ايش اخذ من مكملات واكلات تزيد المناعه بوقت الحجر المنزلي – فايروس كورونا my supplement during quarantine

السلام عليكم ورحمة الله وبركاته

شاركتكم بالانستقرام اي موضوع تبغوني اكتبه وكان مابين ( تحدي الصحيان 5 صباح) او ( مكملاتي الغذائية هالفترة ) والاغلب اختار المكملات الغذائية … ودا هو موضوع اليوم ان شالله بالمدونة

المكملات الغذائية ؟ ايش فايدتها ؟

انا مو مختصة ولا خبيرة .. انا أشاركم تجربتي ومعلوماتي الي متاكده منها فقط .. فلازم تتأكدوا قبل لا تاخذو اي شي ان صحتكم تمام او يناسب وضعكم الصحي

طيب ايش هي المكملات الغذائية ؟؟ هي باختصار او بشرح سريع هي غذاء اواكل ولكن بصورة مختلفة تكمل النقص الي بأكلكك … او اذا انتي ماتاكلي كويس تاخذي هالمواد عشان تغطي النقص أو تزيدي تنوع الفوائد في أكلك

ولكن !!!!! في ناس تعتبرها شي أساسي ؟؟ او لابد منه !! او اذا مااخذته فوضعي غلط !! .. من اسمها مكمل !!

ولازم تعرفي اذا اخذتي مكملات و وأكلك العادي هو ناقص كثير مارح يساعدك اذا بس بتعتمدي على المكملات .. لازم تحاولي تعدلي اكلك .. لان بالنهاية الاكل الطبيعي أفضل واحسن وهو المصمم لجسمك .. الباقي يعتبر مكمل مساعد يسهل لك تكملة النقص فقط

هل مهم المكملات هالفترة ؟؟

.. يعتمد على وضعك الصحي وطبيعة أكلك الحالي ونشاط .. المهم هالفترة زيادة المناعة المناعة المناعة لان الفايروسات دائما جسمنا يهاجمها فلازم نزيد المناعة اكثر هالفترة لان نحتاج مناعو أقوى من قبل لان هالفايروس قوي جدا … بس بالنهاية احنا نعمل بالاسباب وبالنهاية اقدار ومشيئة الله ولكن لابد من اخذ الاحتياطات كلها ومن ضمنها اكلك وطبيعة نومك ونشاطك

ايش اشكال المكملات ؟

في حبوب … في بودرة … في سائل … وفي انواع لان يعتمد على طبيعة جسمك والامتصاص . .في ناس تفضل البودرة لان بتحطها بوجبتها او حبوب لان نتائ الامتصاص بجسمها افضل او غيره من الاسباب

وفي مكملات لفيتامينات ومعادن او احماض وغيره .. وفي الي تكون مكمل أكل .. وهي اصلا اكل ( يعني شاهي بودرة او ثوم بشكل حبوب او بودرة او بروتين على شكل بودرة او جرعة كركم وهو عباره عن عصير كركم ) وهكذا

فمو كل المكملات تعتبر صناعيه اوبس حبوب .. في بعضها أكل وينضاف في اكلك ومشروبك

متى تبان نتائج المكملات ؟

الشي الي مو حلو في اي مكمل خاصه الحبوب من تجربتي مايبان نتائجه بسرعه وهذا طبيعي لان لازم يكون في اخذ مستمر عشان الفوائد تنبني في جسمك وتغطي النقص .. فاوقات يكون ملل او زهق وتوقفي اوقات او تنسي او تحسي بدون فائده بس لازم تاخذي وقتك يعني لمده شهر او اكثر في البعض ينصح لمدة 3 شهور بعدين تشوفي الفوائد .بس يعتمد على حسب جسم كل وحده وامتصاصها للفوائد واكيد اكلها ووجباتها الي اكيد بتساعد مع المكملات

مكملاتي الحالية ؟

الحديد : لان عندي نقص عالي

فيتامينات متعددة : الحبوب الي تحتوي على فيتامينات متعددة

عسل : اخذ ملعقة عسل

حبة سوداء : كفاية انها توصية الرسول وقوتها للمناعه جبارة وهالفتره احتاج التزم فيها

جرعات : الي يتابعني بالانستقرام يعرف قد ايش انا والجرعات اخوان هههههه – اقرو موضوع هنا و كمان حطيت وصفة المناعة جديدة بالانستقرام – هنا – ووصفة المناعة سابقة – هنا– وفي وصفة الشيخوخة – هنا– … اخر وصفة حطيت فيها العسل والحبه السوداء فيكوو بشي واحد

المغنيسيوم : لان قريت انها كويس لدعم العظام والعضلات بحكم ان عندي التهاب ولكن لسا مااقدر اتكلم عنها لان لسا قبل شهر بديت

هل في مكملات تبغي تاخذيها ؟

حابه اجرب بودرة الخضار وهي عباره عن خضار مشكل ( مختارين الخضار الي معروف بكمية الفوائد الكبيرة الي فيهم ) .. في كثير ماركات وكثير انواع

فحابة اجرب هالشي لان مقصرة باكل الخضروات وكتنويع طريقة مختلفه تاكلي خضرواتك وخاصه اني ابغا اشرب مشروبات وعصيرات صحية أكثر من قبل

بالنهاية

لازم تنتبهوا من المكملات لان مو كل شي يناسبكم والكميات لازم تكو مدروسة قدر المستطاع لان يمكن توص لحد التسمم الله يحميكم

لاتنسوا تشاركوا هالتدوينة مع غيركم وتابعوني على الانستقرام والسناب

عيشوا بحب وايجابية

جرعات صحية .. مشروبات صحيه بشرب وحده ومفعول جبار wellness shots ? drink with one sip and amazing effects

السلام عليكم ورحمة الله وبركاته

تدوينة اليوم من أكثر الاسئلة الي تجيني كل مره أصور فيها لكم بالانستقرام << اذا ماتتبعيني ؟ اول تابعيني وكملي الكلام هههه .

الي أصورة لكم كل فتره وفتره .. عباره عن شي أسمه

جرعة عافيه .. أو جرعة صحيه ..

بالانجليزي wellness shot

تعريفها باختصار : عصير من فواكهه وخضار معرفين بفوائد قوية جدا .. وغالبا تكون غير مرغوب فيها لقوة مرارة الطعم .. فتعصر بكمية بسيطه وتنشرب بشربة وحده ..

المقياس يكون تقريبا مثل كمية فنجان قهوة او فنجان شاهي او اكثر شوي .. لو بتكلم بمقياس ثابت بشكل عام هو تقريبا 60 مللي

الحكمة والسبب ورا ان الناس تحب تشربها ؟؟ بدال ماتشرب عصير كامل وحجم أكبر ؟؟

  • كمية بسيطه جدا .. فسهله الشرب والتقبل
  • سهولة أخذها اي مكان
  • تحتوي على مكونات غالبا مارح تتقبلي تشربي منها كمية كبيرة
  • عصرها مركز غالبا يكون بالعصر البطيئ- ولكن مو دايما
  • تركيز الفائده من ناحيه خلط المكونات – بشرحها بالنقاط الجاية **

من المميزات الي يميز الجرعات الصحية

تكون خليط من فواكهه او خضار او مكون واحد فقط .. وتركيزه يكون عالي من ناحية الفائدة …. بمعنى في جرعة مركزة على المكونات الي فيها تكون معروفه بفائدتها الفعالة لشي معين .. مثلا جرعة المناعه بتكون فيها مكونات معروفة تدعم المناعه وقتل البكتريا وتزيد النشاط

الجرعة بتكون يا فقط مثلا فيها عصير زنجبيل .. او زنجبيل ليمون برتقال وتفاح مثلا .. وهكذا

او مثلا جرعة الجمال بتكون فيها امور تحافظ على نظارة البشرة والجلد .. فمثلا فيها شمندر جزر كركم وهكذا .. او شي منهم فقط

هل في انواع جرعات ؟؟ او جرعات معروفة ؟

  • جرعة للمناعه
  • جرعه لنضارة الوجه والبشرة
  • جرعه تساعد تحفيز خسارة الوزن
  • جرعة الشيخوخة
  • جرعة تساعد على النوم والاسترخاء وغيرهم

يعتمد على المكونات الي تحطيها .. وفي محلات عالميه مشهورة جرعاتها بسبب طعمها او الهدف من الجرعه وغيره وفي انواع ثانيه وتقدري تبتكري جرعه الخاصه كمان

نرجع ليش ما يخلوها عصير بكمية أكبر ؟ دام فيها فائده اشرب أكثر ؟؟

بيكون صعب الاستمرار لك كل يوم كميه عصير كبيره .. الجرعه حجم بسيط جدا وسهل التعود عليه يوميا

غالبا تكون بعصر بطيئ لانه عصره يركز مايكون بحراره عاليه تحرق الفوائد .. فيكون طعم العصير كانك تاكلي الفاكهه او الخضره نفسها . فتركيزه عاليه وطعمه يكون حاد او في حلاوه شوي على حسب المكونات ولكن غالبا فيه مراره .

فهالطعم مو مستحب كثير فيكون في جرعه بسيطه جدا مقبول ويفضل كثير

تجربتي مع الجرعات ؟

لي تقريبا سنه وشي … مو بشكل منتظم ولكن يعتبر مستمره عليها او ارجعلها دايما .. لان النتايج جميله ومبهرة

اشرب الجرعات على الريق دايما . افضل وقت لاحظت عليه النتايج

اول جرعه جربتها هي الكركم والفلفل الاسود لعلاج مفاصلي والام الي فيها .. تكلمت في تدوينة سابقه عنها – اقري هنا

ثاني جرعه هالسنه جربتها هي جرعه الزنجبيل والليمون .. او الزنجبيل والليمون والتفاح .. حااااااااار لازم تاخذي وضعيه الرجفه والوجه ينكمش ههههههه ولكن الفتره الي استخدمتها فيه حساسية خشمي – الزكام- و مناعتي تحسنت كثير .. بحكم اني انسانه دايم ازكم وبسرعه اتعب … لاحظت سبحان الله تحسن أحسن وكبير بمناعتي ولله الحمد اكيد بعد بركة الله ثم الجرعه

كيف سويت الجرعات الي جربتها ؟؟

الكركم والفلفل الاسود ماكان عصر .. كنت استخدم البودرة ( كركم بودرة وفلفل اسود بودرة ) مع موية واشربهم .. والحمدالله نفع معاي … ولكن اكيد لو كان مشروب بيكون افضل لان بيكون مركز وطعم الكركم عصير افضل واحلى صراحه

جرعه الزنجبيل كانت بالعصر .. مررررره سهل التحضير وماكان متعب لان عصر كمية بسيطه الي تحتاجيها ولكن !!لان تعصري المكونات بدون تخفيف فحتاجي اوقات كمية محترمة من المكونات وبتكون كمية العصير أقل بكثير من الكمية الي عصرتيها هههههه لان فكرو فيها انك تحاولي تطلعي الموية من الفاكهه او الخضره فيعتمد على نوع هالمكون وطبيعة الموية الي فيه بشكل طبيعي

الادوات لتجهيز الجرعات ؟

  • عصارة .. اي نوع تبغي سوا عصارة سريعه او بطيئة
  • قارورة صغيرة او فناجين صغيره … الا اذا تبغي تعصري كل مره تبغي جرعه فمايحتاج تحفظي كميه
  • خضار والفواكهه والخلطه الي تبغيها
  • ثلاجه او فريزر

الطريقة ؟

  • تحددي نوع الخليط للجرعه سوا مكون واحد او اكثر
  • تعصري
  • توزعي العصير بالقوارير او العلب الصغيره ا الفناجين( شخصيا بديت بالفناجين واغطيهم وبعد مااستمريت غيرت لقوارير صغيره )
  • الي بتستخدمية خلال ثلاث ايام تحطيه بالثلاجه لو أكثر تفرزية بالفريزر وقبل يوم الاستخدام تحطيه بالثلاجه يذوب لان مافي مواد حافظة فبتخرب لو طولت بالثلاجه اكثر من ثلاث او اربع ايام
  • اعصري شوي ليمون على الخليط الي عصرتيه قبل التوزيع او بعد التوزيع على كل قارورة .. الليمون يساعد كمواد حافظة للعصير
  • وبالعافيه كل يوم

بالعافيه عليكم

لاتنسوا تنشروا الموضوع للفائده وتتابعوني على الانستقرام لكل جديد

عيشوا بحب وايجابية

ثلاث ايام بدون اكل ..ديتوكس -التطهير three days without food – detox

السلام عليكم ورحمة الله وبركاته

تدوينة اليوم توثيقا لموضوع شاركتكم هوا بالانستقرام بكل حذافيره .. لا تنسوا تتابعوني هناك .. الموضوع مره مثير للاهتمام وتحدي للنفس .. والحمدالله قررت أسويه وأجربه لان استفدت منه كثير واتمنى انتوا كمان تستفيدوا منو

ايش معنى التطهير او تنظيف الجسم او المصطلع المتداول – ديتوكس

هو من اسمه اسلوب تغذيه يساعد يريح وينظف جسمك من الاكل وتراكماته .. بالمختصر كانك تعطي اجازه لجسمك من اسلوب اكلك …

لان الاكل هو اساس الجسم عشان يشتغل .. والاساس لاغلب مشاكل وعلاجات الجسم سوا داخليا او خارجيا .. نفسيا جلديا هرمونيا والخ

picture source : minimalistbaker.com

كيف أسوي هالتطهير ؟؟

الاسلوب المعتمد غالبا هو الامتناع عن اكل الي يحتاج هضم والتركيز على المشروبات والسوائل الصحيه لان السوائل اسرع من ناحيه الامتصاص فالجسم ..فجسمك يقدر ياخذ المعادن والفيتامينات وغيره اسرع لو كان ع شكل سائل ..

فانتي ماتحرمي جسمك من الاكل ..ولامن الفوائد

ليش فكرتي تسوين هالتطهير؟؟

اسلوب الاكل او الاكل الي نعتمده بيومنا يمكن يكون هو سبب مشاكل نعاني منها .. وتراكمات الاكل الكثيره والي مو صحيه تسبب مشاكل برضو .ومو شرط المشاكل تكون امراض كبيره (الله يحميكم ويشفى مرضاكم) ولكن قد يكون مشاكل يوميه برضو عندكم مثلا الكسل! الانتفاخات ! بهتان البشره ! والخ

فانك تعطي فتره بسيطه كل مره لجسمك عشان يخرج هالتراكمات الي مايحتاجها .. ويرتاح الجهاز العضمي من كميه الاكل الكبيره واللخبطه وبرضو الهرمونات..

وبرضو اسلوب البعض يعتمده لو يبغا ينشط نفسه.. او يعرف مشاكل محدده واسبابها

متى بديت التطهير انا؟؟

بديته اخر يومين برمضان مع نص اول يوم بالعيد

ليش هالفتره؟

لانها قرب العيد..واخر ايام رمضان شخصيا يكون عندنا حوسه التجهيزات فقلت مع الحوسه والطلعه والتجهيزات رح يساعد ياخذ مني التركيز بالموضوع ..لاني بكون مشغوله

المفروض سويتها اخر ثلاث ايام برمضان وارجع لاكلي بالعيد بس مامداني للاسف

كيف التجهيزات للتطهير؟؟

لان عندي عصاره عصير فشتريت فواكهه وخضار اقدر اسوي فيهم عصيرات متنوعه بنفس المكونات -عشان لااشتري كثير – فكانت المكونات هي

برتقال

موز

عنب

كيوي

ليمون

خيار

جزر

فروالة مجمده

نعناع

بقدونس وسبانخ

وتقدروا تغيروا وتقللو على حسب وضعكم ..وبرضو اشتروا مكونات اهل البيت بيستفيدوا منها عشان لاتخرب لو مااستخدمتوها

مو لازم عصارة عصير .. تقدروا تسوها بالخلاط وتحاولي تصفي العصير عشان البقايا الي ماانخلطت .. هالطريقة كنت اسويها لما ماكان عندي عصاره .. او تشتري عصير جاهز بالجالون وفي محلات عصير صحيه دحين تسوي عصيرات الديتوكس لثلاث ايام بمبلغ معين

picture source : minimlasitbaker.com

كيف اسلوب الاكل خلال اليوم للتطهير ؟؟

انا قريت سوا كتب او مواقع عن اساليب التطهير الي مسوينها والاغلب عباره عن

تركيز بشرب المويه

شرب اكثر من ٣عصاير باليوم

شرب مشروبات ساخنه زي شاهي بانواعها (بدون سكر)

شوربة خضار (في وصفات كثيره مو بس مويه وخضار العاديه)

البعض ياكل مكسرات او وجبات جامده ولكن قليله جدا

وفي الي يسوي كل الي قلته

والبعض لا ..فنرجع نقول على حسب وضعك

ليش تقولي على حسب وضعك ع حسب وضعك؟؟؟

النقاط الجايه رح تفهمكم ليش!!

كيف الاستعداد للتطهير غير المشتريات والمقاضي؟

الاعراض الجانبيه !!!

للتطهير اعراض جانبيه ولكن مو خطير ولكن قد تكون على حسب ظروفك وهي كالاتي

خمول

ارق

كسل

جوع

دوخه

ليش هالاعراض؟لانك حرمتي جسمك من الاكل الي متعود عليه حتى لو كان متعود على اشياء غلط ومضره رح تكون مثل الفجعه للجسم وهذا طبيعي جدا يمكن يكون ليوم او يومين ويروح ..

ولكن قد تكون خطره لو عندك مسووليات وتحتاج حضورك بشكل جيد مثلا اطفال! شغل ! طلعات او حتى لو عندك امراض مزمنه تختاج تاكلي كويس او شخصيتك حاره وماتتحملي اي تعب ورح تنفجري على غيرك وياثر ..

picture source : minimalistbaker.com

فالاوقات الانسب لتطبيق التطهير !!

نهايه الاسبوع

ايام خاليه من شغل وظغوطات

شخصيتك تحتمل انو لو تعبتي تصبري وتمشي اليوم لو تبغي تسويه بيوم فيه ضغوطات

ايام تقدري تشغلي نفسك فيها عشان ماتركزي على جوع او تعب او كسل وخمول

الكثير يطبقونه بعد المناسبات او قبل المناسبات

وغيره في أوقات مختلفه على حسب كل وحده وهدفها ولكن الاساس واحد وهو تنظيف الجسم

تجربتي الشخصية :

اولا : جربت مره وحده ليوم واحد من زمان الديتوكس هذا .. وفهمت الوضع نوعا ما .. ورمضان كان افضل وقت لي لاني احب اجرب في رمضان شي لصحتي ولو شي بسيط .. فجربتو باخر يومين زي ماذكرت سابقا

ثانيا : لو ماتتابعوني بالانستقرام شاركت كل الوصفات وكل شي مريت فيه بهالرحله .. فتابعوني هناك لمواضيع أكثر بالصحه وموجود هالموضوع وموثق بالحساب عن التطهير وكل وصفاته

ثالثا : الوصفات كانت غالبا عشوائيه .. ولكن قريت عن اغلب المكونات المعروفه وكانت هي الي اشتريتها عشان اسوي خلطات مختلفه بنفس المكونات

رابعا : فقط اعتمدت على العصاير . مافي شوربة او مكسرات او اكل جامد.. فقط فقط عصاير اوسموذي (لما اجوع اسويه مخلوط عشان يكون أثقل ) وموية وشاهي قرفة خلال هالايام

الاثار الجانبية الي حصلتلي :

اول يوم ماكان في شي ولله الحمد … ثاني يوم كان في دووخه وصداع طول اليوم وبنهاية اليوم بدا الجوع مررره .. ثالث يوم كان يوم العيد فكان الوضع افضل لان مخي كان مشغول بالتجهيزات فماحسيت بشي ولله الحمد

كيف تعاملت مع الاعراض :

حاولت انو افكر بامور ايجابية واحاول اخفف عصبيه او توتر واكلم نفسي ان هالفتره لازم اكون صحيه نفسيا اكثر واتحمل .. وكل شوي احاول اريح وبرضو اشغل نفسي عشان لا اقعد أدخل المطبخ واشوف الاكل ..

وصفات العصاير ؟

كل الوصفات حق العصاير شاركتها بالانستقرام .. وموثقه بصفحتي بايقونة الديتوكس ( هايلايت ) لاتنسوا تتابعوني هناك كمان …

insta :booshlife

هل كان صعب او سهل ؟؟

نوعا ما كان سهل ولله الحمد .. يمكن لاني قريت كثير عن هالموضوع فكنت متحمسه أجربه وكان على العيد فكان في هدف اركز عليه .

متى وقفت وايش أكلت بعد التطهير ؟

وقت بنص اول يوم العيد لان كان عشاء العيد مع الاهل .. وفكيت على رز ولحم وبعده حلى وووو ولله الحمد هههههه بس لاحظت ماكان في رغبه للاكل او جوع كثيررر عشان اكل لما وقفت التطهير .. وباقي ايام العيد برضو كانت مررره ملخبطه وحلويات واكل .. للاسف سويت التطهير وبعدها خربت ولكن بعتبرها مكافاء لالتزامي بالموضوع

ولكن لو كان بوقت أخر كنت رح ارجع اكل صحي

picture source : minimalistbaker

ايش النتايج ؟؟ نحفت ؟ نفخه البطن ؟؟ البشرة ؟؟

لبس العيد قسته قبل ماابدا التطهير وكانت التنورة ماسكه على الخصر مضبوط ..لما لبستها ليلة العيد كانت واسعه ماشاءلله .. يعني كنت احاول اضبط عشان تكون مساكه عشان شكل البدله هههه بس من جد حسيت بطني خفت وشدت اكثر .. ورح تحسوا بهالشي اصلن خلال ايام التطهير كمان لان كثير أكلات تسبب النفخه حق البطن

بالنسبة للبشره او وغيره ماانتبهت لها للاسف ..

بالنسبه للنفسيه صراحه مره حلو طبعا مو كل الفتره ولكن اغلب الوقت الحمدالله .. يخليكي كانك تكملي صيامك باقي اليوم لانك تركزي على حياتك بامور ثانيه سوا عبادتك – حياتك الاجتماعيه ومسؤولياتك وهكذا .. مره مره حبيت هالتجربة ونتايجها

تفكري تعيديها ؟؟؟ هل تنحصي فيها ؟؟

طبعا طبعا طبعا .. بشوف كيف وضعي او ايش هدفي ولكن اكيد باذن الله بعيدها .. على الاقل لو يوم واحد بس كل فتره وفتره . وانصح تجربوها لو ليوم واحد فقط .. وأرجع أقولكم لا تسوها على طو بدون ماتراعوا وضعكم من كل النواحي عشان ماتحسوا التجربة ضدكم وهي أصلن لصالحكم

بالنهاية

أتمنى فادتكم هالتدوينة .. وحمستكم تجربوها ولاتنسو تشاركوها مع غيركم

وتابعوني بحساباتي الثانيه

وعيشوا بحب وإيجابية

insta : booshlife

snap: boosh.life

طريقة سهله وصحية لصوص الهمبرجر وهمبرجر صحي كما .. صحيه بدون حرمان #مالي_نفس_أطبخ healthy burger and sauce recipe

السلام عليكم ورحمة الله وبركاته

وصفة جديده من وصفات #مالي_نفس_أطبخ لكل الي حاب يطبخ بس بطريقة سهله وسريعه

والاهم أنها لذييييذه وبرضو صحية يعني أشبعي وانتي مبسوطه وضميرك مرتاح

نبدا بصوص صحي للهامبرجر وبرضو ينفع لاكلات ثانيه

المكونات

زبادي – كتشب -خردل – ليمون -ريحان -ببريكا -ملح -كمون – ليمون

المقادير تعتمد على حسب ذوقك .. اوقات رح تحتاجي تزيدي مكون عشان مثلا تكسري طعم مكون اخر مثلا شخصيا ماأحب طعم الخردل والزبادي الواضح فازود كتشب أكثر وبهارات الباقيه .. مع ان الزبادي أساسي والخردل للصوص ولكن مااحب بروز النكهه في الصوص

الطريقة

كلهم بصحن واخلطي ههههههه << بالله في احد أحسن مني يعطيكم وصفات كذا

والصوص يكون اول طبقه لنا في خبز الهامبرجر ..

نجي للهامبرجر

المكونات

خبز همبرجر – دجاج او لحم – بهارات اللحمه او بهارات مشكله بسيطه – خس وطماطم – والصوص الي سويناه

في ناس تحب تجيب الجاهز من ناحيه اللحم والدجاج << وانا كثير أسوي هالشي اجيب المثلج .. ولكن أشويهم

وفي ناس حابه تفرم الدجاج او اللحم وتضيف البهارات … وهذا الي سويته اليوم جبت لحم مفروم وأضفت عليه بهارات متوفره عندي

بالنسبه لخبز الهمبرجر فيه انواع كثير ..** خذوا الي يناسبكم وفي الانواع الصحيه الي تكون بخبز بر او نخاله .. ولكن شخصيا أشوف الصحه مو معناتها كل شي لازم يكون صحي ميه بالميه لان لو أكلك خلال اليوم كثير صحي وفيه فوائد .. تاخذي رز ابيض او خبز ابيض مارح يأثر كثير ويفرق كثر لو كان اكلك اغلبه مو صحي .. فشخصيا اعتمد بالنسب والتناسب بموضوع الاكل

اللحم المفروم نضيف عليه : ملح \ بهارات مشكله انا احب الفضخه وهي بهارات حضرميه مدري مين ايش بس هي مشكله هههههه تقدرو تلعبو بهالفقره من ناحيه ايش تضيفو او مثلا ضيفو ملح وفلفل اسود بس .. عندنا الصوص نكته غنيه ولذيذه

بعدين نكور اللحمه او الدجاج على الصاج نشويهم او على الجهاز المقلاه زي فيلبس يقون قلي صحي .. او نكتفي بالصاج على الفرن زي ماسويت وبس .. لين يستوي ونحطو على الخبز ونضيف فوقه صوص اللذيذ حقتنا وفوقه كمان كاتشب ليه لا؟؟؟

قطعي الطماطم لشرايح والخس << وحطيهم في الخبز حق الهمبرجر

مكونات واطباق جانبية

كتشب ؟؟ او بقيه الصوص << باين اني مهووسة كاتشب ولا لا ههههه

بطاطس مقطعة شرايح برضو مشوية ( ادهنوها بزيت زيتون وملح وببريكا لذذذذذذذذذذذذذذذذذذذذذيييييذه ) – اوالبعض يشوي البطاطس المجمدة << واوقات اسويها

وبس بالعافيه على قلبكم

اتمنى عجبكم الشرح السريع اخفيفه لطبق من اطباق #مالي_نفس_أطبخ

إذا عجبتكم هالفقره وتبغوا دايم منها . اتمنى تكتبوا بالتعليقات او تضغطوا لايك- إعجاب- على هالمدونة عشان اعرف

بالنهاية

عيشوا بحب وإيجابية

مخلل البليلة طرشي بطريقة صحية وسهله quick healthy pickle recipe for balila

السلام عليكم ورحمة الله وبركاته 

تدوينة اليوم جات من تفاعل جميل بالانستقرام (حساب انستقرامي ) كل مره اشاركم هالوصفة  

ولكن زي ماتعرفوا  ماني طباخه ماهره  فاغلب وصفاتي سريعه وسهله ومقاديرها مالها مقايس معينه ههههه يعني كل مره طعم جديد على حسب مقاديركم ولكن تظل لذيذه >> لاني مجربه كل الحركات هههه 

وصفة اليوم : طرشي (مخلل ) البليلة المشهور 

المكونات : خيار – بنجر – خل – ملح – موية  … اوقات احط فلفل اسود – بس مو ضروري لانبتضيفيه بعدين

الملح – انا استخدم الملح البحري ( وسعره كان نفس سعر الملح العادي فلا يغركم انه نوع ثاني فسعر اعلى دايم ).. الكمية : تعتمد على الكمية الي تبغيها  .. كم حبه تحتاجي والخ 

الاضافات الثانيه مثل الكمون وفلفل اسود وغيره تكون بعد ماتطبخي البليله وتحطي المخلل .. تحطي هالاضافات  ماتكون مع المخلل نفسو 

الطريقة : قطعي الخيار لقطع صغيره ونحيفة .. ونفس الشي للبنجر بس قشري القشره حقو .. وفي علبه او برطمان حطي كمية من الخل  والموية ( الموية تقريبا ضعف الخل ) وملح  … وحركي المكونات  واقفلي العلبه وخليه يتخلل لاكثر فتره ممكنه  … شخصيا ثاني يوم يكون جدا جاهز ولذيذ او اوقات تقريبا نهايه اليوم واكون مسويته من بدري عشان يتخلل كويس 

كميتي الي اعتمدتها للي حاب يعرف  : حبتين او حبه خيار – حبه بنجر – نص كاسه خل او اقل شوي  – وضعف الكمية او اكثر او اقل مويه – ملعقه صغيره او اقل من الوسط ملح بحري 

بالنهاية 

 اتمنى الطريقة عجبتكم وسهله انكم تجربوها … شاركوني تجاربكم بالانستقرام  على حسابي 

عيشوا بحب وإيجابية 

مشروب الكركم لألام المفـــاصل تجربي ؟؟؟ turmeric drink for joints pain my experience ?

السلام عليكم ورحمة الله وبركاته

تدوينة اليوم تعتبر جداااا مهمه بالنسبة لي واتمنى انها تفيدكم زي مافادتني

واذا تتابعوني بالانستقرام  اشارك عن هالموضوع وكمان في تدوينة سابقه – كيف تكوني روتين صباحي خاص فيك – ذكرت عنه وانه مهم في كل صباح

شخصيا اعاني من التهاب في المفاصل او وجع بالمفاصل دايم يجيني بعد ما اقعد فتره بسيطه لافه المفاصل .. مثلا زي لما اتربع\ او احط رجل على رجل \ اواتمرن\ اصلي  \ اعطف يدي \ اوطي ظهري او احركه والخ

المشكله ان الوجع والالم يجي بعد فتره بسييييطه جداا لدرجه في اموربسيطه مااقدر اسويها … ولكن أكيد دايم نحمد الله دايما وابدا مهما كان لان كل ابتلاء أهون  من غيره ..

 هل شفتي دكاتره ؟؟ فحصتي ؟

اي فحصت  ( الركبه خاصه ) والاغلب  قال مافي مشكله  من ناحيه المفصل والعظم والتكوين .. فيمكن ضعف العضلات الي حول المفصل او التهاب  ..

فنصحوني اسوي رياضه تبني وتقوي العضله الي حول المفصل (الركبه ) ولكن مااستمريت اسويه للاسف لان كان يعورني … فمدري شكلو لازم برضو ارجع اسويها وانتبه من ناحيه تقوية العضلات

نجي لمشروب الكركم ؟؟  كيف تسوينه؟ ومتى تشربينه ؟  وكم استمريتي ؟ والنتيجة ؟

هو عباره انك تستخدمي الكركم وتحيطه  في مويه ( انا اسستخدم كركم بودره حق الطبخ ) وتشربيه … من ناحيه الكميه  اقيس بالنظر  يعني شوي مويه بالكاسه  بس عشان يساعد ابلع الكركم لانه بهار  وارش كميه تقريبا نفسس ملعقه صغييييره او تقريبا رشتين ثلاث ..

جربته سابقا بدون مايكون في استمرار بشكل يومي او بوقت معين .. ماشفت نتيجه فوقفت … بعدين رجعتله لان سمعت كثير عن فوائده للمفاصل  وفوايده للجسم بشكل عام تقدرو تقرو عنه رح يبهركم من كثر الفوائد ….

ولكن هالمره جربته مع فلفل أسود .. برضو ارش مع الكركم رشه بسيطه او اقل من كميه الكركم .. واشربهم  — هالمعلومه قريتها او قالتها اخصائيه تغذيه ( شيماء ) تكلمت عنها بحسابي بالانستقرام وجدا اثق فيها

اشرب هالوصفه على الريق  …  وللمعلومية انا شخصيا اخذ حبه سوداء اصلن بشكل يومي…  فاخذه مع الوصفه (الكركم والفلفل الاسود) بنفس الوقت

المدة استمريت شهر كامل ولله الحمد كل يوم على الريق

النتيجة ؟؟؟ 

بنهايه ثالث اسبوع او بدايه رابع اسبوع – نهايه الشهر – لاحظت ان الوجع او الالتهاب بدا يجي بعد فتره اطوووول عن الوقت المعتاد يعني مثلا دحين اقدر اتربع واكل وجبتي ومايجي الوجع الا بعد نهايه الوجبه.. سابقا كنت يمكن مااكمل نص الوجبه او بالبدايه يبدا يجي الالم ولازم امد رجلي … او دحين صار اقدر ارتب المكان واوطي ظهري وارفعه بشكل اكثر ومتكرر وبعدين  لين مايجي الوجع .. مررررررررررررررره  مرررررررررررره انبسسسسطت بشكل مو طبيعي- اللهم لك الحمد اللهم لك الحمد –  مع ان لسا في الوجع ماراح  ولكن الوقت صار ابعد وصار اطول لين مايجي  ويعتبر تحسن بالنسبه لي مرررره جميل الحمد الله

هل رح تستمري عليه دايماااا ؟؟ 

صحيا  المفروض ولا شي استمر عليه على طوول لازم اعطي فتره لجسمي يرتاح من التراكمات … فاتوقع اني رح اخف او اقطع استخدامه لفتره بيسيطه بعدين ارجع استمر لفتره   وهكذا ..

بالنهـــاية 

اتمنى فادتكم هالتدوينة .. وفادتكم تجربتي .. واذا تعرفوا احد بيحتاج هالمعلومه لا تبخلو عليه وانشروه لهم

عيشوا بحب وايجابية 

img_3789

أسهل خبز زعتر بالبيت وصحي ونفس الي برا #مالي_نفس_أطبخ

السلام عليكم ورحمة الله وبركاته 

فقره سميتها #مالي_نفس_أطبخ لان لاحظت اغلب وصفاتي سريعه وسهله وماتحتاج كثير مقادير .. فعشان احمسكم سميتها بهالاسم

وصفة اليوم مرررررررررره لذيذه وبتذكركم بزعتر المدرسه او المخابز القديمه اللذيذه … وجدااا سهله وسريعه

مالها مقادير هي على حسب الكميه ورغبتكم  .. وتنفع فطور وعشاء وللصغار لذيذه  كمان لانها لينه  وخفيفه

خبز الزعـــــــــــــتر 

img_0141

المكونات : زعتر  – زيت زيتون – ملح وفلفل أسود  وبس 

الطريقه  : أخلطي كل هالمكونات سوا .. وافردي الخليط على توست … وبالحماصه حطي التوست او بالفرن او على صينيه بالنهار وحمصي التوست  خليه يكون مابين المقرمش والطري …

وبالعاااااااااااااااااافيه 

بالنهايه 

اتمنى عجبتكم وشاركوها مع الي مالهم نفس يطبخوا

عيشوا بحب وايجابية 

 

وصفة رمضانية : مكرونة باللحم وبيتزا بوصفة وحده سريعه ولذيذة Ramadan dish

السلام عليكم ورحمة الله وبركاته 

رمضان كــــريم …. رمضان مبارك

وصفة اليوم سريعه ولذيذه وخفيفه |(من البيتزا المأكوله هههههه بالصوره )  …  اخذت مني نص ساعه لهالطبقين اللهم بارك  ….

مثل ماقريتو بالعنوان يعتمد على طبق واحد ! عشان تسونهم .. يلا نبدا

صلصة الطماطم السريعه  (مقاديرها ) هي : 

صلصه طماطم

بصل  مقطع شرايح كبيره شوي

ثوم مهروس

موية

بهارات مشكله  ( استخدمت انا ريحان – فلفل اسود- ملح – بهار دجاج – كمون ) وبس

صلصة الطماطم السريعه (طريقتها) هي : 

بصاج حطي شوي زيت عشان يمنع الالتصاق ..  واضيفي البصل والثوم والصلصه والبهارات وخليهم يطبخو .. وضيفي مويه عشان

يكون صوص بس لا تكثري لان نبغاه يكون ثقيل مو مره خفيف  . وخليه شوي يطبخ  وبالعافيه

 ..وشيلي شوي من الصلصه بطبق على جنب  لطبق البيتزا   والباقي خليه بالصاج لطبق المكرونة

الطبق الأول : المكرونة بالحم والصلصة الحمراء 

جدااااا لذيذة جدااااا …

تحتاجي بس :  مكرونة …. ولحم مفروف  وتبليهم ب (ملح وفلفل اسود ) وكوريهم لكور مفرقه

طريقتها : ضيفي اللحم على الصلصه الحمراء وغطي الصاج لين ماتنضج اللحم .. وغطي اللحم بالصلصه

 والمكرونه على جنب اطبخيها بقدر فيه مويه ..-اطبخي المكرونه وقت ماتسوين الصلصه عشان الوقت

ولما تنضج ضيفي بالطبق المكرونه وعليها صلصه اللحم  وبالعافيه

 الطبق الثـــاني :البيتـــــزا

تحتاجي: عجينة  بيف باستري  مربعات … وجبنة مبشوره (انا استخدمت جبنة شدر ) وبس

طريقتها :  خذي قطعة بيف باستري  وطبقيها  عشان تكون مستطيله او  خليها شوي تلين وخليها  دائرية  .. ضيفي عليها طبقة من صلصة الطماطم  و رشي جبنة الشدر … وهكذا سوي على باقي القطع .. وحطيهم بصينية وعلى الفرن خليهم يطبخوا …. بتعرفي انهم نضجوا اذا انتفخت العجينة وتحمرت من فوق

ه

وصفة رمضانيه :صينية رولات تونا صحية سريعه ولذيذة /RAMADAN dish

السلام عليكم ورحمة الله وبركاته 

رمضان كـــــريم .. رمضان مبـــــارك

هالوصفة مزيج مابين وصفتين تعلمتهم وعرفتهم من كتاب وموقع ووصفة متعارفه ومتداوله بين حريم وبنات العيله

مزجتهم لان كانو زايدين بكمية قليله من اليوم الي قبله فحبيت استغلهم بدري قبل لا يقعدو ويخربو علي

1526662409447-1

 

صينية التونا بتوست النخاله 

كالعاده بوصفاتي مااعتمد كميه معينة في المقادير .. على حسب الموجود والكميه الي ودي فيها

تتكون من صلصه تونا وتوست نخاله وصلصة تزيين من فوق 

طريقة صلصه التونا  ( المقادير ) هي : 

تونا

زيت

طماطم مقطع قطع

صلصه طماطم

ملح – فلفل اسود – ريحان..ضيفي بهارات ثانيه اذا حابه

ثوم مهروس

بصل مقطع  وصل كبيره شوي

بقدونس

صلصة التونا (طريقة الطبخ ) هي : 

بصاج حطي شوي زيت عشان يمنع الالتصاق .. واضيفي البصل والثوم والطماطم والصلصه والتونا والبهارات بالتدريج وحركي لين يتجانسو ويطبخو .. ضيفي شوي مويه اذا حابه شوي يكون صلصه شوي سائله بدال ماتكون ناشفه . واخر شي حطي البقدونس وحركيه لين مايطبخ مع الصلصه ..

صلصه التزيين (مقاديرها )هي : 

لبنة

زبادي

بابريكا  -ملح – فافل اسود

ثوم مهروس وليمون

صلصة التزيين (طريقتها ) هي :

كل المكونات اخلطيها سوا بصحن  وخليها على جنب

طريقة الحين صينية رولات التونا الصحية  : 

خذي توست بر وافرديه بفراده  لين مايكون رفيع عشان تقدري تلفيه … بعد ماتفرديه ضيفي صلصة التونا  شوي .. ولفي التوست وحطي الحبه بصينيه فرن .. وهكذا  خذي توست مفرود وضيفي الصلصه ولفي وحطيها جنب التوست السابقة وصفيها جنب بعض .. وبعد ماتخلصي  من لف التوستات الي تحتاجيها  وعبت الصينيه  ( انا سويت بس صف واحد لان صينيتي صغيره ) بعدها ضيفي صلصة التزيين من فوق  .. مدديها على كل الصينيه … وحمريها بالفرن شوي قبل التقديم …

وبالعافيه 

لاتنسوا تتابعوا المدونة لمزيد من الوصفات والموضيع الصحيه 

المصادر الي تعلمت منهم الوصفات .. مع العلم ماتقيد بالوصفات كامله الا بعض  منها وبعض من مقاديرها ولكن الالهام منهم بشكل كبير ..

موقع 15 ثانيه

easy comfort food book

 

 

مكرونة بشاميل صحية ولذيذة \ Healthy Delicious and Easy Bechamel pasta (macaroni)

السلامعليكمورحمةاللهوبركاته 

تدوينة اليوم من احلى الوصفات والاكثر طلب في السناب .. جدا لذيذه ومارح تحسون انها صحيه لانها نفسسس المكرونة الباشميل العاديه بالطعم والشكل … فاحتمال تعتمدونها بدال العاديه هههههه  .. ومثل ماعودتكم في كل وصفاتي ! سريعه ومافيها تدقيق بالمقادير والقياسات

طبعا هالطبق فيها خطوتين ! الاول هي المكرونه بالصلصه الحمراء والثاني هي صلصة الباشميل ….

نبدااولخطوة : المكرونةبالصلصةبالحمراء  

مكرونة

(تونا  او دجاج او لحم انا اسوي تونا (الي علبتها مكتوب  بمويه وملح

صلصه طماطم

بصل وثوم

( بهارات مشكله ( انا استخدم كركم -كمون -فلفل اسود- ملح بحري او عادي-  بهارات مشكله -وبهارات دجاج

*الملح اختياري .

ليمون

الطريقة: نسلق المكرونه بمويه بقدر لحالها لين تستوي … بصينيه ثانيه شوي زيت ونحمس البصل والثوم لين يستوون ويصير لونها شفاف شوي .. بعدها  احد بافي المقادير واصب  مويه عشان تكون صلصه .. كميه الميه على حسب رغبتك انا احب اكثر شوي مويه عشان لما اخلط الصلصه بالمكرونه تكون الصلصه طاغيه اكثر … في بعض يحب شوي صلصه ووقت ماتنخلط مع المكرونه يكون الطبق ناشف… فعلى حسب رغبتكم

الصلصه تعتبر مستوية  اذا كانت تطبخ او تغلي وخاصه مع التونه لانه مايحتاج طبخ كثير .. اذا دجاج او لحم يعتمد اذا انطبخو زين .. وبس تحطي الصلصه بالمكرونه  (بعد ماتصفي المكرونه من المويه ا\ انا ششخصيا اخلي شوي من مويه المكرونه)وتخلطيهم سوا عشان يتجانسو.. وتخليهم ع نار هاديه

الخطوةالثانيه : صلصةالباشميل 

حليب بودرة

نشاء

جبنة فيتا

ملح بحري وفلفل اسود

الطريقة: بقدر احط تقيبا ثلاث ملاعق حليب وكوب مويه قيبا … اوقات مااقيس ولكن كيف اعرف اذا صح ؟  لما اخلط المويه والحليب النتيجه يكون سائل ابيض مو يكون مويه ولونها باهت !! ….وبعدها اضيف الجبنه .. المقدار على حسب اوقات ملعقه كبيره او قات ملعقه صغيره  فعلى حسب ذوقك  او الكميه المتوفره عندك … واخلط لين يتجانس مع الحليب … وبعدها ابدااحط النشا على شوي شوي .. يعني ارش كميه تقريبا اقل من ملعقه واخلط…

وقت مايغلي الخليط هنا بعرف ازيد النشا او لا !!! لان اذا ماكان الحليب ثقيل ازيد النشا واخليه يطبخ شوي عشان يبدا يثقل .. وهكذا لين يكون عندي خليط مثل كثافه الصوص .. بمعنى انه سائل بس ثقيل بنفس الوقت … اذا وصلتي لهالكثافه  اذا حابه رشي شوي ملح وفلفل اسود وهذي اختياري

التقديم  

تدهني بزيت شوي الصينيه … وتغرفي المكرونه فيه وتوزعيه بشكل متسواي .. وتصبي من فوق الصلصه حق الباشاميل …  وتدخليها الفرن بس تحمر من فوق لدقايق  … وبالعااااااااااااااااااااااااااااااافيه انا شخصيا احب اعصر ليمون او اكتشب ههههه على المكرونه وقت الاكل تعطي طعم جبار

بالنهايه  

لازم تجربوها وتخلو غيركم خصووووصاااا الي يفكر ان الاكل الصحي مو حلوووو وماصخ  لااازم نثبتلهم العكس

وعيشوا  بحبوإيجابية 

img_3789