what is ” minimalism” life style أيش معنى أسلوب حياة البساطة أو المنيمليزم وايش فوائده

السلام عليكم ورحمة الله وبركاته

تدوينة اليوم ببساطه عن شي حابه اطبقه بحياتي كلها .. طبقت منه في جزء بحياتي وجدا انبسط ونتايجه ومردوده علي وعلى نفسيتي وانجازاتي … فحبيت اشاركه لكم عشان تستفيدوا وتبدو تطبقوه اذا ناسبكم

ايش معنى البساطه  او المانيمليزم (نطقها بالانجليزي ) بتعريف سريع ؟

معناها محيطك يكون شكله بسيط سوا ديكور البيت \ اسلوب اقتنائك للاغراض وصرفك  \ اسلوب لباسك والخ …

minimal_office_43.jpg

طيب بتعريف ادق شوي ؟؟

اولا هو اسلوب نفسي .. يعني تدربي نفسك وشخصيتك انها تكون مو متعلقه بالامور الماديه كثير !

ثانيا :ان كل شي حولك يكون شي تستخدمه \ تحتاجه \ له غرض يفيدك … اي شي لك فتره مااستخدمتيه \ ماتحبينه \ مخزن له فتره \او منه كثير .. تتخلصين منه سوا كان تعطينه احد تعرفينه او تتصدقين او ترمينه .. المهم ان كل شي حولك يكون له غايه الان  حتى لو تبغي تخزنيه اهم شي يكون له غايه حاليا ( مثل تخزن ملابس الشتاء)… ويكون في جرد بشكل دوري او كل فتره  (معنى انك تفرزين الاغراض وتشوفين الي تبغيه والي ماتبغيه )  ..

ثالثا : في ناس ماخذين اسلوب البساطه ان تكون عندك اقل كميه ممكنه من الاغراض فالبيت بشكل عام  وشخصيا اشوفها مبالغه فالبساطه وبنهايه المدونه بشاركم صور عشان توضح لكم الصوره

رابعا : مو بس تطبقيه بالبيت .. التطبيق يكون حتى بأسلوب اللبس – انه يكون بسيط-  او من ناحيه المقاضي حق الاكل – مااشتري كثير … والخ يعني تطبيقه بكل مجالات الحياه  يعني حتى البريد الالكتروني يكون بشكل نظيف وبشكل دوري تحذفي الامور الي مو مهم

خامسا : هالاسلوب يرافقه التنظيم والترتيب وتخصيص مكان لكل شي

الخلاصه : كل محيطك وبيئتك تكون امور تستعمل الان وتقللي بشكل كثير الامور الي تكون مخزنه لفتره طويله

 

كيف اطبقه بحياتي؟

تطبيقه يعتمد على ميولك , يمكن انتي تحبي تقني  الاثاث والديكورات الكثيره او الزينه الكثيره فمارح تقدري تطبقي اسلوب البساطه بالديكور اول شي  .. بس يمكن تطبيقيه بامور الملابس والاكسسوارات او من ناحيه مقاضي الاكل … غيرك يمكن يطبقه باسلوب ديكور البيت ولكن يحب الملابس واقتنائها كثير فبيكون مو سهل ييطبقه بالازياء والاكسسوارات

فمهم اول شي : تقعدي مع نفسك وتعرفي ايش الامور الي اقل اهميه عندك الين الاكثر اهميه ! وبعدها تبدي تفرزي الامور الي اقل اهميه عندك وتتخلصي من الي ماتبغيه او قعد فتره بدون احتياج … وتخلي الي تستخدميه وتبغيه حاليا

ثانيا :كل فتره ارجعي افرزي عشان مايرجع يتكاثر عليه الاغراض .. مع ان تصير هههه وترجع اكثر من اول ولكن المحاوله والتكرار اهم شي

وترا في ناس يعتمدونة بكل جوانب الحياه وهذا الي اطمحله انا .. ولكن زي ماقلت على حسب كل وحده ونفسيتها واسلوب حياتها وتفكيرها

ثالثا : يعتمد هالاسلوب على التنظيم والترتيب بشكل كبير .. يعني الدرج يكون في مقسمات وكل قسم مخصص لشي معين  ولكل شي له مكان حتى البطاريات لها مكان مخصص

فوائد اسلوب حياة البساطه او المانيمليزم ؟

اولا :كل ماقلت الاغراض زادت الراحه النفسيه

وهذا شي البعض اثبتوه علميا .. ان الجوامد والامور المحاطه حولك لها تأثير على مزاجك … ابسسسسسسسسسسسسط مثال ! شوفو لما نروح محل غالي – المحل يكون ملابسه عددها قليل وديكوره خفيف – مقارنه بالمحلات الثانيه العاديه – الي تكون مليانه بضايع .. كيف نفسيتنا تكون ؟؟؟ حتى لو مااشترينا شي !! ……… النفسيه حلوه  مو نفس لو كان زحمه اغراض فتنزعجين … او مثل الفنادق  لما ندخلها نكون مروقين ونحب الغرفه  هههههه بس لانها اهدى وهالسبب يرجع لقلة الاغراض فيها

ثانيا : تحمسك تشتغل

لما يكون المكان مريح لك .. نفسيتك تكون مستعده انك تقوم تسوي اي شي … مثلا تنظيف او ترتيب او مذاكره او شغل .. لان المكان مو مأثر على مزاجك … نفس لما نرتب غرفتنا بعدها يكون لنا نفس ندرس او نتفرج تلفزيون او ع الاقل نرجع ننام فيها  ولله الحمد

ثالثا: تخفف التعلق بالامور الماديه

تخلي الواحد يحب يجرب امور جديده .. ويجدد من نفسه والامور الي يمتلكها .. لان بيصير في عاده عندك انك مو متعلقه بالامور الماديه فمافي مشكله انك تتخلصي بسرعه من الامور الي ماصارت تلبي الرغبه المرجوه منها .. يعني بعد الممارسه  يصير لو شريتي عطر جديد او لبس جديد ماناسبك على طول بتتخلصي منو سوا فورا او بعد مده لان مافي ارتباط نفسي (لاااا حرام توني مشتريته خليني اجربه بعدين) فيصير التخلص والتجديد شي سريع …

رابعا : تقدير الامور الغير ماديه

تصير قعده الاهل والاصحاب … الانجاز بالحياه … حب تفاصيل الحياه الصغيره  هي الاهم لك .. والي تحبي تقضي وقت اطول لانها هي الاهم .. لان الامور الثانيه تروح ولكن الحياه وتفاصيلها والناس هي الي ماتنعاد ..

خامسا : التوووووووووفييييييييييييييييير بالمصاريف

مو معناته ترح تصرفين أقل من ناحيه أسعار الاشياء الي تصرفيها (لان هذا يعتمد على كل شخص وميزانيته ) ولكن بيكون في فرق من ناحيه المجموع او كميه الصرف  بشكل كامل …  لان بيكون صرفك الحين اكثر من ناحيه ( هل احتاجه او لا ) … او (هل هو مهم وعاجل او لا ) وكمان  بيكون التوفير من ناحيه (تشتري الي تبغيه  فقط  سوا ضروري او لا ) يعني بيكون التوفير من ناحيه ان المبلغ الي صرفتيه في محله  … لان اوقات نشتري امور بس لان نبغا نخلص منها ونستعجل وبعدين مايكون من جد الي نبغاه – سوا الجوده او الشكل او غيره –  فنروح نشتري مره ثانيه ويكون ضيعنا وقت وفلوس … وكمان يخليك تشترين الشي الي مقتنعه فيه عشان ماتتراكم عندك الاغراض ..

والحين بشاركم صور من الانترنيت لتطبيق هالنظام بأشكال مختلفه (بعضهم يمكن مبالغ ولكن الفكره وحده وهي التبسيط قدر المستطاع ).. استمتعوا

بالنهايه 

اتمنى تعجبكم هالتدوينة ويكون الشرح اعطاكم مفهوم واضح لهالفكره … لا تنسوا تنشروا هالتدوينة لغيركم

وعيشوا بحب وإيجابية 

img_3789

ملخص كتاب للتنظيم والترتيب (كيف تصبحين ربة بيت مثالية )\review on organizing book (how to be a perfect housewife )

السلام عليكم ورحمه الله وبركاته

تدوينه اليوم ملخص لكتاب عن تنظيم وترتيب المنزل..

اشوفه يناسب مو بس ربة منزل حتى لو انك بنت مع اهلك .. لكي غرفه لحالك او تساعدي امك باعمال البيت…

فهو مخصص لكل من يعاني من الاهمال والكسل والتاجيل باعمال البيت… والي يسبب تراكم اغراض وطاقه سلبيه وجو غير مريح …

بالبيت او بالغرفه الي انتي قاعده فيها..

والاهم الي دام ينظف ويرتب ويحاول دايم يكون المكان نظيف بس بدون فايده ودايم يحس ان الوضع مكركب او مو قادر يحافظ على روتين بالتنظيم  يناسبه  مثلي ههههه

الكتاب : كيف تصبحين ربة منزل مثالية

الكاتب:أنثيا تيرنر

سعره:

شريتو من مكتبه جرير ..

فكره الكتاب:

يتكلم عن كيف ربة المنزل  تقدر ينظم ويرتب كل غرفه بالبيت.. وتتكلم بالتفصيل عن اسلوب الترتيب والتنظيم وبرضو التنظيف والكوي وحلو انها تعطي افكار لأمور طبيعيه مثلا مواد طبيعيه زي الخل او عصير الليمون .. وبرضو جداول او تقسيم للايام من ناحيه توزيع المهام خلال اليوم او الاسبوع .. وتخصص لكل غرفه فصل تتكلم عن هالغرفه بالتفصيل.. وتعطي نصايح سريعه وعمليه…

اسلوب الكتاب:

اسلوبها جميل وماتتكلم باسلوب علمي ..تحسينها تتكلم معاكي وتسولف فعجبني اسلوبها .. ولانها تتكلم بتفصيل عن امور الترتيب والتنظيف والتنظيم فالكتاب يعتبر مليان ولكن ماهو كبييييير ولاهو صغير .. بس حسيت انها تعطي كل موضوع حقه بالطرح والشرح …

ايش استفدت :

اكيد استفدت مفاهيم وطرق للتنظيم والترتيب سهله وعمليه وغير مكلفه وحلو موضوع توزيع المهام عشان مااضغط نفسي دايم كل يوم فكان جميله هالحركه ….. بس مره حبيت معلومات مواد التنظيف الطبيعيه ..لانو لو تتابعوني بالسناب..استخدم قدر الامكان مواد طبيعيه ( مثل خل /بكربونات الصوديوم) بالتنظيف.. فكانت معطيه حلول طبيعيه لتنظيف كللللللل شي بالبيت ..

هل بس الكتاب مخصص  للمتزوجة والام :

 لا طبعااا لا …. الكتاب بيستفيد منه  الكل سوا كنتي بس مسوؤله عن غرفتك او تساعدي  امك بالبيت او حتى تعطي بينتك تقراه  .. او إذا عايشه مثلا برا لحالك لان  المواضيع عن ترتيب وتنظيم وتنظيف فالكل بيفيده ولكن يفيد ربات البيوت اكثر لان زي ماذكرت يتكلم عن  البيت كله  وربات البيوت هم القائدين للبيت  فهم الاساس 

بالنهايه

اتمنى استفدتو من هالتدوينه… وشاركو غيركم  للفائده …

وعيشوا بجب وايجابي