او قريب من أسلوبها

بالنهاية

كلنا نحاول نوصل لاهدافنا .. مو مشكلة لو وقفتوا تلخبطوا المهم نرجع ونحاول

لا تنسوا تشاركوا هالتدوينة مع غيركم وتتابعوني بوسائل التواصل الاجتماعي

insta : booshlife snap: boosh.life

تجربتي| لعلاج تساقط الشعر بالثوم وزيت الزيتون garlic for hair loss

السلام عليكم ورحمة الله وبركاته

تدوينة اليوم كنت متحمسة أكتبها بس حبيت اشاركم هيا بعد ما اعطيها وقت عشان اكون صريحه معكم

بعد مانظمت لي جدول عناية أسبوعي والي جدا ساعدني التزم بهالتجربة لان الجدول جدا مرن .. ولي تدوينة سابقة تكلمت عن كيف أساعدكم تسو جداول خاصه فيكم لترتيب اولوياتكم بشكل مرن وسريع وخفيف … اقروها هنا .. خطوة واحده لترتيب يومك –

مشكلتي مع التساقط

طبعا التساقط شي طبيعي .. ولكن المشكله تكون من ناحيه كمية التساقط .. وجتني فتره قريبه التساقط كان باختصار يخووووف لان امشط ينزل كثيير لدرجة خصل ( زي لما تقطعي شعر عروسة الباربي قطعه مو بس شعرات ) وحتى لما اتروش ينزل .. ولما حتى بس انزل ربطة الشعر من شعري يكون فيها شعر كثير .. لدرجه اوقات ابكي واحس اني بصلع او فيني حاجه

السبب؟

ماعرف للاسف … ولكن الفتره الي بدا فيها التساقط كنت اسوي حنه أسبوعيا وفيها خلطه يعني مو حنه بس .. وقالولي يمكن من العسل الي فالخلطة او الحنه نفسها مانسبتني ( مع اني من زمان كنت اسويها ومافي مشاكل ) .. فوقفت الحنه ..

وبرضو بديت اخذ حبوب فيتامينات بهالوقت مع حبوب حق شعر .. حق كم يوم بس حتى ماكملت اربع ايام .. بس قعدت اقرا انو حتى حق الشعر الحبوب يمكن تكون حبوب فيتامينات متعدده فماينفع اكل اثنين سوا فيزيد نسبة الفيتامينات ورح يكون نتايجه عكسية … فقلت بوقف الاثنين سوا عشان انتبه لو في توقف في التساقط اعرف انو اذا منهم او لا بعدين ارجع لواحد بس لا الفيتامينات كويسه بس النسب والكميه مهمه ماتكون كثيره

بالنسبة لاكلي متنوع ولكن مو مرتب ومنظم بالاونة الاخيرة من ناحيه كمية الخضار .. ويمكن يكون نقص في شي

بس هالامور الجديده الي صرات خلال فتره الي لاحظت فيها تساقط زاد

هل توقف بعد ماوقفتي هالامور ؟

لا !

كيف حصلت خلطة الثوم وزيت الزيتون ؟

من البحث بجوجل واليوتيوب .. حصلت مقابلة لبرنامج وكان في ضيافه شخصية تكلمت عن الزيت الزيتون والثوم للشعر وفوائده للتساقط …

فما قريت بشكل كبير عن الموضوع غير من هالمقابلات التلفزيونيه وشوي صفحات بالانترنيت … فما اقولكم هو الحل .. اعطيكم تجربتي وانتو انتبهوا

انتبهوا ع نفسكم ويا تقروا اكثر وأسألوا عن الموضوع وهل له اثار جانبية حسب حالاتكم الصحيه او نوع الشعر وغيره

كيف الخلطة ؟

بعلبة حطي كمية من زيت الزيتون مع كم فص ثوم بدون ما تقطعيه ( حطيت أقل من النص زيت لان العلبه مو صغيره ).. لا تكثري ثوم .. وقفلي العلبه وخليه ليوم كامل او يومين وأكثر .. عشان يتخلل الثوم مع الزيت مزبوط

بعد هالفتره .. شيلي الثوم من الزيت .. وبس استخدمي الزيت لفروة الشعر فقط مو تزيتي الشعر كولو .. خذي شوي شوي وادهنيه على فروة الشعر باصابعك او بمنديل وقسمي الشعر عشان تلامسي الفروة او بقارورة وفيها راس صغير عشان تصبي ع طول للفروة زي الصورة حقي << دي العلبه حقت صبغة الشعر فخليتها للزيت

وبعدين افركي الفروة كويس وباقي شعرك لو تبغي حطي عليه اي زيت ثاني .. انا كنت احط زيت جوز الهند

المدة على الشعر ؟

تقريبا انا احطو نص ساعه .. بس لا تطولو المده يا نص ساعه يا اقل عشانو حار .. بتحسي بحراره او زي الدغدعه بشعرك لفتره بسيطة

مرة كل أسبوع أسوي هالخلطة .. كل سبت تقريبا

كيف اغسله ؟ الريحه كيف اتخلص منها ؟

الريحه حق الزيت قوية .. ريحه ثوم طاغية … الحل الي ضبط معاي مره هو احط – بن قهوة – بيدي واصب الشامبو عليه افركو عشان يتجانسون واغسل فيه فروة شعري اهم شي .. وباقي شعرك غسليه زي ماتبغي .. انا شخصيا اهم شي الفروة وباقي الشعر يكون لما امسح فروتي وراسي بالموية من الشامبو لما ينزل للاطراف اقوم اخلل الشعر بنفس الشامبو << ان شاءلله وصلتلكم الفكره ههه .. لان اطراف الشعر او باقي الشعر سهل يتغسل بس الاهم تخليلي الفروة لانها اساس الريحه ومكان الاوساخ باقي الشعر بالتخليل وغسلو من الشامبو حق الراس لما ينزل

اذا لسا حسيتي في زيت بشعرك سوا من الخلطة او الزيت الثاني ” حل سريع تتخلصي من التزيت الشعر ” هو تغسليه بصابون .. شخصيا استخدم دوف

بعد الترويش وحمام الهنا … حطي على شعرك وقت التمشيط – خمرية – على راسك بس ومشطي .. او تبخري بس ماجربت البخور .. بس اعتمدت ع الخمرية

وانسي ريحه ثوم او زيت او اي شي باذن الله

النتيجة ؟ خف التساقط ؟

صراحه ايوا بعد تقريبا ثالث اسبوع لاحظت فرق مره بالتساقط .. انا اسويه مره كل اسبوع ولي دحين سادس اسبوع يعني شهر وشي .. لاحظتو خف للامانه فرق مرررره عن أول

هل تنصحي فيها ؟

ايوا لان من تجربتي نفعت معاي .. ولكن لازم نتنبهوا لامور ثانيه بيومكم .

. هل الاكل حقكم غلط ؟ هل في ادوية تاخذوها تسبب هالتساقط ؟ هل سويتو شي لشعركم وكان هو السبب ؟ وغيره .. يمكن في امور ثانيه لو وقفتوها او انتبهتوا عليها تخفف وضعكم

وأنصح أكثر انو تروحوا تسواتحاليل لو يمديكم .. لان كثير امور تكون سببها نقص او زيادة في فيتامينات او معادن او هرمونات .. واقروا عن الاكل الي يساعد الشعر وخلوه في وجباتكم . وإن شاءلله بسوي انا تحليل كمان أفضل وأدق .. لان في وصفات تخفف ولكن لو وقتيها ترجع مشكلتك لان الخلل داخلي مو خارجي

وبس اتمنى هالتدوينة كان شرحها كافي وشامل .. والله يشفي الجميع من كل مرض وعله سوا خفيفه او كبيرة

ولا تنسوا تشاركوا غيركم هالتدوينة وتتابعوني بالسناب والانستقرام

عيشوا بحب وإيجابية

snap : boosh.life

insta : booshlife

نظفي غرفتك او بيتك كله بساعة وحده بس ! قبل رمضان clean your house in 1 hour before ramadan

السلام عليكم ورحمة الله وبركاته

كيفكم ؟ ماشاء الله تبارك الله الوقت صاير يمشي مرره سريع لدرجه متخيلين باقي شهر وشي على رمضان ؟؟ يارب يبلغنا اياه واحنا بعافيه وامن ولافاقدين ولا مفقودين اللهم امين

وبما اني قبل سنه او سنتين قررت ان رمضان بخليه الوقت الي قبل لا يجي اكون مسويه تنظيف السنه او الي يسمونه الاغلب تنظيف عميق ! في ناس تحب كل شهر او كل كم شهر تسوي هالنوع من التنظيف .. بس اختكم في الله مستحيل هههههههه هالجانب في الحياه يوترني وازهق منه بسرعه فما اقدر اسويه بشكل مكثف بشكل متكرر

فطبعا تحيه للي يحبون التنظيف ولهم همه ويريحهم هالشغل .. ان شاء لله نصير زيكم ولكن الى الان نحاول نجيب طريقة لنا سهله والاهم نحقق الهدف

الي يتابعني على السناب الانستقرام .. يعرف أسلوب الترتيب والتنظيف وإنجاز اي مهمه بيومي .. باختصار جديد

سهل – سريع – قليل ..

عشان يكون عادة وما نمل منه بسرعه والاهم نستمر

هالتدوينة للتنظيف العميق قبل شهل رمضان .. وبيناسب كل بنت – كل الاوضاع والمسؤوليات . .. بنهاية التدوينة حملو النظام لساعة وحده تنظيف عميق وتقدروا تطبقوه على كل الغرف وكل البيت .. بنفس الاسلوب

الفكرة الاساسية للتنظيف العميق

في اماكن او أغراض ماننظفها لفتره طويله مثلا سجاد – ورا الثلاجه – هيكل السرير والخ على حسب وضعكم وكمان أمور كثيره ماصرنا نستهلكها خلال هالسنه وماخذه مساحه مثلا ملابس او اغراض ديكورات والخ فهالنوع من التنظيف للفرز والتخلص وتجديد روح المكان

ليش قبل رمضان

شخصيا أشوف رمضان يعطي إحساس غير وله طقوس غير .. فحلو نبدا نستقبله بأجواء أقل توتر والمكان يكون متجدد ولان بعد رمضان العيد فيكون هالشهرين ورا بعض مشغولين وكمان الناس تبدا تتقضى لرمضان او للعيد فحلو تشترو وانتوا تعرفو من جد ايش تحتاجو او لا بعد الفرز والتنظيف .. لان في امور كثيره بتحصلوها عندكم ماشفتوها من زمان .. فاشوفه وقت مره مناسب نستقبله واحنا جاهزين ومخلصين التنظيف

هالنظام لمين

لكل بنت – سوا بالبيت – طالبة – تشتغل – مسؤولة عن بيت – عندها عيال – مالها خلق تنظيف – تبغا شي سريع

كيف صممت هالنظام ؟

بعد سنين من اللخبطة والحوسه وتجربة طرق ناس كثير ولكن بالاخير عرفت اني لازم ما اطبق نظام او أسلوب شخص ماهو نفس شخصيتي من ناحيه التنظيف والترتيب

بمعنى انا شخصيه زي ماذكرت هالجانب من المسؤوليات – التنظيف والترتيب – مزعج وملل وازهق منه .. فاكيد كثيرررررر ايام وأسابيع كان فيها اهمال وعدم تنظيف وترتيب وكركبه .. وارجع انظف واترب وياخذ وقت وجهد وتعب .. فكل ماافكر انو لازم ارتب احس انو برجع لنفس التعب او دايم لازم اسوي نفس المجهود كل يوم لو ابغا احافظ على مكاني نظيف ومااحب فكرة ان كل شوي ارجع كل شي مكانه وكل شوي ارتب وارفع والخ وابدا اركز كثير عن الترتيب والتنظيف بدال مااعيش اللحظة لان شفت ناس ماصارو يشيلو هم كثير وجود ناس عنهم او ينشغلو عن الي حولهم عشان يغسلو او يرتبو وبعدين يجلسو وهكذا

فبعد ماتابعت ناس كثيره أجنبية وعربية عرفت ان لازم اخذ نظام البساطة ونظام الروتين .. وتكلمت كثير عن هالموضوعين بالمدونة لو حابين تقروا عنهم

كيف تسوي روتين خاص فيكي

ايش هو نظام البساطة

مدة النظام

ساعه كل يوم فقط لجزء بسيط …. وعشان تخلصي كل بيتك يعتمد على وضعك ومسؤولياتك ووقتك . لان البعض بيقدر كل يوم ورا بعض لساعه يحقق الهدف وبعض بتأجل وبيصير كل كم يوم او في ناس أسرع بتسوي ساعتين بدال ساعه لان يميدها .. اهم شي حاولي تخلصيه او تخصلي اغلب الغرف قبل رمضان .. هذه هي المدة

تحميل النظام

هذا هو الرابط لملف النظام .. جدا سلس وسهل اتمنى يعجبكم وتستفيدوا منو يارب

والي ماهو مسؤول عن التنظيف والفرز بس لسا يبغا يرتب حياته ويومه اكثر قبل رمضان او في رمضان

التدوينة السابقه ..(هنا ) يقراها لو حاب تنظيم جدول معين ليومه غير تنظيف السنوي .. بنفس فكرة النظام من ناحية – سهل – سريع -قليل وعملي والاهم يكون بشكل شخصي معاي

وطبعا في تنظيف وترتيب سريع يوميا وهذا إن شاءلله بتدوينة قادمة إن شاء لله .. اذا حابين هالشي أكتبولي بالتعليقات

بالنهاية

اتمنى تشاركوا لغيركم عشان يستفيدوا ويعجبكم اهم شي ولا تنسوا تتابعو المدونة لكل جديد وتتابعوني بالانستقرام والسناب

snap : boosh.life

عيشوا بحب وإيجابية

تقدري تغيري حياتك للأفضل بخطوة وحده معاي you can change your life for the better with only one step with me

السلام عليكم ورحمة الله وبركاته

كيفكم ؟ اخباركم ان شاء الله اموركم بخير يارب والاهم بصحه وعافيه

تدوينة اليوم .. موضوع غير كثييييير بحياتي وبيومي وبإجازاتي . ولله الحمد والمنه .. اخذ مني وقت طويل وضياااااع وقت كثير لين ما حصلت هالاسلوب الي على طول ناسبني وناسب شخصيتي والاهم هذا خلاني أستمر لفتره طويله

طبعا هالموضوع كالعاده بمواضيع المدونة انو ما اذكر شي الا وانا اجربه او اقولكم ماجربته بكل صراحه .. وهالشي جربته لاكثر من سنه ولله الحمد واخيراااا جيت اكتبلكم هههههه << بدري يختي

ومن العنوان ( أأأأأأأأأأأأأأأأأأأأأأأأأنناااااااااااا ) الي رح أسويلكم هوا عشان أشكركم لدعمكم للمدونة ولي وكمان لان الموضوع للكثير يمكن يكون صعب بالبداية بما اني شفت الصعوبة رح اسهل عليكم كيف تفهموا وتغيروا يومكم وحياتكم إن شاء لله

تنظيم روتين صباحي \ مسائي خاص فيكي

الروتين يمكن للبعض معناه لاااازم تلتزمي لو مالتزمتي رح تضيعين تعبك وهذا مو موجود معاي ولا بالنظام .. احب الروتينات الي حتى لو خربت كم يوم لسا اقدر اكمل وأموري تمام والاهم ضميري مرتاح

ومع الوقت بتشوفي انك تفضلي تسوي روتينك دايم بسبب الراحه وقلة التوتر والشوشره بمخك وبيومك ولانه سهل وخفيف فبتفضلينه أكثر

يناسب مين ؟؟ لمين يناسبه ؟؟

طالبة \ موظفة \ بالبيت \ ام \ ام بوظيفة \ لأطفالك بس \ روتين لمجال محدد (تنظيف او رياضه الخ ) مو كل صباحك او مسائك والخ

يناااااااسب الكل الكل الكل

الروتين كيف نظامه ؟

أمور صغيره وسريعه ماتاخذ دقايق .. ولو في شي بياخذ وقت أطول مارح ياخذ وقت طويل يعني مافي شي لساعات !!! لاا .. لان نبغا الاستمراريه فنحتاج الوقت يكون خفيف على القلب هههه

الروتين الصباحي او المسائي عباره عن مهام مختلفه على حسب وضعك وشخصيتك ومسوؤلياتك .. وكل مهام لها روتين الخاص فيها وايامها المختلفه

يعني مثلا ماينفع نخلي كل الي تبغينه تسوينه كل يوم لان مابيكون واقعي .. فكل مهمه مثلا الرياضه بيكون لها جدول موزع لايام( اذا طبعا مايناسبك كل يوم ) .. فمو كل روتين صباحي يكون فيه رياضه … فبيكون مرن لو اليوم الي في رياضه ماسويته بسبب شغل فخلاص اليوم الجاي الي فيه رياضه رح تحاولي تلتزمي او اليوم الي مافي وتعوضي على حسب وضعك .. فالروتين مرررررن جداا جدااا جددددااا جداااااا

كيف بتسويلي اياه ؟

نجي لاهم نقطة وهي كيف انا بسويلك هوا ؟… رح نتواصل سوا عن طريق الايميل

booshlife@outlook.com

ورح تختاري نوع الروتين الي تبغينه او الاثنين سوا .. وبطلب منك معلومات عن يومك وشخصيتك ومسوؤلياتك والاهم أيش حابه تسوي من هوايات والخ .. وبرسلك مستند باقرب وقت بروتينك وكيف تغيريله كمان على حسب الوضع الحالي لك

المقابل ؟؟

فقط فقط فقط 15 ريال للروتين الواحد<< ترا المبلغ لوجبة أكلها وانا اتناقش معاك واجهزلك الروتين ههههههههه

بس جديا هالاسلوب من الروتين رح يفرق معاكم كثييييير والاهم الراحه النفسيه وقلة تأنيب الضمير وكثرت الانجازات بإذن الله فحابه انكم تجربوا هالنظام ولكن لانه بياخذ وقت مني شخصيا ولازم اعطيكم التركيز والترتيب الي تستحقوه وبنفس الوقت هذا شي مني لكم فخليت الرسوم بسيطة جدا جدا جدا

بالنهاية

اتمنى عجبتكم وتحمستوا تجربوا هالنظام … وتتابعوني على الانستقرام عشان تشوفو روتيني الصباحي الجديد

ولا تنسوا تشاركوا هالتدوينة لكل من يهمه هالموضوع

عيشوا بحب وإيجابية

ايش يعني أجندة وكيف أختار لي وحده ؟ \ how to chose and create my own planner

السلام عليكم ورحمة الله وبركاته 

بدأ مؤخرا الاهتمام بالاجندة بشكل كبير وهذي خطوه جميله جدا مع انها موجودة من زمان ولكن بشكل مختلف ولكن أهميتها نفس ماهيه من زمان وحتى الان والى المستقبل …

img_0147

ولكن الاجنده صارت  مشهوره بكونها  كتاب مخصص لازم نشتريه عشان نستفيد من فوائد الأجندة  وهذا أكبر غلط منتشر بيننا .. الموضوع كبير وواسع ومتنوع وبشاركم بشكل مختصر عنه وعن تجربتي وكيف تقدري تكوني لك أجنده خاصه فيكي او تشتري النوع الي يناسبك …

تجربتي بتكون بأذن الله بتدوينة منفصله … ولكن هالتدوينة لك  وكيف تقدري تسوي أجنده مناسبه لك ولحياتك

اولا : ايش معنى أجندة  وليش مهم؟ 

الاسم المتداول هو البلانر (المسمى الانجليزي ) .. باختصار هو مكان توثقي فيه مهامك ومسوولياتك واهدافك وكل المعلومات الي بمخك عشان تخففي الضغط عليكي وعلى عقلك .. يساعدك تتذكري الامور المهمه .. وتستمري تنفذي المهام الي عليكي وتحققي اهدافك قدر المستطاع لان كثير من الناس تنسى او تهمل مهام وواجبات بحياتها ولكن باستخدام هالاسلوب تكون اكثر ترتيبا وحرصا .. وانا منهم هههههه احتااااااااجه بحياتي

فنقدر نقول على دفتر عادي او حتى ملف فيه اوراق على  انه اجنده … او مذكره بالجوال على انه أجندة .. او دفتر فيه تخصيصات لكل مجالات الحياه على انه أجنده والخ .. المهم انه مساحه مرتبه فيها كل الي  تحتاجي تركزي عليه 

ثانيا : طيب ليش في دفاتر وملفات معينه اسمها اجنده لو حتى الدفتر العادي نقدر نقول عنه أجنده ؟؟ 

لان الكتب الي  يذكر فيها انها أجنده تكون  جاهزه بتقاسيم وتواريخ  وتفاصيل تسهل على المستخدم تعبيئة بياناته  وتكون مهتمه بالتصاميم الي تكون مريحه ومحفزة للشخص … فيميل كثير من الناس انهم يشتروا هالاجندات

وفي كثير اشكال وتصاميم وتفاصيل وأنظمة للاستخدام  لكل شركه من شركات الاجندات ..

 ولكن عشان  تختاري أفضل نظام لازم تعرفي ايش المناسب لك ؟؟

ثالثا : نظام ؟.؟؟ كيف يعني أسلوب مختلف للاجنده موجود لكل شركه ؟؟ 

في اسلوب مشترك بين كل شركات الاجندات ودفاترهم وهي في مساحه لتوثيق البيانات بشكل عام وبشكل أدق .. يعني في صفحه للسنه او  للشهر بشكل كامل وتعبي فيه بيانات ومعلوماتك وبعدها في مساحه لتعبيئة البيانات بشكل أسبوعي او يومي او لمجال معين سوا لرياضه او لعادات او للميزانيه والخ

بعدها يبدا الاختلافات .. في أجندات تضيف مساحه لكتابة مذكرات جانبية لكل يوم او للمشتريات خلال هالاسبوع او للرياضه او للاهداف الشخصيه الشهريه او للمواعيد او للارقام والاتصالات والخ

وايضا اختلاف بالمساحات المخصصه للكتابه في شركات تكون أجندتهم مخليه مساحه كبيره لكل يوم تكتبي فيها مهامك او مساحه صغيره او بالطول او بالعرض والخ …

رابعا : لا تغرك الابداعات من ناحيه التزيين الي يسوها الناس .. ركزي على المنتج بدون زينة 

في صور كثير للاجندات تكون بشكل مررررررررره يحمس  بسبب تصاميم الناس وتزيينهم للاجنده ويمكن هو الاساس الي يخليكي تختاري شركه معينه عشان تشتريها .. وبالاخير مايطلع زي ماتبغي .. فلما تشتري اجنده شوفي كيف الاجنده شكلها بشكل خام يعني الشكل الحقيقي بدون اضافات نفس مارح يجيكي .. لان التزيين هو اسلوب شخصي مو عام

وبعض الناس تفضل التزيين لانه يرتب أكثر ويحمسهم أكثر للانجاز او لانهم بصريين فيحتاجو امور تكون بارزة بالالوان او الملصقات وغيره .. والبعض مايحب هالشي او ماعنده الحس الابداعي بالتزيين

 خامسا : مو كل أجنده تحتوي على كل شي

في كثير من الاشخاص الي يحبوا يكون لكل شي أجنده خاص فيه … مثلا أجنده لنفسه وأجنده لشغله  واجنده لاهدافه الاخرى او هواياته .. عشان يكون منفصل واهدى على مخه  .. والبعض يحب كل شي بحياته  من شغله لين  شغل ومواعيد امور عياله لين هواياته  تكون بمكان واحد …..

هنا بعض الصور والافكار للاجندات واختلافاتهم بالتصاميم والانظمة   بشاركم لثلاث شركات مختلفه وفيهم تزيين العملاء – التزيين مو من نفس الاجنده للعلم –   واخر التدوينه صور لمنظمات واجنده من ناس عاديه مو شركات لااازم تشوفوه كمان

نجي لأهم سؤال كيف أعرف ايش الي يناسبني ؟؟؟ 

جربي بالبيت بدفتر عاااااااااااااادي … انتي حوليه لاجندة خاصه فيكي …

كيف ؟؟

سوي صفحه فيها جدول للشهر كامل ولكل يوم في مساحه للكتابه – عشان لو بتسجلي مواعيد او اي شي – .. وبعدها صفحه او صفحات مقسمه لكل يوم لحاله ولكل يوم مساحه عشان تكتبي مهامك الخاصه لهاليوم … وبعدين خصصي صفحات لامور مختلفه  لحياتك  لمتابعته وتحقيقه او لتسجيل معلومات لشي معين .. مثلا صفحه لمتابعه عادات معينه مثلا رياضه او قراءة كتب او صيام اومثلا صفحات لتسجيل معلومات حق الدورةالشهريه او تطعيمات او جلسات او مقاضي البيت   والخ

رح تعرفي ايش تحطي في هالدفتر او ايش تسجلي بالهدفتر اذا اولا  كتبتي بورقه خارجيه ايش حابه تركزي عليه بحياتك وماتهميه وتتذكريه وتتابعيه ؟؟

اذ كنتي جامعه اومدرسه  فبيكون عندك خانه تسجلي فيها الواجبات والتسليمات وغيره … او ام رح يكون فيه للبيت ومهامه وللعيال او اذا موظفة لشغلك وامور الخاصه والخ  او بالبيت قاعده لكي مسووليات بالبيت ولنفسك وغيره..  …. فحددي ايش حابه تتابعي وتنجزي عشان تقسمي هالدفتر مضبوط

لو ماعرفتي كيف  تسوي ؟؟ ابحثي بالنت عن طرق لاستخدام الاجنده.. كثير كثيير طرق .. لان بالنهايه هو اسلوب شخصي فكثير مساحات ومجالات يمكن ماتناسب انك توثقيها بحكم ميولك الشخصي واهدافك ولكن تناسب غيرك ..

لشهر او اكثر استمري على ترتيب لاجندتك الي وسويته .. وشوفي وضعك هل استخدمتي كل الخانات ؟؟ هل تصميم الاجنده نابك وحفزك ؟؟ هل في امور لانها بصفحه بعيده لحالها ماركزتي عليها فماناسبك هالحركه ؟؟ هل تحتاجي مساحه اكبر في مكان معين ؟؟ هل في امور مالمستيها فمو مهمه عندك ؟؟ والخ

 وكل شهر جربي حركه وترتيب مختلف  سوا شفتيه من أحد او انتي حاولي تفكري ترتبي على حسب اهميه كل مجال  عندك ..

زي ماذكرت سابقا في ناس ماتقدر تخلي دفتر فيه كل المعلومات  فتحب تخصص امور معينه فقط وتشيل امور معينه … فجربي عشان تعرفي الي يناسب ..  مثلا انا احب لكل شي جدول خاص فيه واجندتي تكون اكثر لمهام اليوميه وللمواعيد او انو اضيف الجداول او جزء منها  بالاجنده .وبشرح اكثر بتدوينة ثانيه ان شاءالله

وبالنسبه للشراء في ناس تحب  تستمر تكون هي الاجنده وترسمها بنفسها وتفصل على كيفها … وفي ناس لا يحبو يشتروا وهذا  تفضيل شخصي ..

هنا أمثله للاجندات  شخصيا مسوينها الناس بدفاتر عاديه

اتمنى شرحي سهل عليكم فهم الاجندة وكيف تستخدم  وكيف تكوني الاجنده الخاصه فيكي او تشتري الاجنده المناسبه لكي ..

بالنهايه 

لا تنسوا تشاركوا هالتدوينة بينكم وبين نفسكم .. وقريبا اشاركم اسلوب أجندتي واسلوبي وتجربتي الخاصه

وعيشوا بحب وإيجابية

img_3789

طرق بسيطه وفعالة  للدراسة وقت  الاختبارات / effective tips to stduy for tests 

السلام عليكم ورحمة الله وبركاته

تدوينة اليوم طرق ونصايح  بسيطة لطالبات المدارس او الجامعات وقت الاختبارات … وبما ان الان فترة جدا توتر الطالب لان عشتها ومريت بأخطاء كثيره من ناحية التجهيز والاستعداد وكيف اذاكر وبرضو جربت امور جدا ساعدتني وسهلت علي دراستي وقللة خوفي للاختبار .. وهذا الي بشاركم فيه  ان شاء  الله الخطوات الي  شخصيا نفعت معاي  واتمنى تنفعكم

1494372746561

ملاحظة:  الحياة الصحية برضو تتعلق باسلوب حياتك وتعاملك مع الظروف لان بيئتك تأثر على جسمك كمان مو بس أكل ورياضة

.. استغلي الصبح !!!

وخاصه ان الان احنا بفصل الصيف و الليل قصير ! فالصبح بركه..كثير من الناس مايحب الصبح بس والله تقدري  تسوين امور كثيره فيه بوقت قصير , مدري كيف بس يصير هههه . ولاحظت الاوقات الي ادرس فيها الصبح هي اكثر المعلومات الي اتذكرها مضبوط وقت الاختبار. وربنا ذكر بالقران والاحاديث بركة الصبح !! فهالوقت بما ان الدنيا جري قبل رمضان استغلوه الصبح وبتشوفي ان كثير دروس او مواضيع بتخلصيها قبل حتى مايأذن العصر ولسا بيكون عندك الليل كمان يعني مرره شي بريحك  لان  في لسا وقت تذاكري وتراجعي إن شاء الله

!!!!ابدي بدري

 استغلي فتره الفسحه  او الاجازة البسيطة اذا لسا مابدت الاختبارات!! وفترة وجودك بالمدرسه لو في مجال حتى قبل الطابور او بنهاية الدوام قبل لاتروحي البيت, من ناحيه ترتيب او تحديد المعلومات والاوراق الي تحتاجيها للماده عشان ماتضيعي وقت بفترة الاختبارات تسألي البنات وتستني أحد يرد عليكي
او لو كل يوم ساعه او ساعتين ذاكري اي ماده تحسي تاخذ وقت قبل اسبوع الاختبارت وابدي ذاكري شوي شوي عشان تعطي نفسك مجال اوسع بعدين

!!!حددي المهم وقت الدراسة

سوا بتحديد بالالوان او بستكر على الصفحات عشان لو مافي وقت  على الاقل تعرفي  ايش المهم  تراجعيه  اذا كان وقت المراجعة ضيق سوا الصبح قبل الاختبار او قبل لاتنامي

!!!!كرري المعلومة بالكتابة

وقت المذاكره حاولي تكتبي الي درستيه مو شرط كمذكرة لبعدين بس وقت المذاكره اذا توك حفظتي معلومه وتبغي تسمعي لنفسك حاولي تكتبيها بورقه حتى لو بخط ملخبط وسريع بس في دراسات اكدت ان هالحركه تساعد بثبيت المعلومه!! … وبرضو بالمسائل  كرري حل المسائل عشان تثبت عندك القاعدة واسلوب حل السؤال أسرع مو بس تسمعي لنفسك كيف تحليها ..

!!!!لا توقفي عند الشي الصعب

اذا في درس او سؤال ماعرفتي تفهميه وقت الدراسه .. حاولي كم مره واذا لسا مافي نتيجه !! اتركيه وكملي وبعدين تعاليله عشان لايضيع وقتك !! بس مهم تحدديه

!!!!اعطي نفسك وقت راحه

عشان مخك يقدر يرتب المعلومات الي ذاكرتها و حتى لو ماراجعتي في امكانية كبيره انك تتذكري وقت الاختبار  لو ريحتي نفسك كل فترة وفترة وقت المذاكرة …  يعني خذي قيلولة .. تفرجي تلفزيون .. بس خلي مخك يخف عليه ضغط التركيز والتفكير شوي.. وحاولي تنامي ولو ساعه ساعتين قبل الاختبار… فالنصايح الي ذكرتها فوق رح تساعدك باذن الله تنامي قبل الاختبار كويس لانك مرتبه وقتك صح

ّّّ!!!أفطري,  لاتنسي تأكلي

صح اغلبنا يقول مايمدني اكل ..  بس حاولي قد الامكان انك تأكلي جسمك لو شي بسيط  مثلا عصير .. عشان يشتغل جسمك ويركز ويتذكر المعلومات  وقت الامتحان … فالموضوع موسالفة عندي او ماعندي مجال اكل قد ماهو لازم اشحن جسمي طاقة عشان اجتاز الاختبار لان اغلبنا يكون نومة ملخبط ففوق ان مافي راحه كمان مصيبة يكون مافي طاقة

!!!التؤكل على الله واعملي بالاسباب

 مهما بذلنا من اسباب وقت بالدراسة مهم مهم مهم التؤكل على الله وانك تستودعي  الله كل الي حفظتيه وفهمتيه… وتسأليه وتطلبيه النجاح والتوفيق .  قبل لا تبدي دراسة ووقت ماتدرسي وبعد ماخلصتي… دائما خلي ذكر الله شي اساسي ..

بالنهاية

اتمنى هالتدوينة كانت ملهمة ومفيدة لكم .. وانشرو هالخطوات  عشان تساعد غيركم .. والله يكتبلكم النجاح والسعاده والتوفيق

مع السلامة

boosh.life ولا تنسو تتابعوني بالسناب تشات 

1493809188631-2

خمس طرق  بسيطه لشرب ماء أكثر/easy 5 tips to drink more water 

السلام عليكم ورحمة لله وبركاتة

تدوينة اليوم عن طرق بسيطه تساعدك تشربي مويه بكيمة كبيره .. طبعا هالطرق عن تجربة شخصية وان شالله تفيدك انتي كمان ..

اولا: اقري عن فوائد الماء وتجارب الناس

دايم اقول هالطريقه في اي شي حابه يكون عاده لي او حابه اغير شي بنفسي ..لما تقري عن الموضوع بكثره ويصير حديث يومك دائما وتشوفي نتايج لناس كثيره .. رح يكون مخك و نفسيتك حابه تسويه وتحس انه ضروري ..ويساعد على التحفيز والاستمراريه بشكل كبير..

ثانيا: اعتمدي مقياس ثابت

يعني خلي عندك قاروره هي الي تستخدميها للشرب دايما عشان تعرفي اليوم كم شربتي وكيف تقبل جسمك للكميه هذي  من ناحيه هل حسيتي بتخمه او لسا عطشانه او شبعتي من المويه ..

ثالثا: شوفيه بكل مكان

من اهم الاشيا للتحفيز هو ان هالشي يكون على بالك وقدام عيونك قدر الامكان .. فخلي المويه باكثر مكان تكوني موجوده فيه مثلا خلي القاروره او جيك المويه بالصاله .. عشان كل مادخلتي الصاله او طول مانتي فيها تشوفي المويه وتشربي ..وتقدري تحطي اكثر من قاروره باكثر من مكان ، غرفه النوم /مكتبك /الصاله / المطبخ وكذا ..لاتعتمدي ان المويه بالثلاجه بس

ملاحظة مهمه !!!: دخولك للحمام مارح يطول

هذي النقطه من الامور الي احتمال تخلي كثير مايجرب يشرب كثير مويه لان بيقول ” قالولي طول الوقت بدخل الحمام وانا صراحه ماابغا او مشغول طول الوقت ماابغا اقضيها بالحمام”.. طبعا باول كم يوم او اسبوع رح يكون دخولك للحمام كثير بحكم ان هالشي جديد .. بس بعدين لا بتعيشي طبيعي جدااااااااا

رابعا: افتخري بكل خطوه ..

اي انجاز لو بسيط جداا لازم تعترفي وتلاحظي وتفتخري فيه عشان يساعدك تستمري وتتحمسي..يعني مثلا لو تشربي عادة كاسه وحده باليوم وصرتي تشربي كاسه ونص لازم تقولي لنفسك “شاطره ياانا” و تكتبيه بأجندتك او مذكره  انجازات اليوم! لان هذا بيحمسك ان كل يوم تسوينه لان لا شعوريا عطيتي نفسك طاقه ايجابيه وحماسيه عشان تحفزك لليوم الثاني …

خامسا: حطي نكهة

هذي الطريقة مااستخدمها عادة ولن جربتها وحلوه  .. ولكن كثير من الي شفتهم مايحبو يشربو مويه يسونها .. وهي عباره انو يحطو نكهات للموية مثلا يحطون فواكهه او خضار للمويه  (ليمون- فراولة-خيار-نعناع -برتقال )  يكون عباره عن شرايح وبكمية بسيطة .. وفي بالمواقع الاجنبية نكهات موية على شكل بودرة  بس  مااجربتها فمااقدر انصحكم بنوع ولكن مشهورة

بالنهاية

اتمنى استفدتو… ومثل مااذكر دائما انشرو لغيركم المعرفه لان يمكن يستفيدو هم كمان ..

مع السلامه

لاتنسو تتابعوني على السناب شات

Boosh.life